Yochué 12:7 - Tupanaarü Ore

⁷ Rü nüma ga Yochué namaxã ga yema Iraétanüxü̃ rü nanadai ga guxü̃ma ga yema ãẽ̱xgacügü ga Yudáü̃arü oéstewaama yexmagüxü̃. Rü ĩane ga Baá-gáxwa ga Líbanuarü doxonexü̃wa inaxügü rü guxü̃xü̃ma nadai ñu̱xmata guma ma̱xpǘne ga Aráxwa nangugü nax nadaiaxü̃. Rü guma ma̱xpǘne rü Cheíanearü ügüwa nayexma. Rü yema ãẽ̱xgacügü ga nada̱i̱xü̃arü naane nixĩ ga Yochué rü wüxichigü ga Iraétücumügüxü̃ yanuxü̃ nax noxrü yaxĩgüxü̃ca̱x.

Yochué 12:7 Referans Kwoze

Yochué 11:17

Rü yema norü naane ga Iraétanüxü̃, rü inaxügü ga ma̱xpǘne ga Aráxwa rü ínadaãchi ga Cheíwaama rü ñu̱xmata Baá-gáxwa nangu ga Líbanuarü doxonexü̃wa ga ma̱xpǘne ga Ermóü̃pechinüwa. Rü mucü ga taunecü ningegü nax nügü nada̱i̱xü̃ namaxã ga yema ãẽ̱xgacügü ga yema naanewa yexmagüxü̃. Rü nüma ga Yochué rü düxwa nüxü̃ narüporamae rü ínanayauxü̃ rü nanadai ga guxü̃ma ga yema ãẽ̱xgacügü.

Yochué 11:23

Rü yemaacü nixĩ ga Yochué ga napuxü̃ãxü̃ ga yema naanegü yema Cori ya Tupana Moichémaxã nüxü̃ ixuxü̃rüxü̃. Rü ñu̱xũchi yema Iraétücumügüxü̃ nayanu ga yema naane nax wüxitücumüchigü nüxü̃́ yexmaxü̃ca̱x ga noxrütama naane. Rü yemawena rü marü nataxuma ga dai ga yema naanewa.

Yochué 9:1

Rü gumá Itítanüxü̃arü ãẽ̱xgacü, rü Amoréutanüxü̃arü ãẽ̱xgacü, rü Canaáü̃tanüxü̃arü ãẽ̱xgacü, rü Ferechéutanüxü̃arü ãẽ̱xgacü, rü Ebéutanüxü̃arü ãẽ̱xgacü, rü Yebuchéutanüxü̃arü ãẽ̱xgacü, rü nüxü̃ nacuáchigagü ga yema Yericúwa rü Áiwa ngupetüxü̃. Rü yema ãẽ̱xgacügü rü natü ga Yudáü̃arü oéstegu nixĩ ga naxãchiü̃güxü̃, rü nümaxü̃ rü ínamáxpü̱xanexü̃gu rü togü rü ínametachinüanexü̃gu, rü togü rü Már i Mediteráneucutügu rü ñu̱xmata Líbanuarü naanewa nangu.

Yochué 3:17

Rü yemaacü ga guxü̃ma ga yema duü̃xü̃gü rü paanexü̃wa nichoü̃ nawa ga yema natü ga Yudáü̃. Rü yexgumayane ga yema chacherdótegü ga yangegüxü̃ ga yema baú ga Cori ya Tupanaarü mugüchixü̃ rü natüarü ngãxü̃tamawa namaxã nayachaxãchitanü ga paanexü̃wa.

Wenaxarü naxümatü ga Tupanaarü mugü 2:4

¡Rü duü̃xü̃gümaxã nüxü̃ ixu i ñaa ore! Pemax rü nawa ta pechopetü i ngẽma Cheíane i nawa namaxẽxü̃ i Echaútanüxü̃ i petanüxü̃ ixĩgüxü̃. Nümagü rü pexü̃ namuü̃e, ¡natürü pexuãẽgü, rü taxṹ i penadaixü̃! Erü choma rü bai i íxraxü̃ i ngẽma nachixü̃anearü naane pexna chaxã. Erü ngẽma Cheíarü máxpü̱xanexü̃gü rü Echaútanüxü̃arü nixĩ. Rü choma nixĩ ga nüxna chanaxãxü̃.

Wenaxarü naxümatü ga Tupanaarü mugü 2:1

Rü nüma ga Moiché rü ñanagürü: —Yemawena rü chianexü̃wa taxĩ, rü nagu taxĩ ga yema nama ga Már i Dauchíüxü̃wa nadaxü̃, yema Cori ya Tupana choxü̃ muxü̃ãcüma. Rü muxü̃ma ga ngunexü̃ tingegü nax Cheíarü ma̱xpǘnecüwagu írüchoeguxü̃.

Naanearü ügüchiga 36:20

Rü nüma ga Oréutanüxü̃ ga Cheí nanegü ga yema naanegu ãchiü̃güxü̃ nixĩ ga Lotáü̃, rü Chobá, rü Chibóü̃, rü Aná, rü Dichóü̃, rü Éche, rü Dicháü̃. Rü yemagü nixĩ ga Cheítaagü ga Oréutanüxü̃arü ãẽ̱xgacügü ga Edóü̃anewa.

Naanearü ügüchiga 36:8

Rü yemaca̱x ga Echaú ga Edóü̃gu ãégacü rü máxpüxanexü̃ ga Cheígu nayaxãchiü̃.

Naanearü ügüchiga 32:3

Rü Acóbu rü inanamuãchitanü ga ñuxre ga norü duü̃xü̃gü nax Cheíarü naanewa ga Edóü̃wa naxĩxü̃ca̱x nax naenexẽ ga Echaúmaxã nüxü̃ yanaxugüxü̃ca̱x ga yéma tá nax nanguxü̃.

Naanearü ügüchiga 14:6

Rü Cheíarü ma̱xpǘneanegu nayadai ga Oréutanüxü̃, rü ñu̱xũchi nawe nangegü ñu̱xmata nawa nangugü ga Paráü̃arü doonexü̃ ga taxúema íxãpataxü̃arü ngaicamawa yexmaxü̃.