Yochué 6:5 - Tupanaarü Ore

⁵ Rü ngẽxguma nüxü̃ pexĩnüegu nax poraãcü yacuegüãxü̃ ya carnéruchatacu̱xregü rü tá tagaãcü aita pexüe. Rü ngẽxguma i norü poxeguxü̃ ya yima ĩane rü tá nangĩãchi. Rü ngẽxgumayane rü wüxichigü i pemax rü tá nagu pichocu ya yima ĩane —ñanagürü ga Tupana.

Yochué 6:5 Referans Kwoze

Popera ga Yudíugü ga yaxõgüxü̃ca̱x ümatüxü̃ 11:30

Rü yema Iraétanüxü̃ rü Tupanaaxü̃́ nayaxõgü rü yemaca̱x 7 ga ngunexü̃ nüxü̃ ínichoeguãchitanücüü ga guma ĩane ga Yericú. Rü yexguma norü 7 ga ngunexü̃wa nanguxgu rü gumá ĩanetapü̱xgü rü nüechama niwa̱xgü.

Ínachoxü̃xü̃chiga 19:19

Rü yema naga ga nacornétagaraü̃xü̃ rü yexeraãcü nitagachigü. Rü nüma ga Moiché rü Tupanamaxã nidexa, rü nüma ga Tupana rü nanangãxü̃. Rü yema naga ga Tupana rü ñoma duruanexü̃rüxü̃ nixĩ.

1 Chamué 17:52

Rü yexguma ga Iraéanecüã̱xgüarü churaragü rü Yudátanüxü̃ ga churaragü rü aita naxüe yerü marü Firitéugüxü̃ narüporamaegü. Rü nawe nangẽgü ñu̱xmata ĩanegü ga Gáx rü Ecróü̃arü ũũchiwa. Rü yema Firitéugüarü churaragü ga yuexü̃ rü nanuquegü nawa ga yema nama ga Chaaraíü̃wa ne daxü̃ rü ñu̱xmata ĩanegü ga Gáx rü Ecróü̃wa nguxü̃.

1 Chamué 17:20

Rü moxü̃ãcü ga nüma ga Dabí rü yexwacax yangóonechaü̃gu rü to ga daruü̃me̱xẽgu tüxü̃ namugü ga guxema nanatüarü carnérugü, rü inaxũãchi. Rü nayana ga yema õna ga nanatü ga Ichaxí nüxna naxü̃. Rü yéma naenexẽgü íyexmagüxü̃wa nangu ga yexguma yema churaragü inaxĩãchichaü̃gu ga Firitéugümaxã nügü nax nada̱i̱xü̃ca̱x. Rü tagaãcü nügü naxãũxũnegü.

1 Chamué 4:5

Rü yexguma yema Iraéanearü churaragü ípegüxü̃wa nanguxgu ga yema baú ga Tupanaarü mugüchixü̃, rü nüma ga Iraétanüxü̃ rü taãẽmaxã poraãcü aita naxüe ñu̱xmata waixü̃mügu yaxũgagü.

Yochué 6:20

Rü yexguma ga nüma ga yema duü̃xü̃gü rü aita naxüe rü ga carnéruchatacu̱xregü rü naxãgatanüãchi. Rü yexguma guma carnéruchatacu̱xregügaxü̃ naxĩnüegu ga nüma ga Iraétanüxü̃ rü inanaxügüe nax poraãcü aita naxüexü̃. Rü yexguma ga guma ĩanearü poxeguxü̃ rü niwa̱xtapü̱x. Rü yexguma ga nüma ga Iraétanüxü̃ rü yexma nachocu rü namaxã inacua̱xgü.

Yochué 6:16

Rü yexguma yema chacherdótegü marü 7 e̱xpü̱xcüna norü carnéruchatacu̱xregügu yacuegügu, rü nüma ga Yochué rü yema duü̃xü̃güxü̃ namu rü ñanagürü: —¡Aita pexüe! Rü nüma ya Cori ya Tupana rü marü pexme̱xgu nananguxẽxẽ ya daa ĩane.

Yeremía 50:15

¡Rü norü guxü̃cüwawa ya yima ĩane ya Babirónia rü daimaxã tagaãcü aita pexüe! Rü nüma i Babiróniacüã̱x rü marü pexme̱xgu nayi. Rü norü poxü̃chicaxü̃gü rü marü niwa̱xgü. Rü norü ĩanearü poxeguxü̃tápü̱xgü rü ta rü niwa̱xgü. Rü ngẽma nixĩ i chorü numaxã namaxã chaxüxü̃. ¡Rü yema Babirónia togü ga nachixü̃anegümaxã naxüxü̃rüxü̃ namaxã penaxü̱x i pema!

Ichaía 30:25

Rü ngẽxguma ínanguxgu i ngẽma ngunexü̃ i nagu Cori ya Tupana tá tümaarü uanüxü̃ daixü̃ rü yima ĩanearü poxeguxü̃ tá niwa̱xgü. Rü guxü̃nema ya itaxü̃ne ya ma̱xpǘnegüwa rü ngüchitaeruxü̃wa tá inarüyaegü i natügü rü dexá i poraü̃chiüxü̃.

Ichaía 25:12

Rü nüma ya Cori ya Tupana rü tá nayawa̱xgüxẽxẽ i norü ĩanetapü̱xgü i máchanexü̃ rü taixü̃. Rü natüchi rü waixü̃müanewa tá ninuagümare.

Yochué 6:4

Rü ngẽma baú i chorü mugü nawa ngẽxmaxü̃pe̱xegu tá naxĩ i 7 i chacherdótegü i carnéruchata̱xcuxremaxã icornétaã́xü̃. Rü ngẽxguma norü 7 i ngunexü̃wa nanguxgu, rü 7 e̱xpü̱xcüna tá yima ĩanexü̃ ípeyachoegu. Rü ngẽxguma tá nixĩ i ngẽma chacherdótegü rü tá norü carnéruchatacu̱xregu yacuegüxü̃.

Yochué 6:6

Rü yexguma ga nüma ga Yochué rü chacherdótegüca̱x naca rü ñanagürü nüxü̃: —¡Peyange i ngẽma baú i Cori ya Tupanaarü mugüchixü̃! Rü 7 i pemax rü ngẽma baúpe̱xegu tá pexĩ namaxã ya perü carnéruchatacu̱xregü —ñanagürü.

Ãẽ̱xgacügü ga guxchaxü̃güarü mexẽxẽruü̃gü 20:37

Rü yema Iraétanüxü̃arü churaragü rü ngürüãchimare Guibeáca̱x ínayaxüãchi rü taramaxã nanadai ga guxü̃ma ga yema duü̃xü̃gü ga guma ĩanewa maxẽxü̃.