Yox 7:11 - Tupanaarü Ore

¹¹ Rü ngẽmaca̱x i ñu̱xma rü taxũtáma changeã̱xmare. Rü ngẽma ngúxü̃ i chingexü̃gagu rü ngẽma nax chanuxü̃gagu rü tá chidexa rü tá cumaxã nüxü̃ chixu i ngẽma nagu charüxĩnüxü̃.

Yox 7:11 Referans Kwoze

Wiyaegü 40:9

Rü yema taxü̃ ga ngutaque̱xewa rü duü̃xü̃güpe̱xewa meama nüxü̃ chixu nax cuma rü ixaixcümacü quixĩxü̃. Rü cuma rü meama nüxü̃ cucua̱x nax tama changea̱xmarexü̃.

Yox 10:1

Rü marü düxwa chipa nax ñoma i naanewa chamaxü̃xü̃. Rü ngẽma ngúxü̃ i chingexü̃gagu rü taxũtáma chaugüna chachogü nax nüxna chaca̱a̱xü̃ nax tü̱xcüü̃ ngúxü̃ choxü̃ yangexẽẽxü̃.

1 Chamué 1:10

Rü ngĩma ga Ána rü poraãcü ixaxu, rü ngĩgümaxã ingechaü̃, rü yemaacü iyumüxẽ, rü Tupanana ica.

Ichaía 38:17

Rü dücax, yema ngúxü̃ ga chingexü̃ rü ñu̱xma rü taãẽxü̃ choxü̃́ nayanguxuchi. Rü cuma nixĩ ga yema ãxmaxü̃ ga ãũcümaxü̃wa nüxna cudauxü̃ ga chorü maxü̃, yerü choxü̃́ nüxü̃ curüngü̃ma ga guxü̃ma ga yema chorü chixexü̃gü.

Ichaía 38:15

Natürü ñu̱xma nax nümatama yixĩxü̃ i cha̱u̱xca̱x ínanguxẽẽãxü̃ i ngẽma da̱xawe ¿rü ta̱xacüxü̃ tá namaxã chixuxü̃? Rü ngẽma yaxta rü choxna niña nagagu i ngẽma ngúxü̃ nax chingexü̃. Rü ngẽmaca̱x gucü ya chorü taunecügu rü tá chaugü ícharüxíra nape̱xewa ya Tupana.

Yox 21:25

Rü nangẽxma i togü i duü̃xü̃gü i guxü̃guma nueechaxü̃ rü taguma taãẽgüxü̃, rü ngẽmaãcü yuexü̃.

2 Corintios 2:4

Rü yexguma pexca̱x chanaxümatügu ga yema popera, rü poraãcü chanaxĩ̱xãchiãxẽ, rü düxwa yema chorü ngechaü̃maxã chaxaxu. Natürü tama pexca̱x chanaxümatü nax pexü̃ changechaü̃xẽẽxü̃ca̱x, natürü pexca̱x chanaxümatü nax nüxü̃ pecuáxü̃ca̱x nax poraãcü pexü̃ changechaü̃xü̃.

Ore i mexü̃ ga Luca ümatüxü̃ 22:44

Rü yema nax poraãcü nanaxĩ̱xãchiãẽxü̃ ga Ngechuchu, rü yemaca̱x yexeraãcü nayumüxẽ, rü nanaxaiyaãchi. Rü ñoma nagü waixü̃müanewa ichuruxü̃rüxü̃ nixĩ ga norü aiyacü.

Yox 16:6

Natürü ngẽma nax chidexaxü̃ rü tama choxü̃́ nanangupetüxẽxẽ i ngẽma ngúxü̃ i chingexü̃. Rü woo chi charüngea̱xgu rü tama choxü̃́ nanangupetüxẽxẽ nax choxü̃́ nangúxü̃.

Yox 13:13

¡Rü ñu̱xma rü perüchianegü erü choma rü tá chidexa! Rü nüetama nixĩ ega ngẽma chorü dexagagu ta̱xacü choxü̃ ngupetügu

Yox 10:15

Rü ngẽxguma chi aixcüma chixexü̃ chaxüxgu rü marü icharütaxu. Rü woo ega taxuxü̃ma i chixexü̃ chaxüxgu rü taxucürüwa chataãxẽ, erü choxü̃ cuxãnexẽxẽ rü choxü̃ cunaxĩ̱xãchiãẽxẽxẽ.

Yox 6:26

Pema rü choxü̃ pixuchigagü naxca̱x i ngẽma chorü dexagü. Rü pexca̱x rü chorü oregü rü taxuwama name, rü ñoma oregü i buanecü ingegüxü̃rüxü̃ nixĩgü.

Naanearü ügüchiga 42:21

Natürü ga wüxichigü rü nügümaxã ñanagürügü: —Aixcümaxü̃chi poraãcü chixexü̃ namaxã taxü ga taenexẽ ga Yúche. Yerü woo nüxü̃ nax idauxü̃ nax ngúxü̃ yangexü̃, natürü tama naga taxĩnüe ga yexguma tüxü̃ naca̱a̱xü̃gu nax tüxü̃́ nangechaü̃tümüxü̃xü̃ca̱x. Rü ngẽmaca̱x nixĩ i ñu̱xma taxca̱x ínanguxü̃ i ñaa guxchaxü̃ —ñanagürügü nügümaxã.

Wiyaegü 39:3

Rü poraãcü chauãẽwa nangu̱x i ngẽma choxü̃ üpetüxü̃. Rü yexguma yexeraãcü nagu charüxĩnügu rü yexeraãcü chanuãxẽ. Rü yemaca̱x düxwa tagaãcü ñachagürü:

Yox 9:27

Rü ngẽxguma nagu charüxĩnügu nax nüxü̃ charüngümaxü̃ca̱x i ngẽma ngúxü̃ i chingexü̃ nax ngẽmaãcü chataãẽxü̃ca̱x, rü wenaxarü choxü̃ ínaba̱i̱xgü i ngẽma ngúxü̃ i chingexü̃. Rü meama nüxü̃ chacua̱x nax pema rü tama choxü̃́ peyaxõgüxü̃ nax taxuxü̃ma i chixexü̃ chaxüxü̃.

Yox 36:21

¡Rü cugüna nadau nax tama wenaxarü naxca̱x cutaeguxü̃ i ngẽma chixexü̃! Erü ngẽma chixexü̃gagu nixĩ i ñu̱xmax ngúxü̃ quingexü̃.