Yochué 9:3 - Tupanaarü Ore

³ Natürü nüma ga Ebéutanüxü̃ ga ĩane ga Gabaóü̃gu ãchiü̃güxü̃ rü ta nüxü̃ nacuáchigagü ga yema Yochué üxü̃ namaxã ga gumá ĩanegü ga Yericú rü Ái.

Yochué 9:3 Referans Kwoze

Yochué 9:17

Rü yexguma ga ñuxre ga Iraétanüxü̃arü churaragü rü inaxĩãchi nax yema Gabaóü̃cüã̱xgüarü ĩanegüca̱x yadaugüxü̃ca̱x. Rü tomaepü̱x ga ngunexü̃gu norü ĩanegüwa nangugü. Rü gumá norü ĩanegü rü Gabaóü̃ nixĩ, rü Quefirá nixĩ, rü Beerúx nixĩ rü Quiriáx-yearíü̃ nixĩ.

Yochué 9:4

Rü nagu narüxĩnüe nax ñuxãcü womüxẽẽãcüma nügü ínapoxü̃güxü̃. Rü yemaca̱x Yochuéxü̃tawa naxĩ ga ñuxre ga norü duü̃xü̃gü ga ingauxchiruxü̃, rü ingauarü chapatuã́xü̃, rü norü tochicaxü̃ ga búrutawa rü ningau. Rü norü bínuchíü rü marü ñuxgumaxü̃güxü̃ nixĩgü, rü norü paũ rü nichúe. Rü yemagu nügü nicu̱xgü nax ñoma yáxü̃wa ne naxĩxü̃rüxü̃ yixĩgüxü̃ca̱x.

Yochué 9:22

Rü nüma ga Yochué rü naxca̱x naca ga yema Gabaóü̃cüã̱xgü, rü nüxna naca rü ñanagürü: —¿Tü̱xcüü̃ toxü̃ pewomüxẽxẽ nax pema rü nüxü̃ pixuxü̃ nax yáxü̃wa ne pixĩxü̃? Erü pema rü númacüã̱xgütama pixĩgü.

Yochué 11:19

Rü yema duü̃xü̃gü ga ĩane ga Gabaóü̃cüã̱x ga Ebéutanüxü̃xicatama nixĩ ga Iraétanüxü̃maxã nügümaxã namexẽẽgüxü̃ nax tama nügü nada̱i̱xü̃ca̱x. Rü nüma ga Iraétanüxü̃ rü daiwa guxü̃ma ga yema togü ga duü̃xü̃güxü̃ narüporamae.

Yochué 21:17

Rü Bẽyamíü̃tanüxü̃arü ĩanegüwa rü nüxna nanaxãgü ga ĩanegü ga Gabaóü̃, rü Guéba, rü Anató rü Armóü̃. Rü yemaacü 4 nixĩ ga guma ĩanegü ga nüxna naxãgüne norü wocachitaü̃gümaxãchigü.

Yeremía 28:1

Rü yexguma marü ãgümücü ga taunecü Yudáanewa ãẽ̱xgacü yixĩxgu ga Chedequía, rü gumátama taunecüarü wüxime̱e̱xpü̱x ga tauemacügu, rü yema orearü uruxü̃neta ga Ananía ga Achúx nane ga Gabaóü̃arü ĩanecüã̱x rü Yeremíamaxã nidexa ga Tupanapatawa, naxpe̱xewa ga chacherdótegü rü guxü̃ma ga duü̃xü̃güpe̱xewa, rü ñanagürü nüxü̃:

Yochué 10:1

Rü Adonichéde ga Yerucharéü̃arü ãẽ̱xgacü nüxü̃ naxĩnü nax ñuxãcü Yochué rü Áixü̃ yapu̱xü̃ rü yamáaxü̃ ga norü ãẽ̱xgacü rü yanaxoxẽẽãxü̃ ga norü ĩane. Rü yexgumarüxü̃ ta nüxü̃ naxĩnü nax ñuxãcü Yericúxü̃ yapu̱xü̃ rü yamáaxü̃ ga norü ãẽ̱xgacü. Rü ñu̱xũchi nüxü̃ nacuáchiga ga Gabaóü̃cüã̱xgü nax Iraétanüxü̃maxã mexü̃ ga ĩnüwa nangugüxü̃ nax tama namaxã nügü nada̱i̱xü̃ca̱x. Rü yemaca̱x ga nüma ga Yerucharéü̃arü ãẽ̱xgacü rü poraãcü namuü̃ yerü Gabaóü̃ rü wüxi ga ĩane ga taxü̃ne rü porane ga Áiarü yexera ixĩxü̃ne nixĩ, rü norü duü̃xü̃gü rü nipora rü tama namuü̃ewa̱xe.

Yochué 10:28

Rü yematama ngunexü̃gu rü nüma ga Yochué rü norü churaragümaxã nayapu ga guma ĩane ga Machedá rü nagu napogüe rü guxü̃ma ga naãcu rü taramaxã nanadai. Rü yema Yericúarü ãẽ̱xgacüxü̃ yamáxü̃rüü̃ãcütama Machedáarü ãẽ̱xgacüxü̃ nima̱x.

Yochué 10:30

Rü nüma ga Cori ya Tupana rü Iraétanüxü̃me̱xẽgu nananguxẽxẽ ga guma ĩane namaxã ga norü ãẽ̱xgacü. Rü taxuxü̃ma ga ta̱xacü yéma nayaxüxẽẽgü rü taxúema texé tamaxü̃ ga naãcu. Rü yema Yericúarü ãẽ̱xgacüxü̃ yamáxü̃rüü̃ãcütama Lixnáarü ãẽ̱xgacüxü̃ nima̱x.

Yochué 18:25

Rü naétü nüxna naxǘ ga daa ĩanegü: Gabaóü̃, rü Ramá, rü Beerúx, rü Mispá, rü Quefirá rü Mochá, rü Requéü̃, rü Ipeé, rü Tarará, rü Cherá, rü Érex, rü Yebú (Rü to ga naéga rü Yerucharéü̃ nixĩ), rü Guibeá, rü Quiriáx. Rü guxü̃wama rü 14 ga ĩanegü nixĩ rü naétü ga norü ĩanexacügü. Rü yema nixĩ ga yema naane ga Bẽyamíü̃tücumüna üxü̃ naxẽ̱xpü̱x nax ñuxre yixĩxü̃ ga natanüxü̃.

2 Chamué 2:12

Rü nüma ga Abnéx ga Néx nane rü wüxi ga ngunexü̃gu Ibóchexarü churaragümaxã Maanaíü̃wa inaxĩãchi rü Gabaóü̃wa naxĩ.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 12:4

Rü to ga natanüxü̃maxã icuáxü̃ nixĩ ga Imaía ga Gabaóü̃cüã̱x. Rü nüma rü yema 30 ga churaragü ga tama muü̃wa̱xegüxü̃tanüwa naxü rü namaxã inacua̱x. Rü togü ga Dabíwe rüxĩxü̃ nixĩ ga Yeremía, rü Yaachié, rü Yoanáü̃, rü Yochabá ga Guederácüã̱x,

Norü taxre ga to ga popera ga ãẽ̱xgacügüchiga ümatüxü̃ 1:3

Rü yexguma marü yexma nangutaque̱xegügu ga yema ãẽ̱xgacügü, rü nüma ga Charomóü̃ rü namaxã Gabaóü̃wa naxũ, yerü yéma nayexma ga guma Tupanapata ga naxchirunaxca̱x ga nũxcüma Tupanaarü duü̃ ga Moiché chianexü̃gu naxüxü̃ne.