Yox 1:21 - Tupanaarü Ore

²¹ Rü yexguma rü ñanagürü: —Ngexchiruxãcü chauéanüwa chabu nax ñoma i naanewa changóxü̃ca̱x. Rü ngẽxgumarüxü̃ tá ta taxuxü̃táma chinge i ngẽxguma chayu̱xgu. Rü nüma ya Cori ya Tupana choxna nanaxã i guxü̃ma, rü nümatama wena choxna nanayaxu. ¡Namecümaxüchi ya Cori ya Tupana! —ñanagürü.

Yox 1:21 Referans Kwoze

Ngu̱xẽẽtaeruü̃arü ore 5:15

Rü yema taxuxü̃ma ga ta̱xacümaxã ñoma ga naanewa nax nanguxü̃, rü ngẽmaãcü tátama nataegu. Rü yema noxri nabuxgu nax nangexchiruxü̃rüxü̃ tátama nixĩ i ngẽxguma nayu̱xgu. Rü taxuxü̃táma ga yema norü puracütanüwa nayaxuxü̃ rü tá ninge.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:7

Rü yexguma noxri ixíraegu, rü taxuxü̃ma ñoma i naanewa tange. Rü ngẽxguma iyuegu rü taxuxü̃táma tinge.

1 Tesalonicenses 5:18

¡Rü woo ta̱xacü pexü̃ ngupetügu, rü Tupanana moxẽ pexãgü! Erü ngẽma nixĩ ya Tupana naxwa̱xexü̃ nax penaxüxü̃ i pema ya Ngechuchu ya Cristuarü duü̃xü̃gü nax pixĩgüxü̃.

Popera ga Chantiágu ümatüxü̃ 1:17

Erü guxü̃ma i ngẽma aixcüma mexü̃ i tüxna naxãxü̃, rü naxü̃tawa ne naxũ ya Tupana ya daxũgucü ga naxücü ga üa̱xcü rü tauemacü rü woramacurigü rü ẽxtagü. Rü nüma rü guxü̃guma nanaxa̱i̱xrügumaraxü̃ rü taguma naxüchicüü.

Yox 2:10

Natürü ga nüma ga Yox rü ngĩxü̃ nangãxü̃ga rü ñanagürü: —Pa Ngex, tama name i ngẽmaãcü chixexü̃ i oremaxã quidexa. Rü guxü̃guma taãẽãcü tanayaxu i ngẽma mexü̃gü ya Tupana tüxna ãxü̃. ¿Rü ñuxãcü chi i taxũchima nayaxuxü̃ i ngẽma guxchaxü̃gü i taxca̱x ínguxü̃? —ñanagürü. Rü yemaacü ga Yox rü woo yema nüxü̃ nax ngupetüxü̃ rü tama chixexü̃ naxü rü bai ga norü dexawa.

Efesios 5:20

Rü name nixĩ i guxü̃guma tórü Cori ya Ngechuchu ya Cristuégagu Tanatü ya Tupanana moxẽ pexãgü naxca̱x i guxü̃ma i norü ngü̃xẽxẽ.

Ichaía 45:7

Rü choma nixĩ ga chanango̱xẽẽxü̃ ga ngóonexü̃ rü waanexü̃. Rü choma nixĩ i íchananguxẽẽxü̃ i mexü̃ rü guxchaxü̃. Rü chomatama ya Tupana nixĩ i chanaxüxü̃ i guxü̃ma i ngẽma —ñanagürü.

Wiyaegü 49:17

Erü ngẽxguma nayu̱xgux rü taxũtáma ta̱xacü ninge. Rü woo i ngẽma norü meruü̃gü rü taxũtáma naxmaxü̃wa namaxã naxũ.

1 Chamué 2:7

Rü nüma ya Cori ya Tupana rü tüxü̃ nangearü ngẽmaxü̃xã̱xẽxẽ rü ngẽxgumarüxü̃ ta tüxü̃ namuarü ngẽmaxü̃xã̱xẽxẽ. Rü guxchaxü̃ taxca̱x ínangu̱xẽxẽ rü ngẽxgumarüxü̃ ta guxchaxü̃wa tüxü̃ ínanguxuchixẽxẽ.

Auxexü̃chiga 3:38

Rü ngẽma mexü̃gü rü ngẽxgumarüxü̃ ta i ngẽma guxchaxü̃gü rü ínangugü yerü nüma ga Tupana ya Guxü̃étüwa Ngẽxmacü rü woetama yemaacü nanaxuegu.

Ngu̱xẽẽtaeruü̃arü ore 12:7

Rü nawena nax cuyuxü̃ rü cuxune rü tá wenaxarü noxrirüxü̃ waixü̃mü nixĩ. Rü cuãxẽ rü tá Tupanaca̱x nataegu yerü nüma nixĩ ga cuxna naxããxü̃.

Naanearü ügüchiga 3:19

Rü poraãcü tá cupuracü rü cuxaiya nax cuxü̃́ nangẽxmaxü̃ca̱x i cuwemü ñu̱xmatáta cuyu̱x rü ngẽmaãcü wena tá waixü̃müca̱x cutaegu, yerü yemawa cuxü̃ chaxü ga noxrix, rü waixü̃mü quixĩ rü wena táxarü ngẽmaxü̃ quixĩ —ñanagürü ga Tupana.

