Yochué 20:8 - Tupanaarü Ore

⁸ Rü natü ga Yudáü̃arü tocutüwa ga metachinüxü̃ ga naxnücüane ga Yericúarü éstewaama rü nüxü̃ naxunetagü ga Béche ga Rubéü̃tanüxü̃arü naanewa yexmane. Rü Gáxtanüxü̃arü naanewa rü nüxü̃ naxuneta ga Ramóx ga Garaáxanewa yexmane. Rü Manachétanüxü̃arü naanewa rü nüxü̃ naxuneta ga Goráü̃ ga Bacháü̃anewa yexmane.

Yochué 20:8 Referans Kwoze

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 6:78

Rü Rubéü̃tanüxü̃arü naane ga natü ga Yudáü̃arü éstewaama yexmaxü̃ ga Yericúarü to̱xma̱xtawa rü nüxna nanaxãgü ga ĩanegü ga Béche ga naxnücüanewa yexmane, rü Yaácha, rü Caremóx rü Mepáax, guxü̃nema ga norü naxü̃nachitaxü̃gümaxã.

Yochué 21:36

Rü Rubéü̃tanüxü̃arü ĩanegütanüwa rü nüxna nanaxãgü ga daa ĩanegü: Béche norü wocachitaü̃gümaxã, rü Yaácha norü wocachitaü̃gümaxã, rü Caremóx norü wocachitaü̃gümaxã, rü Mepáax norü wocachitaü̃gümaxã. Rü guxü̃wama rü 4 ga ĩanegü nixĩ ga nüxna naxãgüne norü wocachitaü̃gümaxãchigü.

Yochué 21:38

Rü Gáxtanüxü̃arü ĩanegütanüwa rü nüxna nanaxãgü ga daa ĩanegü: Ramóx ga ĩane ga cu̱xchicaruxü̃ ixĩxü̃ne ga Garaáxanewa yexmane, rü ñu̱xũchi Maanaíü̃, rü Ebóü̃, rü Yachéx. Rü 4 ga ĩanegü nixĩ ga nüxna naxãgüne norü wocachitaü̃gümaxãchigü.

Yochué 21:27

Rü ngãxü̃tücumü ga Manachétanüxü̃arü ĩanegüwa rü yema Lebítanüxü̃ ga Guerchóü̃taagüna nanaxã ga taxre ga norü ĩanegü namaxã ga norü wocachitaü̃güchigü. Rü daagü nixĩ: Goráü̃ ga ĩane ga Bacháü̃anewa ngẽxmane ga cu̱xchicaruxü̃ ixĩxü̃ne, rü ñu̱xũchi Beeterá.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 6:80

Rü Gáxtanüxü̃arü naanewa nüxna nanaxãgü ga ĩanegü ga Ramóx ga Garaáxanewa yexmane, rü ñu̱xũchi Maanaíü̃, rü Ebóü̃ rü Yachéx, guxü̃nema ga norü naxü̃nachitaxü̃gümaxã.

Nüxíraxü̃xü̃ ga popera ga ãẽ̱xgacügüchiga 22:6

Rü nüma ga Iraéanecüã̱xarü ãẽ̱xgacü rü nanangutaque̱xexẽxẽ ga wixgutaa̱x 400 ga orearü uruü̃gü ga nüxü̃́ nayaxõxü̃. Rü yemagüna naca rü ñanagürü: —¿Marü namexü̃ yixĩxü̃ rüe̱xna tama nax napuxü̃ ya yima ĩane ya Ramóx ya Garaáxanewa ngẽxmane? —ñanagürü. Rü yema orearü uruü̃gü rü nanangãxü̃gü rü ñanagürügü: —Marü name i naxca̱x ípeyaxüãchi nax peyapuxü̃ca̱x erü Cori ya Tupana rü marü cuxna nanaxã —ñanagürügü.

Wenaxarü naxümatü ga Tupanaarü mugü 4:43

Rü daagü nixĩ ga guma ĩanegü ga cu̱xchicaxü̃ruxü̃ ixĩgüne: Rü wüxi nixĩ ga guma ĩane ga Rubéü̃tanüxü̃ca̱x ixĩxü̃ne. Rü guma nixĩ ga Béche ga chianexü̃arü metachinüxü̃wa yexmane. Rü nai nixĩ ga guma ĩane ga Gáxtanüxü̃ca̱x ixĩxü̃ne, Rü guma nixĩ ga Ramóx ga Garaáxanewa yexmane. Rü nai nixĩ ga guma ĩane ga ngãxü̃tücumü ga Manachétanüxü̃ca̱x ixĩxü̃ne. Rü guma nixĩ ga Goráü̃ ga Bacháü̃anewa yexmane.

Wenaxarü naxümatü ga Tupanaarü mugü 3:10

Rü yemaacü taxme̱xgu nayi ga guxü̃nema ga guma ĩanegü ga ãẽ̱xgacü ga Óx namaxã icuáxü̃ne ga ma̱xpǘnearü doxonexü̃chitaeruwa yexmagüne rü Garaáxanewa yexmagüne rü Bacháü̃anewa yexmagüne rü ñu̱xmata Chacáwa rü Edréiwa nangu.

Yochué 20:7

Rü ñu̱xũchi ga nüma ga Iraétanüxü̃ rü nüxü̃ naxunetagü ga tomaepü̱x ga ĩanegü nax cu̱xchicaxü̃ruü̃gü yaxĩgüxü̃ca̱x: Rü wüxi nixĩ ga Quédex ga Gariréawa ga Netaríarü ma̱xpǘneanewa yexmane, rü nai nixĩ ga Chiquéü̃ ga Efraíü̃arü ma̱xpǘneanewa yexmane, rü nai nixĩ ga Quiriáx-abá ga Yudáarü ma̱xpǘneanewa yexmane. (Rü guma ĩane rü to ga naéga rü Ebróü̃ nixĩ.)

Yochué 20:9

Rü gumagü nixĩ ga ĩanegü ga nüxü̃ naxunetagüne nax cu̱xchicaxü̃ruxü̃ yaxĩgüxü̃ca̱x naxca̱x ga guxü̃ma ga Iraétanüxü̃ rü yema duü̃xü̃gü ga to ga nachixü̃anecüã̱xgü ga yexma Iraétanüxü̃tanügu ãchiü̃güxü̃. Rü guma ĩanegü nixĩ ga mexü̃ne nax nagu yacúxü̃ ga yema toguxexü̃ ima̱xcüraxü̃xü̃, nax yemaacü tama yama̱xgüãxü̃ca̱x ga yema yuxü̃tanüxü̃ naxü̃pa nax duü̃xü̃güpe̱xewa nagagüãxü̃ nax nüxna nacagüxü̃ca̱x.

Norü taxre ga popera ga ãẽ̱xgacügüchiga 8:28

Rü nüma ga Ocochía rü Acáx nane ga Yoráü̃na naxu nax nügü nangü̃xẽẽgüxü̃ca̱x nax Chíriaanearü ãẽ̱xgacü ga Achaémaxã nügü nada̱i̱xü̃ca̱x nawa ga guma ĩane ga Ramóx ga Garaáxanewa yexmane. Natürü ga Chíriaanecüã̱xgü rü Yoráü̃xü̃ nayapi̱xẽẽgü.