Yochué 15:13 - Tupanaarü Ore

¹³ Rü nüma ga Yochué rü Yudátanüxü̃arü naanewa nixĩ ga Caréx ga Yeponé nanena tanaxãxü̃ ga naane. Yerü yemaacü nixĩ ga Cori ya Tupana ga namuaxü̃. Rü guma ĩane ga nüxna naxãxü̃ne nixĩ ga Quiriáx-abá. Rü to ga naéga nixĩ ga Ebróü̃. Rü noxri guma nixĩ ga Anáxarü ĩane ga taxü̃ne ga nawa nayexmagüne ga nataagü.

Yochué 15:13 Referans Kwoze

Iraétanüxü̃arü muxchiga 13:30

Rü yexguma yema ngugütaeruxü̃ ga Caréx rü nanachianexẽxẽ ga yema duü̃xü̃gü ga Moichépe̱xewa yexmagüxü̃ rü ñanagürü: —¡Ngĩxã tóxrüxü̃ tayaxĩxẽxẽ i ngẽma naane, erü yixema rü tüxü̃́ natauxcha nax tóxrüxü̃ yaxĩxẽẽxü̃! —ñanagürü.

Iraétanüxü̃arü muxchiga 13:6

rü Yudátanüxü̃wa inamuãchi ga Caréx ga Yeponé nane,

Yochué 21:11

Yema Yudátanüxü̃arü naane ga ínamáxpü̱xanexü̃wa nüxna nanaxã ga guma ĩane ga Quiriáx-abá guxü̃ma ga norü wocachitaü̃gümaxã. Rü guma ĩane nixĩ ga tachanexü̃ ga yatü ga Anáxtaagüarü ĩane ga taxü̃ne. (Rü Ebróü̃ nixĩ ga to ga naéga.)

Ãẽ̱xgacügü ga guxchaxü̃güarü mexẽxẽruü̃gü 1:10

Rü yexgumarüxü̃ ta nanadai ga yema Canaáü̃tanüxü̃ ga Ebróü̃gu ãchiü̃güxü̃. Rü guma ĩane rü noxri rü Quiriáx-abágu naxãéga. Rü yexma nixĩ ga nadaiaxü̃ ga ãẽ̱xgacügü ga Chechái rü Aimáü̃ rü Tarmái.

1 Chamué 25:3

Rü yema yatü rü Nabáx nixĩ ga naéga rü Caréxtanüxü̃ nixĩ. Rü nüma rü tama cua̱x nüxü̃́ nayexma rü nachixecüma. Natürü ngĩma ga naxma̱x ga Abigái rü imexẽchi rü cua̱x ngĩxü̃́ nayexma.

1 Chamué 30:14

Natürü naxü̃pa ga nax chida̱xawexü̃ rü Queretéugüarü naane i súrwaama ngẽxmaxü̃wa taxĩ rü tanadeãcu. Rü yexgumarüxü̃ ta tanadeãcu ga Yudátanüxü̃arü naanewa rü Caréxtanüxü̃arü naanewa. Rü ñu̱xũchi tayagu ya yima ĩane ya Chicáx —ñanagürü.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 6:56

Natürü Caréx ga Yeponé nanena nanaxãgü ga yema naanegü ga ĩanearü yáxü̃waxü̃ra yexmagüxü̃ rü ñu̱xũchi guma ĩanexacügü ga Ebróü̃arü ngaixcamana yexmagüne.

Naanearü ügüchiga 13:18

Rü yexguma ga Abráü̃ rü inaxũãchi. Rü Mamréarü castañanecügu nayaxãchiü̃ ga ĩane ga Ebróü̃arü ngaicamana. Rü yexma nanaxü ga wüxi ga ãmarearü guruxü̃ nax yéma Cori ya Tupanaxü̃ yacua̱xüxü̃xü̃ca̱x.

Yochué 11:21

Rü yexguma nixĩ ga Yochué ga nadaiãcuãxü̃ ga norü ĩanegü ga Anátanüxü̃ ga ma̱xpǘne ga Ebróü̃gu ãchiü̃güxü̃ rü Debíxgu rü Anáxgu ãchiü̃güxü̃, rü guxü̃nema ga guma ma̱xpǘnegü ga Yudáanewa yexmagünegu, rü Iraéanewa yexmagünegu ãchiü̃güxü̃.

Yochué 20:7

Rü ñu̱xũchi ga nüma ga Iraétanüxü̃ rü nüxü̃ naxunetagü ga tomaepü̱x ga ĩanegü nax cu̱xchicaxü̃ruü̃gü yaxĩgüxü̃ca̱x: Rü wüxi nixĩ ga Quédex ga Gariréawa ga Netaríarü ma̱xpǘneanewa yexmane, rü nai nixĩ ga Chiquéü̃ ga Efraíü̃arü ma̱xpǘneanewa yexmane, rü nai nixĩ ga Quiriáx-abá ga Yudáarü ma̱xpǘneanewa yexmane. (Rü guma ĩane rü to ga naéga rü Ebróü̃ nixĩ.)

Ãẽ̱xgacügü ga guxchaxü̃güarü mexẽxẽruü̃gü 1:20

Rü Caréxna naxǘ ga guma ĩane ga Ebróü̃, yema Moiché nüxü̃ ixuxü̃rüxü̃. Rü nüma ga Caréx rü guma ĩanewa ínanawoxü̃ ga nataagü ga yema tomaepü̱x ga Anáx nanegü.

1 Chamué 30:31

Rü yexgumarüxü̃ ta norü ãmare naxca̱x yéma namugü ga yema ãẽ̱xgacügü ga Ebróü̃wa yexmagüxü̃. Rü yexgumarüxü̃ ta norü ãmare naxca̱x yéma namugü ga yema ãẽ̱xgacügü ga guxü̃ma ga yema nachicagü ga nüma ga Dabí rü norü duü̃xü̃gümaxã nagu yaxũgüchigüxü̃wa yexmagüxü̃.

2 Chamué 2:1

Rü yemawena rü nüma ga Dabí rü Cori ya Tupanana naca rü ñanagürü: —¿Yudáaneca̱x tá chataeguxü̃? —ñanagürü. Rü nüma ga Cori ya Tupana nanangãxü̃ rü ñanagürü: —Ngü̃, name nixĩ i ngéma cuxũ —ñanagürü. Rü yexguma ga Dabí rü ínaca rü ñanagürü: —¿Ngextá tá chaxũxü̃? —ñanagürü. Rü nüma ga Cori ya Tupana nanangãxü̃ rü ñanagürü: —Ĩane ya Ebróü̃wa —ñanagürü.