Yox 11:10 - Tupanaarü Ore

¹⁰ Rü ngẽxguma chi Tupana nua ũxgu rü chi cuxü̃ napoxcugu rü cuxna nacagu i curü maxü̃chiga, ¿rü texé tá ítayachaxãchixẽxẽ?

Yox 11:10 Referans Kwoze

Yema Cuáü̃ nüxü̃ dauxü̃ i yixcüra tá ngupetüxü̃chiga 3:7

Rü yema chomaxã idexaxü̃ rü ñanagürü ta: “Chanaxwa̱xe i Filadélfiawa ngẽxmagüxü̃ i yaxõgüxü̃arü ãẽ̱xgacüca̱x cunaxümatü rü ñacurügü tá: ‘Ñaa nixĩ i norü ore ya yimá Üünecü ya aixcüma Cristu ixĩcü. Rü nüma rü ãẽ̱xgacü ya Dabírüxü̃ poracü nixĩ. Rü nüxü̃́ nangẽxma i pora nax yawãxnaãxü̃ca̱x rü nawãxtaãxü̃ca̱x. Rü ngẽxguma texéca̱x yawãxnaãgu, rü taxucürüwama texé tümacha̱xwa tanawãxta. Rü ngẽxguma texécha̱xwa nawãxtaãgu, rü taxucürüwa texé tümaca̱x tayawãxna’.

Yox 12:14

Rü ngẽma Tupana nagu pogüxü̃ rü taxúetama wena tanamexẽxẽ. Rü ñu̱xũchi ngẽma Tupana poxcuxü̃ rü taxúetama wena ítananguxuchixẽxẽ.

Danié 4:35

Rü ngẽma duü̃xü̃gü i ñoma i naanewa maxẽxü̃ rü cupe̱xewa, Pa Tupanax, rü taxuxü̃ma nixĩgü. Rü cuma cunaxwa̱xexü̃ãcü namaxã icucua̱x i dauxü̃guxü̃ i naane rü ñoma i naane. Rü tataxuma ya texé ya curü poraxü̃ rüyexeraxe. Rü tataxuma ya texé ya tüxü̃́ nangẽxmaxe i pora nax cuxna taca̱xaxü̃ rü ‘¿tü̱xcüü̃ cunaxü i ngẽma cuxüxü̃?’ ñachagürü.

Ichaía 41:27

Rü chomatama nixĩ ga noxriarü ügügu Chióü̃maxã nüxü̃ chixuxü̃, rü Yerucharéü̃wa chanamuxü̃ ga wüxi ga orearü uruxü̃ nax natanüxü̃maxã nüxü̃ yanaxuxü̃ca̱x nax paxatáma nawoeguxü̃ ga yema namücügü ga to ga nachixü̃anewa yexmagüxü̃.

Wiyaegü 31:8

Cuma rü taxũtáma chorü uanüme̱xẽgu choxü̃ cunguxẽxẽ. Rü cha̱u̱xca̱x cunamexẽxẽ i wüxi i nachica i taxucürüwama nawa choxna nangugüxü̃.

Yox 38:8

Rü yexguma naanearü aixepewa nagoxü̃chíügu ga dexá i márwa ngẽxmaxü̃ ¿rü texé tixĩxü̃ ga guxema wüxiwatama nayexmaxẽxẽ ga yema dexá?

Yox 34:29

Rü ngẽxguma chi Tupana rüchianegu ¿rü texé tá nüxü̃ tixu nax chixexü̃ taxüxü̃? Rü ngẽxguma duü̃xü̃gücha̱xwa nügü yacu̱xgu ¿rü texé tá nüxü̃ tadauama? Rü nüma nixĩ i nüxna nadauxü̃ ya ĩanegü rü duü̃xü̃gü nax tama namaxã inacua̱xgüxü̃ca̱x i ngẽma ãẽ̱xgacügü i chixexü̃ i duü̃xü̃güxü̃ womüxẽẽxü̃.

Yox 9:4

Rü nüma ya Cori ya Tupana rü naporaxüchi rü ñu̱xũchi nüxü̃ nacua̱xüchi. ¿Rü texé chi Tupanaxü̃ nüxü̃ tarücua̱xmae nax ngẽmaãcü tama tüxna naca̱xaxü̃ca̱x naxca̱x i tümaarü chixexü̃?

Yox 5:18

Rü ngẽxguma chi Tupana cuxü̃ yapi̱xẽẽgu rü chi cuxü̃́ nayana̱i̱x i curü o̱xri. Rü ngẽxguma chi cuxna nacua̱i̱xcaãgu rü chi cuxü̃ nananaxẽxẽ.

Wenaxarü naxümatü ga Tupanaarü mugü 32:30

Rü choma nax Iraétanüxü̃arü poxü̃ruxü̃chire̱x chixĩxü̃ rü ñu̱xma rü norü uanügüaxü̃́ chanatauxchaxẽxẽ nax ngẽmame̱xẽgu nayixü̃ca̱x i ngẽma Iraétanüxü̃. Rü ngẽmaca̱x wüxitama i uanü rü 1,000 i Iraétanüxü̃xü̃ nibuxmüxẽxẽ, rü taxretama i uanügü rü 10,000 i Iraétanüxü̃xü̃ nibuxmüxẽxẽ.

Yox 11:9

Rü ngẽma norü cua̱x rü ñoma i naanearü yexerawa nangu rü ngẽma már arü yexerawa nixĩ i nanguxü̃.

Ichaía 14:27

Rü nüma ya Cori ya Tupana ya Guxãétüwa Ngẽxmacü rü aixcüma tá nayanguxẽxẽ i ngẽma naxüxchaü̃xü̃. Rü taxúetama texé tá nüxna tachogü nax tama naxüaxü̃ca̱x i ngẽma naxüxchaü̃xü̃.