Yochué 4:3 - Tupanaarü Ore

³ ¡Rü namaxã nüxü̃ ixu rü wüxichigü i ngẽma yatü rü wüxipüta ya nuta nayauxã i ngẽma natüarü ngãxü̃tamawa i ngẽma chacherdótegü íchigüxü̃wa ngẽxmagücü. Rü chanaxwa̱xe i ngẽma ñoma i chütaxü̃gu ínapegüxü̃gu nayanupüta! —ñanagürü.

Yochué 4:3 Referans Kwoze

Yochué 4:8

Rü nümagü ga yema 12 ga yatügü rü nanaxügü ga yema Yochué namaxã nüxü̃ ixuxü̃. Rü wüxichigü, rü wüxipüta niyauxchigü naégagu ga yema Iraétücumü ga nawa naxüxü̃. Rü yemaacü nanayauxgü ga 12 ga nutagü ga Yudáü̃tamawa. Rü yema ínapegüxü̃wa nanana, rü yexma nayanu, yema Cori ya Tupana nüxü̃ ixuxü̃rüxü̃.

Yochué 3:13

Rü ngẽxguma ngẽma chacherdótegü i ngẽma baú i Cori ya Tupanaarü mugüchixü̃ ingegüxü̃ rü natü i Yudáü̃chíüwa nachiü̃gu, rü ngẽxguma tá nixĩ i ngẽma natü rü taxregu yayauxyexü̃chíüxü̃, rü ngẽma dexá i dauxquena ne yáxü̃ rü tá ínayachaxãchi, rü ñoma yapoxyepe̱xexü̃rüxü̃ tá nixĩ —ñanagürü.

Ore i mexü̃ ga Luca ümatüxü̃ 19:40

Natürü Ngechuchu nanangãxü̃ rü ñanagürü nüxü̃: —Pemaxã nüxü̃ chixu rü ngẽxguma chi iyanangea̱xgügu i ñaa duü̃xü̃gü, rü daa nutagü ya namacüwawa ngẽxmagücü rü chi nüxĩ́ aita naxüe —ñanagürü.

Wiyaegü 103:2

Rü guxü̃ma i chorü ĩnümaxã tá nüxü̃ chicua̱xüxü̃ ya Cori ya Tupana rü taxũtáma nüxü̃ icharüngüma i norü ngü̃xẽẽgü i cha̱u̱xca̱x naxüxü̃ rü bai i wüxi.

Wiyaegü 11:4

Natürü nüma ya Cori ya Tupana rü napata ya üünenewa nangẽxma. Rü nüma ya Cori rü daxũguxü̃ i naanewa nüxü̃́ nangẽxma i norü tochicaxü̃, rü ngéma meama ínadawenü rü nanangugü i duü̃xü̃gü.

1 Chamué 7:12

Yemawena ga Chamué rü wüxi ga nuta nayaxu, rü ĩane ga Mispá rü ĩane ga Chéü̃arü ngãxü̃gu nanaxǘ ga gumá nuta. Rü Ebéü̃-échegu nanaxüéga. Rü ñu̱xũchi ñanagürü: —Nüma ya Cori ya Tupana rü ñu̱xmarüta taguma nüxü̃ narüchau nax tüxü̃ nangü̃xẽẽxü̃ —ñanagürü.

Yochué 24:27

Rü yexguma nüma ga Yochué rü duü̃xü̃güxü̃ ñanagürü: —Daa nuta tá nixĩ ya tórü cua̱xruxü̃ ixĩcü nax marü nüxü̃ ixĩnüexü̃ i guxü̃ma i ngẽma Cori ya Tupana tamaxã nüxü̃ ixuxü̃. Natürü daa nuta tá nixĩ ya pexü̃ ixugücü ega taxũtáma peyanguxẽẽ̱xgu i ngẽma Tupana pemaxã nüxü̃ ixuxü̃ —ñanagürü ga Yochué.

Naanearü ügüchiga 28:22

Rü daa nuta ya cua̱xruü̃xü̃ nua chatoxẽẽcü, rü Tupanapata tá nixĩ. Rü dücax, Pa Tupanax, rü guxü̃ma i chorü ngẽmaxü̃gü i choxna cuxãxü̃wa rü guxü̃gutáma cuxna chanaxã i ngẽma diésmu i cuxna üxü̃ —ñanagürü.

Yochué 4:4

Rü yexguma ga nüma ga Yochué rü naxca̱x naca ga yema 12 ga yatü ga nüxü̃ naxunetaxü̃ rü ñanagürü nüxü̃: —¡Ẽcü, wüxichigü i pemax i 12 rü natü i Yudáü̃arü ngãxü̃tamawa pexĩ! ¡Rü ngẽma baú i Cori ya tórü Tupanaarü mugüchixü̃pe̱xewaama, rü wüxichigü i pema rü peatügu peyange ya wüxi ya nuta nax nae̱xpü̱x yixĩxü̃ca̱x i ngẽma 12 tücumügü i Iraétanüxü̃!