Ore i mexü̃ ga Matéu ümatüxü̃ 20:15

¿Tama ẽ̱xna name i ngẽma choma chanaxwa̱xexü̃ãcü ngĩmaxã nax chaxüxü̃ i chorü diẽru? ¿Rü ẽ̱xna quixãũxãchi erü ngẽmaãcü chamecüma?” ñanagürü.

Wiyaegü 39:9

Pa Corix, cupe̱xewa rü changea̱x rü taxu ñachagürü, erü cuma nixĩ i namaxã cucuáxü̃ i chorü maxü̃.

Ngechuchuarü ngúexü̃gü ga yamugüxü̃arü puracüchiga 4:28

Rü yemaacü ga yema ãẽ̱xgacügü rü nayanguxẽxẽ ga guxü̃ma ga yema cuma nũxcümama nagu curüxĩnüxü̃ rü nüxü̃ quixuxü̃ rü tá nax yanguxü̃.

Ichaía 42:24

¿Rü texé tixĩ ya guxema tauxcha nüxna ãxẽ ga yema Acóbutanüxü̃arü uanügü nax Iraégüxü̃ naporamaegüxü̃ rü ínayauxü̃ãxü̃? ¿Tama ẽ̱xna Cori ya Tupana yixĩxü̃? Yerü yema Iraétanüxü̃ rü Tupanape̱xewa chixexü̃ naxügü, rü tama Tupana naxwa̱xexü̃ãcü namaxẽ, rü tama naga naxĩnüechaü̃ ga yema norü ngu̱xẽẽtaegü.

Wiyaegü 34:1

Rü guxü̃ i oragu rü Cori ya Tupanamaxã tá mexü̃ chaxuegu, rü cha̱u̱a̱xmaxã rü guxü̃gutáma nüxü̃ chicua̱xüxü̃.

Yox 1:11

¡Rü dücax, nüxü̃ iyanaxoxẽxẽ i guxü̃ma i ngẽma nüxü̃́ ngẽxmaxü̃, rü ngẽxguma tá nüxü̃ cudau nax cupe̱xewatama cumaxã naguxchigaxü̃! —ñanagürü.

1 Chamué 3:18

Rü nüma ga Chamué rü guxü̃xü̃ma Erímaxã nixu rü taxuxü̃ma inicu̱x. Rü nüma ga Erí rü naba̱i̱xãchi rü ñanagürü: —Nüma nixĩ i Cori ya Tupana yixĩxü̃. ¡Ẽcü naxü i ngẽma naxca̱x rümemaexü̃! —ñanagürü.

Naanearü ügüchiga 45:5

Natürü tama chanaxwa̱xe i penaxĩ̱xãchiãẽtanü rü pegüchitama pexaie naxca̱x ga yema chomaxã nax petaxegüxü̃. Yerü Tupana nixĩ ga woetama pepe̱xegu nua choxü̃ mucü nax tama taiyamaxã peyuexü̃ca̱x.

Amúx 3:6

Rü ngẽxguma ĩanewa yacuegüãgu ya cornéta rü ngẽmawa duü̃xü̃gü nüxü̃ nacua̱x nax nangẽxmaxü̃ i ãũcümaxü̃. Rü ngẽxguma ta̱xacürü guxchaxü̃ ngupetügu i ĩanewa rü nüxü̃ tacua̱x nax Cori ya Tupana yixĩxü̃ i ngéma namuxü̃ i ngẽma guxchaxü̃.

Ichaía 24:15

Rü éstewaama rü ñu̱xũchi ngẽma nachixü̃anegü i márpechinüwa ngẽxmagüxü̃wa rü Cori ya Iraétanüxü̃arü Tupanaxü̃ tá nicua̱xüü̃gü.

Ngu̱xẽẽtaeruü̃arü ore 5:19

Rü ngẽxgumarüxü̃ ta ya guxãma ya yíxema Tupana muxü̃ i tümaarü ngẽmaxü̃gü tüxna ãxẽ, rü nüma ya Tupana tüxü̃ namu nax tanangṍxü̃ rü tayaxaxüxü̃ i ngẽma tüxna üxü̃. Erü ngẽma nax poraãcü ipuracüxü̃wa nax nangṍxü̃ rü yaxaxüxü̃, rü Tupanawa ne naxũ.

Norü taxre ga popera ga ãẽ̱xgacügüchiga 20:19

Natürü Echequía rü tama poraãcü naxoegaãxẽ yerü ñaxü̃gu narüxĩnü: —Ñu̱xma nax chamaxü̃gu rü taxũtáma ngẽma nangupetü —ñaxü̃gu narüxĩnü. Rü yemaca̱x Ichaíaxü̃ nangãxü̃ rü ñanagürü: —Cha̱u̱xca̱x name i ngẽma Tupanaarü ore i chomaxã nüxü̃ quixuxü̃ —ñanagürü.

