Yochué 20:3 - Tupanaarü Ore

³ Rü ngẽxguma wüxíe rü toguxexü̃ tima̱xcüraü̃gu rü tama ma̱xgu tümamaxã tarüxĩnügu, rü name nixĩ i tiña nax wüxi ya yima ĩane ya cu̱xchicaxü̃ruü̃wa tañaxü̃ca̱x rü ngẽxma tayarücúxü̃ca̱x, nax ngẽmaãcü tama tüxü̃ yama̱xgüxü̃ca̱x i ngẽma natanüxü̃ i ngẽma duü̃xü̃ i tima̱xcüraxü̃xü̃.

Yochué 20:3 Referans Kwoze

Lebítanüxü̃arü puracüchiga 4:2

—¡Iraétanüxü̃maxã nüxü̃ ixu, rü ngẽxguma texé ngürüãchi tümaechita chixexü̃ ücüraxü̃gu rü tama tayangu̱xẽẽgu i ngexü̃rüüxü̃ i chorü mugü, rüe̱xna tanaxü̱xgu i ngẽma choma chachu̱xuxü̃, rü ñaãcü tá nixĩ i tanamexẽẽxü̃ i tümaarü guxchaxü̃:

Iraétanüxü̃arü muxchiga 35:12

Rü ngẽxma tá nixĩ i tayarücúxü̃ ya yíxema máetacüraxü̃xe naxcha̱xwa i ngẽma yuxü̃tanüxü̃ i ütanüchaü̃güxü̃. Rü taxũtáma yaxtacüma tüxü̃ nima̱xgü naxü̃pa nax duü̃xü̃güpe̱xewa tüxü̃ nagagüxü̃ nax mea tüxna nacagüxü̃ca̱x rü nüxü̃ tixuxü̃ca̱x nax tama woetama tayamáxü̃.

Yochué 20:4

Rü yíxema nagu yarücúxe ya wüxi ya yima ĩanegü ya cu̱xchicaxü̃ruxü̃ ixĩgüne, rü ngẽxguma yima ĩanearü ĩã̱xwa tanguxgu, rü yima ĩanearü ãẽ̱xgacügümaxã tá tügü tixu. Rü ngẽxguma i nüma i ngẽma ãẽ̱xgacügü rü tá tüxü̃ nimucuchigü rü tá tüxna nanaxã i wüxi i tümachica i nagu tá taxãchiü̃xü̃.

Iraétanüxü̃arü muxchiga 35:19

Rü ngẽma tümatanüxü̃ ya yíxema yuxe, rü tá nayama̱x i ngẽma tüxü̃ imáxü̃ ega nüxü̃ iyangauxgu.

Iraétanüxü̃arü muxchiga 35:22

Natürü ngẽxguma wüxíe toguxexü̃ cuxnetacüraxü̃gu rü tayu̱xgu rü taxũtáma tümagagu nixĩ. Rü ngẽxguma wüxíe ta̱xacü tüxü̃ ñaxcüraxü̃gu rü tayu̱xgu rü taxũtáma tümagagu nixĩ. Rü ngẽxguma wüxíe togueétügu nuta tanguxẽẽcüraxü̃gu, rü tayu̱xgu, rü taxũtáma tümagagu nixĩ. Erü tamachire̱x tügüarü uanü tixĩ rü tama nagu tarüxĩnüãcüma tüxü̃ tayuxẽxẽ.

2 Chamué 14:11

Natürü ga ngĩma rü nüxna iyacachigüama rü ngĩgürügü: —Cuxna naxca̱x chaca, Pa Ãẽ̱xgacüx, nax curü Cori ya Tupanana cucaxü̃ nax tama chaunexü̃ yamáxü̃ i ngẽma chautanüxü̃ i naxütanüchaü̃xü̃ ya yimá chaune ya yucü. Erü ngẽxguma yamáagu ya yimá nai ya chaune rü tá nayexera i ngẽma guxchaxü̃ —ngĩgürügü. Rü nüma ga ãẽ̱xgacü rü aixcüma ngĩmaxã nüxü̃ nixu rü ñanagürü: —Cori ya Tupanape̱xewa cumaxã nüxü̃ chixu rü bai tá i wüxi i nayae i waixü̃mügu nguxü̃ ya yima cune —ñanagürü.

Popera ga Yudíugü ga yaxõgüxü̃ca̱x ümatüxü̃ 6:18

Rü nüxü̃ tacua̱x rü ngẽxguma ta̱xacüca̱x nügüégagu inaxunetagu ya Tupana, rü taxucürüwama tüxü̃ nawomüxẽxẽ rü nanaxüchicüü i ngẽma. Rü ñu̱xma i guxãma i yixema nax Tupanaarü ngü̃xẽẽca̱x idauxü̃ nax tüxü̃ ínapoxü̃xü̃ca̱x, rü tüxü̃́ nangẽxma i taxü̃ i taãxẽ, erü nüxü̃ tacua̱x rü aixcüma tá tanayaxu i ngẽma maxü̃ i taguma gúxü̃ i tamaxã inaxunetaxü̃.