Yox 2:12 - Tupanaarü Ore

¹² Rü yexguma yáxü̃gutama naxĩxgu rü Yoxü̃ nadaugü, rü yema poraãcü nax yada̱xawexü̃ rü tama aixcüma nüxü̃ nacua̱xgü. Rü yemaca̱x inanaxügüe ga aita nax naxüexü̃ rü naxauxexü̃. Rü yema taxü̃ ga ngechaü̃ nax yangegüxü̃gagu rü nügü narügáutechirugü rü mairaxü̃te̱xe nügüerugu nagünagügü.

Yox 2:12 Referans Kwoze

Echequié 27:30

Rü nümagü rü tá tagaãcü norü ngechaü̃maxã cuxca̱x naxauxe rü waixü̃müte̱xemaxã tá nügü nagüerugü. Rü tanimacate̱xegu tá nidixgü.

Auxexü̃chiga 2:10

Rü guma ĩane ya Chióü̃arü yaxguã̱xgü rü ngechaü̃maxã waixü̃müanewa narütogü, rü waixü̃müte̱xe nügüeru nagügü, rü naxchiru i techaraxü̃gu nicu̱xgü. Rü pacügü i Yerucharéü̃cüã̱xgü rü ngĩrü ãnemaxã waixü̃müanegu iyangücuchitanü.

Neemía 9:1

Rü gumatama tauemacüarü 24 ga ngunexü̃gu rü nüma ga Iraétanüxü̃ rü nangutaque̱xegü nax aureãcüma nayumüxẽgüxü̃ca̱x. Rü nüxna nixĩgachi ga yema duü̃xü̃gü ga tama Iraétanüxü̃ ixĩgüxü̃. Rü témüxü̃ ga naxchirugu nicu̱xgü rü waixü̃müte̱xe nügüeru nagünagügü. Rü yexma nachigüãcüma Tupanamaxã nüxü̃ nixugüe ga noxrütama chixexü̃gü rü nüxna nacua̱xãchie ga norü o̱xigüarü chixexü̃gü rü ta.

Yox 1:20

Rü yexguma ga nüma ga Yox rü inachi rü norü ngechaü̃maxã nügüchirugu nagáugü rü nügü rü waixü̃müanegu nayangücuchi rü Tupanaxü̃ nicua̱xüxü̃.

Yochué 7:6

Rü nüma ga Yochué rü yema Iraétanüxü̃arü ãẽ̱xgacügü rü norü ngechaü̃maxã nügüchirugu nagáugüe rü waixü̃müte̱xemaxã nügü nigügüeru. Rü ñu̱xmachi yema baú ga Tupanaarü mugüchixü̃pe̱xegu nanangücuchitanü ñu̱xmata nayáuane.

Yema Cuáü̃ nüxü̃ dauxü̃ i yixcüra tá ngupetüxü̃chiga 18:19

Rü norü ngechaü̃maxã nügüétügu tá waixü̃mü nagünagügü, rü tá poraãcü naxauxe, rü tagaãcü ñanagürügü tá: “Nangechaü̃tümüxü̃, nangechaü̃tümüxü̃ ya yima ĩane ya itaxü̃ne. Rü noxri rü norü yemaxü̃gümaxã nügü nimuarü diẽruã̱xẽẽgü ga guxü̃ne ga wapurugüarü yoragü. Natürü i ñu̱xma rü ngürüãchi wüxi i oragutama rü inayarüxo i guxü̃ma i ngẽma.

Yox 19:14

Rü chautanüxü̃ rü chomücügü rü nua choxü̃ nata̱xgümare. Rü yema duü̃xü̃gü ga noxri wüxigu chomaxã chopatawa yexmagüxü̃ rü choxü̃ inarüngümae. Rü ngẽma chauxü̃tagugüxü̃ rü ñoma wüxi i duü̃xü̃ i tama choxü̃ nacua̱xgüxü̃rüxü̃ chomaxã nixĩgü, rü ñu̱xma rü marü tama choxü̃ nacua̱xgü.

Ester 4:1

Rü yexguma Maduquéu nüxü̃ cua̱xgu ga yema unagüxü̃ rü nügü narügáutechiru yerü poraãcü nangechaü̃. Rü yemaca̱x témüxü̃ ga naxchirugu nicu̱x rü tanimacamaxã nügü nagüeru. Rü guma ĩanegu ínayaxüegu rü tagaãcü aita naxü norü ngechaü̃maxã.

2 Chamué 13:36

Rü yexguma yagúegagu ga Yonadá, rü ínangugüama ga ãẽ̱xgacü nanegü. Rü tagaãcü naxauxe. Rü nümata ga ãẽ̱xgacü rü guxü̃ma ga yema norü churaragüerugü rü poraãcü naxauxe.

1 Chamué 11:4

Rü ñuxre ga yema Yabécüã̱x rü guma ĩane ga Guibeá ga Chaú nawa yexmanewa nanangegü ga yema ore. Rü duü̃xü̃gümaxã nüxü̃ nixugüe ga yema Yabéwa ngupetüxü̃. Rü yexguma nüxü̃ naxĩnüegu rü guxü̃ma ga duü̃xü̃gü rü poraãcü naxauxe.

Ãẽ̱xgacügü ga guxchaxü̃güarü mexẽxẽruü̃gü 2:4

Rü yexguma yagúegagu ga yema Tupanaarü orearü ngeruxü̃ i dauxü̃cüã̱x, rü guxü̃ma ga Iraétanüxü̃ rü naxauxe rü tagaãcü aita naxüe.

Naanearü ügüchiga 27:34

Rü yexguma ga Echaú yema nanatü namaxã nüxü̃ ixuxü̃xü̃ naxĩnügu, rü poraãcü naxaxu, rü aita naxüãcüma ñanagürü: —Pa Papax ¡chomaxã rü ta mexü̃ naxuegu! —ñanagürü.

1 Chamué 4:12

Natürü wüxi ga churara ga Bẽyamíü̃tanüxü̃ rü niña ga yema nügü ínadaixü̃wa, rü yematama ngunexü̃gu Chilówa nangu. Rü norü ngechaü̃maxã nügü nayarügáutechiru, rü nügü nabuxeru, rü yemaacü ínangu.

Édra 9:3

Rü yexguma yema orexü̃ chaxĩnügu rü chorü ngechaü̃maxã chaugü charügáutechiru rü chaugü chapuxü̃yae rü chaugü chapuxü̃chinagu, yerü poraãcü chauãẽwa nangu̱x ga yema.