Yochué 13:11 - Tupanaarü Ore

^11-12 Rü nanayauxgü ta ga Garaáxane, rü Guechuréuane, rü Maacáane, rü naétü ga guma ma̱xpǘne ga Ermóü̃, rü guxü̃ma ga Bacháü̃ane ñu̱xmata Chacáwa nangu. Rü namaxã nangau ga yema naanegü ga Bacháü̃anearü ãẽ̱xgacü ga Óx namaxã icuáxü̃. Rü nüma ga Óx rü Atarúwa rü Edréiwa ãẽ̱xgacü nixĩ. Rü yexguma Moiché yema Refátanüxü̃xü̃ rüporamaegu rü ínawoxü̃ãgu ga yema naanewa rü nüma ga Óx nixĩ ga Refátanüxü̃ ga nawa iyacuáxü̃.

Yochué 13:11 Referans Kwoze

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 2:23

Natürü ga Yechúx rü Aráü̃ rü nanapuxü̃ ga guma 23 ga Yaíarü ĩanegü. Rü yexgumarüxü̃ ta nanapu ga guma ĩane ga Quenáx rü naétü ga norü ĩanexacügü. Rü guxü̃wama 60 ga ĩanegü nixĩ. Rü guxü̃ma ga yema duü̃xü̃gü rü Garaáxnatü ga Maquítaagü nixĩgü.

Naanearü ügüchiga 37:25

Rü yemawena rü ínarütogü rü nachibüe. Rü yexguma nachibüeyane rü yáxü̃gu nüxü̃ nadaugü ga Ismaétanüxü̃ ga Garaáxanewa ne ĩxü̃. Rü norü caméyutagu nayana ga pumaragü rü tuxuneruü̃gü rü pumara ga míra ga Equítuanewa nanaxü̃.

Iraétanüxü̃arü muxchiga 32:29

—Rü ngẽxguma aixcüma ãxneãcüma natü i Yudáü̃ wüxigu pemaxã yachoü̃gu i guxü̃ma i ngẽma Gáxtanüxü̃ rü Rubéü̃tanüxü̃ nax Cori ya Tupana pexü̃ rüngü̃xẽẽãcüma pemaxã daiwa naxĩxü̃ca̱x ñu̱xmata peyapugü i ngẽma nachixü̃ane, rü ñu̱xũchi i pema rü tá nüxna penaxã i ñaa Garaáxarü naane nax noxrügü yaxĩxü̃ca̱x.

Wenaxarü naxümatü ga Tupanaarü mugü 3:10

Rü yemaacü taxme̱xgu nayi ga guxü̃nema ga guma ĩanegü ga ãẽ̱xgacü ga Óx namaxã icuáxü̃ne ga ma̱xpǘnearü doxonexü̃chitaeruwa yexmagüne rü Garaáxanewa yexmagüne rü Bacháü̃anewa yexmagüne rü ñu̱xmata Chacáwa rü Edréiwa nangu.

Yochué 13:2

Rü guxü̃ma i ngẽma naane i Firitéugüarü rü ínayaxü, rü ngẽxgumarüxü̃ ta i ngẽma naane i Guechuréugüarü rü ínayaxü. Rü ngẽma naane rü natü i Chióü̃wa inaxügü i Equítuanearü éstewaama, rü nida ñu̱xmata Ecróü̃arü üyeanewa nangu i nórtewaama. Rü ngẽma naane rü Cananéugüarü nixĩ rü nawa nangẽxmagü i 5 i ãẽ̱xgacügü i Firitéugü. Rü norü ĩanegü rü daagü nixĩ: Gácha, rü Adúx, rü Acharóü̃, rü Gáx, rü Ecróü̃. Rü ngẽxgumarüxü̃ ta ínayaxü i ngẽma naane i Abéugü nawa ngẽxmagüxü̃.

Yochué 13:25

Rü yema naane ga Gáxarü duü̃xü̃güna üxü̃ rü Yachéxwa inaxügü, rü namaxã nanangauxẽxẽ ga guxü̃nema ga ĩanegü ga Garaáxanewa yexmagüne. Rü naétü nüxna nanaxã ga ngãxü̃gu ga Amóü̃tanüxü̃arü naane rü ñu̱xmata nawa nangu ga guma ĩane ga Aroé ga Rabáarü to̱xma̱xtawa yexmane. Rü naétü nüxna nanaxã ga yema naane ga Ebóü̃, rü Ramáx-mispé, rü Betoníü̃arü ngãxü̃wa yexmaxü̃. Rü yexgumarüxü̃ ta nüxna nanaxã ga yema naane ga Maanaíü̃ rü Debíxwa yexmaxü̃ ga üyeanearü ngãxü̃wa.

Yochué 17:5

Rü yemaacü ga yema Manachétanüxü̃ rü nanayauxgü ga 10 ga naanegü naétü ga yema naanegü ga Garaáx, rü Bacháü̃ ga natü ga Yudáü̃arü éstewaama yexmagüxü̃.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 5:11

Rü yema Gáxtanüxü̃ rü Bacháü̃anewa namaxẽ. Rü norü üyeane rü Rubéü̃tanüxü̃arü to̱xma̱xtawa inaxügü rü ñu̱xmata ĩane ga Chacáwa nangu. Rü nüxíraxü̃ ga norü ãẽ̱xgacü rü Yoé nixĩ. Rü yemawena ga Chapáü̃, rü nawena ga Yaanái, rü nawena ga Chapáx.

1 Chamué 13:7

Rü muxü̃ma rü nichoü̃ ga natü ga Yudáü̃. Rü Gáxanewaama rü Garaáxanewaama nabuxmü. Natürü nüma ga Chaú rü ĩane ga Guirigáwatama nayexma, rü guxü̃ma ga norü churaragü rü poraãcü namuü̃eãcüma nawe narüxĩ.