Yox 22:3 - Tupanaarü Ore

³ ¿Rü yimá Tupana ya Guxãétüwa Ngẽxmacü rü ta̱xacürü mexü̃ tá cuwa nayaxu ega mea cumaxü̱̃xgu rü nape̱xewa nataxuxgu i curü chixexü̃?

Yox 22:3 Referans Kwoze

2 Corintios 7:1

Pa Chauenexẽgü ya Pexü̃ Changechaü̃güxex, ngẽmagü nixĩ i Tupanaarü unetagü i marü tüxü̃́ ngẽxmagüxü̃. Rü ngẽmaca̱x tanaxwa̱xe nax yigüna idaugüxü̃ nax tama taxünemaxã rü ẽ̱xna taãẽmaxã naxüxü̃ca̱x i ngẽma Tupanape̱xewa tama mexü̃. Rü tanaxwa̱xe i Tupanaxü̃ imuü̃exü̃ rü nüxna yigü ixãgüxü̃ nax naxca̱xicatama imaxẽxü̃ca̱x.

Ngechuchuarü ngúexü̃gü ga yamugüxü̃arü puracüchiga 24:16

Rü ngẽmaca̱x nixĩ i guxü̃guma mea chaugüna chadauxü̃ nax chauãẽwa mexü̃gu charüxĩnüxü̃ i Tupanape̱xewa rü duü̃xü̃güpe̱xewa.

Maraquía 2:17

Rü pema rü perü dexamaxã marü düxwa peyapaxẽxẽ ya Tupana. Rü ngẽmaétüwa i pemax rü ípecagüama rü ñaperügügü: —¿Rü ñuxũ ñatarügügü i tomax rü ngẽmaca̱x tayapaxẽẽxü̃ nax toxü̃ naxĩnüxü̃? —ñaperügügü. Rü pema rü ñaperügügü: —Nüma ya Cori ya Tupana rü namaxã nataãxẽ i ngẽma duü̃xü̃gü i chixexü̃ ügüxü̃ rü taxũtáma nanapoxcue —ñaperügügü. ¿Tama ẽ̱xna peyaxõgü nax Tupana rü aixcümacü yixĩxü̃?

Ucu̱xẽgüchiga 15:8

Nüma ya Cori ya Tupana tama nanayaxu i norü ãmaregü i ngẽma chixexü̃gu maxẽxü̃. Natürü taãẽãcü nanayaxu i tümaarü yumüxẽgü ya yíxema aixcüma mea maxẽxe.

Ucu̱xẽgüchiga 12:22

Nüma ya Cori ya Tupana, rü naxchi naxai i ngẽma idorata̱a̱xgüxü̃, natürü tümamaxã nataãxẽ ya yíxema aixcümaxü̃ ixugüxe.

Ucu̱xẽgüchiga 11:20

Nüma ya Cori ya Tupana rü tama namaxã nataãxẽ i ngẽma duü̃xü̃gü i chixexü̃ i nacümagu ĩxü̃, natürü tümamaxã nataãxẽ ya yíxema mexü̃ i nacümagu ĩxẽ.

Ucu̱xẽgüchiga 11:1

Nüma ya Cori ya Tupana rü nüxü̃ naxo i ngẽma yáruxü̃ i tama ngugügu nayáxü̃, natürü namaxã nataãxẽ i ngẽma yáruxü̃ i aixcüma mea ngugügu nayáxü̃.

Wiyaegü 119:59

Rü nüxü̃ chicua̱xãchi i chaucüma, rü wenaxarü ichanaxügü nax naga chaxĩnüxü̃ i ngẽma curü mugü.

Wiyaegü 39:1

Choma rü marü chaugümaxã ñachagürü: —Chaugüna tá chadau nax ngẽmaãcü tama chixexü̃ chaxüxü̃ca̱x i ngẽxguma chidexagu. Rü tá changea̱xmare i ngẽxguma chope̱xewa nangẽxmagügu i duü̃xü̃gü i chixexü̃gu rüxĩnüexü̃ —ñachagürü.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 29:17

Pa Chorü Tupanax, choma nüxü̃ chacua̱x nax guxü̃guma mea cunangugüxü̃ i torü ĩnü rü namaxã cutaãẽxü̃ nax tixaixcümagüxü̃. Rü ngẽmaca̱x aixcüma mexü̃gu charüxĩnüãcüma chorü ngúchaü̃maxã cuxna chanana i guxü̃ma i ñaa ãmaregü. Rü ñu̱xma rü chataãxẽ erü nüxü̃ chadau i ñaa curü duü̃xü̃gü i nuxã ngutaque̱xexü̃ rü guxü̃ma i norü ngúchaü̃maxã cuxna nanana i ngẽma norü ãmaregü.

Filipenses 4:18

Rü ñu̱xma rü marü choxü̃́ nangẽxma i guxü̃ma i ta̱xacü i chanaxwa̱xexü̃, rü aixcüma ngẽmaarü yexera choxü̃́ nangẽxma. Rü ñu̱xma nax Epaporudítu núma nangexü̃ i perü ãmare, rü taxuxü̃ma choxü̃́ nataxu. Rü ngẽma perü ãmare i cha̱u̱xca̱x núma pemuxü̃, rü Tupanape̱xewa rü ñoma wüxi i pumara i yixĩxü̃rüxü̃ nixĩ, rü nüma rü poraãcü namaxã nataãxẽ.

Yox 22:4

Rü ñu̱xma nax Tupana cuxü̃ poxcuxü̃ rü tama i ta̱xacürü mexü̃ nax naxca̱x cuxüxü̃gagu nixĩ i cuxna naca̱xaxü̃ rü cuxü̃ yanawe̱xãchixẽẽxü̃. Natürü ngẽma curü chixexü̃ i taxüchixü̃ i taxuguma yagúxü̃gagu nixĩ i cuxü̃ napoxcuxü̃.

Yox 35:7

Rü woo ega mexü̃ cuxü̱xgu ¿rü ta̱xacürü mexü̃ nixĩ i Tupanana cuxãxü̃? ¿Rü ta̱xacürü mexü̃ cuwa nayaxuxü̃ ya Tupana?

Yox 21:15

¿Rü texé nixĩ ya yimá Tupana ya Guxãétüwa Ücü rü ngẽmaca̱x nanaxwa̱xexü̃ nax naga taxĩnüexü̃? ¿Rü ta̱xacüwa chi toxü̃́ name ega ngẽxguma nape̱xewa tayumüxẽgügu?” ñanagürügü.

Yox 34:9

Rü ñu̱xmax rü Yox nüxü̃ nixu nax taxuwama duü̃xü̃axü̃́ namexü̃ nax Tupanaca̱x imaxü̃xü̃.

Ucu̱xẽgüchiga 9:12

Ngẽxguma cuãẽxü̃ cucua̱xgu rü mexü̃ tá cuyaxu. Natürü ngẽxguma tama ucu̱xẽ curüxĩnüchaü̃gu, rü cugüna tátama guxchaxü̃ cuxã.