Yochué 24:7 - Tupanaarü Ore

⁷ Rü nüma ga perü o̱xigü rü cha̱u̱xca̱x nacagü, rü yemaca̱x ga naweama rü chanaxẽanexẽxẽ naxcha̱xwa ga Equítuanecüã̱xgü. Rü yexgumarüxü̃ ta chanaxü nax már arü dexá naétügu iñaxü̃chiüxü̃ca̱x ga yema Equítuanecüã̱xgü nax yexma nayi̱xixü̃ca̱x. Rü pematama nixĩ i nüxü̃ pedauxü̃ ga yema chaxüxü̃ ga yexguma. Rü ñu̱xũchi ga pemax ga Iraétanüxü̃ rü yema ínanaxnücüanexü̃wa ga taxúema íxãpataxü̃wa peyexmagü mucüma ga taunecü.

Yochué 24:7 Referans Kwoze

Wenaxarü naxümatü ga Tupanaarü mugü 4:34

¿Rü nangẽxmaxü̃ i ta̱xacürü tupana i guxü̃ i nachixü̃anegütanüwa ínanguxü̃xẽxẽxü̃ i wüxitücumü i duü̃xü̃gü nax norü duü̃xü̃gü yaxĩgüxü̃ca̱x? Natürü nüma ga Cori ya perü Tupana rü Equítuanewa pexü̃ ínagaxü̃ naétüwa ga muxü̃ma ga guxchaxü̃gü. Rü inanawe̱x ga norü pora ga yexguma inawéãgu ga cua̱xruü̃gü rü taxü̃ ga mexü̃gü rü ãũcümaxü̃gü rü daigü ga pepe̱xewa Equítuanewa pexca̱x naxüxü̃.

Ínachoxü̃xü̃chiga 14:20

Rü yemaacü ga yema caixanexü̃ rü Equítuanecüã̱xgü rü Iraétanüxü̃arü ngaxü̃wa nixüãchi. Rü yema Equítuanecüã̱xgüca̱x rü nanaxẽanexẽxẽ natürü Iraétanüxü̃ca̱x rü nanangóonexẽxẽ. Rü yemaca̱x nixĩ ga Equítuanecüã̱xgü ga taxucürüwama Iraétanüxü̃xü̃ iyangaugüxü̃ ga yema chütaxü̃gu.

Ínachoxü̃xü̃chiga 14:10

Rü yexguma yema Iraétanüxü̃ rü yáxü̃gu nüxü̃ nadaugügu ga Faraóü̃ rü norü churaragü, rü norü cowarugü ga yéma ne naxĩxü̃, rü poraãcü namuü̃e. Rü Cori ya Tupanana nacagü nax nüxü̃ nangü̃xẽẽxü̃ca̱x.

Ínachoxü̃xü̃chiga 14:31

Rü nüma ga Iraétanüxü̃ rü yexguma nüxü̃ nadaugügu ga yema Cori ya Tupana norü poramaxã Equítuanecüã̱xgümaxã naxüxü̃, rü Cori ya Tupanaxü̃ nicua̱xüü̃gü rü aixcüma nüxü̃́ nayaxõgü. Rü yexgumarüxü̃ ta nüxü̃́ nayaxõgü ga guma Moiché ga Tupanaarü duü̃ ixĩcü.

Yochué 5:6

Yema Iraétanüxü̃ ga Equítuanewa íchoxü̃xü̃ rü 40 ga taunecü nixĩ ga yema ínachianexü̃gu naxĩxü̃. Rü guxü̃ma ga yema iyatüxü̃ ga marü churarawa imexü̃ ga yexguma Equítuanewa ínachoxü̃gu rü namagu nixĩ ga nayuexü̃. Rü yema duü̃xü̃gü rü tama Cori ya Tupanaga naxĩnüechaü̃, rü yemaca̱x nüma ga Tupana rü namaxã nanaxuegu nax taxũtáma nüxü̃ nadaugüxü̃ ga yema naane ga norü o̱xigümaxã naxueguxü̃ i ngextá lechi rü berure taguma ítaxuxü̃wa ñoma dexá iyaxü̃rüxü̃.

Wenaxarü naxümatü ga Tupanaarü mugü 29:2

Rü nüma ga Moiché rü nanangutaque̱xexẽxẽ ga guxü̃ma ga Iraétanüxü̃ rü ñanagürü nüxü̃: —Pema rü marü nüxü̃ pedau ga guxü̃ma ga yema Cori ya Tupana Equítuanewa Faraóü̃maxã rü norü ngü̃xẽẽruü̃gümaxã rü ñu̱xũchi guxü̃ma i norü duü̃xü̃gümaxã naxüxü̃.

Wenaxarü naxümatü ga Tupanaarü mugü 1:46

Rü yemaca̱x ga pema rü muxü̃ma ga ngunexü̃gü Cadéanewa peyexmagü —ñanagürü ga Moiché.

Popera ga Yudíugü ga yaxõgüxü̃ca̱x ümatüxü̃ 3:17

¿Rü texémaxã nixĩ ga nanuxü̃ ga Tupana ga 40 ga taunecü? Rü pemaxã nüxü̃ chixu rü namaxã nanu ga yema duü̃xü̃gü ga chixexü̃ ügüxü̃. Rü yemaca̱x yema chianexü̃gu nayue.

Wenaxarü naxümatü ga Tupanaarü mugü 2:14

Rü yema ngunexü̃ ga Cadé-banéawa nagu ixĩãchixü̃gu rü ñu̱xmata yema ngunexü̃ ga natüacü ga Chérexwa nagu ichoü̃xü̃gu rü 38 ga taunecü marü ningu. Rü gumá 38 ga taunecügügu nixĩ ga yoxni nayuexü̃ ga guxü̃ma ga yema yatügü ga daiwa imexü̃, yema Cori ya Tupana namaxã naxueguxü̃rüxü̃.