Nüxíraxü̃xü̃ ga popera ga ãẽ̱xgacügüchiga 12:15

Rü yemaacü ga nüma ga ãẽ̱xgacü rü tama yema duü̃xü̃güga naxĩnü yerü woetama Cori ya Tupana rü yemaacü nayaxĩxẽxẽ nax yanguxü̃ca̱x ga norü ore ga Nabáx nane ga Yeruboáü̃maxã nüxü̃ yaxuxü̃ naa̱xwa ga norü orearü uruxü̃ ga Aía ga Chilócüã̱x.

2 Chamué 16:12

Natürü ngẽxguma Cori ya Tupana choxü̃ da̱u̱xgu nax ngúxü̃ chingexü̃, rü bexmana mexü̃maxã tá choxü̃́ nanaxüchicüxü i ñaa chixexü̃ i ñu̱xma nüxü̃ chaxĩnüxü̃ —ñanagürü.

Naanearü ügüchiga 30:2

Natürü nüma ga Acóbu rü ngĩmaxã nanuama rü ngĩxü̃ ñanagürü: —¿Ẽ̱xna cuxca̱x rü Tupana chixĩ i chomax? Rü nüma nixĩ i tama cuxü̃ naxãxãcüxẽẽxü̃ —ñanagürü.

Popera ga Chantiágu ümatüxü̃ 5:11

Yixema rü nüxü̃ tacua̱x nax nataãẽgüxü̃ ga yema duü̃xü̃gü ga mea Tupanaca̱x maxẽãmaxü̃ ga yexguma ngúxü̃ yangegügu. Rü pema nüxü̃ pecua̱x ga ñuxãcü yáxna namaxã naxĩnüxü̃ ga gumá Yox ga yexguma ngúxü̃ yangegügu. Rü nüxü̃ pecua̱x ga ñuxãcü yixcama tórü Cori ya Tupana nüxü̃ rüngü̃xẽẽxü̃. Erü nüma ya tórü Cori ya Tupana rü namecümaxüchi rü poraãcü nüxü̃́ tangechaü̃tümüü̃gü.

Rux 1:21

Ããcume̱xẽãcüma nua íchaxũxũ, rü ngeãcume̱xẽãcüma chataegu, erü ngẽmaãcü nanaxwa̱xe ya Cori ya Tupana. ¿Rü tü̱xcüü̃ Noemímaxã choxü̃ pixu, ega ngẽxguma Cori ya Tupana ya Guxü̃xü̃ma Cuácü choxü̃ poxcuxgu rü ngechaü̃ choxna ãxgu? —ngĩgürügü.

1 Chamué 2:8

Tupana rü tümaarü guxchaxü̃wa tüxü̃ narüngü̃xẽxẽ ya yíxema ngearü diẽruã̱xgüxe. Rü guxchirepáü̃wa tüxü̃ ínayaxuchi ya yíxema diẽruca̱x caxaxü̃wa̱xegüxe rü ãẽ̱xgacüxü̃ tüxü̃ nixĩxẽxẽ nax ngẽmaãcü tachigaxü̃ i yatügütanüwa tarütoxü̃ca̱x rü ãẽ̱xgacütanüwa tangexmaxü̃ca̱x. Erü Cori ya Tupana nixĩ i norü yora i ngẽma nagu naxǘnagüxü̃ i ñoma i naane, yerü nüma nixĩ ga nagu naxǘnagüãxü̃.

Neemía 9:5

Rü ñu̱xũchi yema Lebítanüxü̃ ga Yochué, rü Caxmié, rü Baní, rü Achaxnía, rü Cherebía, rü Odía, rü Chebanía rü Petaía rü duü̃xü̃güxü̃ ñanagürügü: —¡Ẽcü, ipechigü rü ñu̱xma rü guxü̃guma nüxü̃ picua̱xüü̃gü ya Cori ya Tupana! Rü naéga rü naxüüne rü guxü̃étüwa nangẽxma. Rü ngẽmaca̱x name nixĩ i nüxü̃ ticua̱xüü̃gü —ñanagürügü.

Yox 9:12

Rü ngẽxguma chi ta̱xacü nayaxu̱xgu nax noxrü yixĩxü̃ca̱x, ¿rü texé tá ítayachaxãchixẽxẽ? ¿Rü texé tá nüxna taca naxca̱x i ngẽma naxüxü̃?

Wiyaegü 34:2

Rü chauãẽwa Cori ya Tupanaxü̃ chicua̱xüxü̃. Rü ngẽma mexü̃gu rüxĩnüexü̃ rü tá nüxü̃́ naxĩnüe i chorü ore i namaxã nüxü̃ chicua̱xüxü̃, rü tá nataãẽgü.

Ngu̱xẽẽtaeruü̃arü ore 5:14

Erü ngẽxguma tama mea tüxü̃́ ínanguxuchigu ega ta̱xacüca̱x tataxegu, rü ngürüãchi ngẽxma tá nagu̱x i guxü̃ma i tümaarü diẽru. Rü ngẽxguma nangẽxmagu ya wüxi ya tümane, rü taxuxü̃táma naxca̱x ngéma tata̱x.