Yochué 12:5 - Tupanaarü Ore

⁵ Rü yema naane ga namaxã inacuáxü̃ ga Óx rü inaxügü ga ma̱xpǘne ga Ermóü̃wa rü Chacáwa, rü guxü̃ma ga Bacháü̃arü naanewa nada ñu̱xmata nawa nangu ga üyeane ga Guechúx rü Maacá. Rü yéma rü nadapetü ñu̱xmata Garaáxarü naanearü ngãxü̃wa nangu ga ngextá iyacuáxü̃wa ga yema naane ga gumá Ebóü̃arü ãẽ̱xgacü ga Chióü̃ namaxã icuáxü̃.

Yochué 12:5 Referans Kwoze

Wenaxarü naxümatü ga Tupanaarü mugü 3:14

Rü Yaí ga Manachétaxa rü nanayaxu ga guxü̃ma ga Argóxane rü ñu̱xmata Guechúxarü üyeanewa rü Maacáarü üyeanewa nangu. Rü yema naane ga noxri Bacháü̃gu ãégaxü̃ rü nüma ga Yaí rü nügüégagu nanaxüéga, rü Abóx-yaígu nanaxüéga. Rü woo i ñu̱xma rü ngẽmatama nixĩ i naéga.

1 Chamué 27:8

Rü yexguma yema naanewa nayexmagu ga Dabí rü norü duü̃xü̃gümaxã ínaxũxũãxü̃ nax ngĩ́xwa naxũxü̃ca̱x natanüwa ga Guechúxtanüxü̃, rü Guéchetanüxü̃, rü Amaréxtanüxü̃ ga yema naanewa yexmagüxü̃. Rü yema duü̃xü̃güarü naane rü Teraíü̃wa inanaxügü rü Chúxwaama nadaxüchi ñu̱xmata Equítuanewa nangu.

Yochué 13:11

Rü nanayauxgü ta ga Garaáxane, rü Guechuréuane, rü Maacáane, rü naétü ga guma ma̱xpǘne ga Ermóü̃, rü guxü̃ma ga Bacháü̃ane ñu̱xmata Chacáwa nangu. Rü namaxã nangau ga yema naanegü ga Bacháü̃anearü ãẽ̱xgacü ga Óx namaxã icuáxü̃. Rü nüma ga Óx rü Atarúwa rü Edréiwa ãẽ̱xgacü nixĩ. Rü yexguma Moiché yema Refátanüxü̃xü̃ rüporamaegu rü ínawoxü̃ãgu ga yema naanewa rü nüma ga Óx nixĩ ga Refátanüxü̃ ga nawa iyacuáxü̃.

Norü taxre ga popera ga ãẽ̱xgacügüchiga 25:23

Rü yexguma yema Yudáanearü churaragüerugü rü ñu̱xũchi yema norü duü̃xü̃gü nüxü̃ cuáxchigagügu nax Babiróniaanearü ãẽ̱xgacü rü Guedaríaxü̃ naxunetaxü̃ nax Yudáanearü ãẽ̱xgacü yixĩxü̃ca̱x, rü Mipáwa naxĩ nax Guedaríamaxã yanadexagüxü̃ca̱x. Rü yema yéma ĩxü̃ nixĩ ga Ismaé ga Netanía nane, rü Yoanáü̃ ga Caréa nane, rü Cheraía ga Tanúmex nane, ĩane ga Netopácüã̱x, rü Yaachanía ga wüxi ga yatü ga ĩane ga Maacácüã̱x nane. Rü yemagü nixĩ ga norü yatügümaxã yéma Mipáwa ĩxü̃.

2 Chamué 23:34

Eriférex ga Maacácüã̱x ga Achabaí nane, rü Eliáü̃ ga Guirócüã̱x ga Aitópe nane, rü

2 Chamué 15:8

Rü yexguma Chíriaanegu chaxãchiü̃gu ga Yechúxarü ĩanewa, rü choma nax curü duü̃xü̃ chixĩxü̃, rü yéma Cori ya Tupanamaxã nüxü̃ chixu rü ngẽxguma chi nüma choxü̃́ natauxchaxẽẽãgu ga Yerucharéü̃ca̱x nax chataeguxü̃ rü chi nüxü̃ chayarücua̱xüxü̃ namaxã i wüxi i chorü ãmare i naxca̱x chiguxü̃ —ñanagürü.

2 Chamué 13:37

Rü nüma ga Acharóü̃ rü nixũ, rü Tamáixü̃tagu nayarücu̱x. Rü nüma ga Tarmái rü Yechúxarü ãẽ̱xgacü ga Amiúx nane nixĩ. Rü tomaepü̱x ga taunecü yéma nayexma. Rü guxü̃ ga ngunexü̃gu rü nüma ga Dabí rü Anóü̃ca̱x naxaxu.

2 Chamué 3:3

Rü gumá norü taxre ga nane rü Quiráx nixĩ, rü Abigái iyixĩ ga naé. Rü ngĩma ga Abigái rü Nabáx ga yucüma̱xchire̱x iyixĩ. Rü nüma ga Nabáx rü Carméxcüã̱x nixĩ. Rü norü tomaepü̱x ga Dabí nane rü Acharóü̃ nixĩ, rü naé rü Maacá iyixĩ. Rü ngĩma rü Tarmáixacü iyixĩ. Rü nüma ga Tarmái rü Yechúxarü ãẽ̱xgacü nixĩ.

Yochué 12:1

Rü nüma ga Iraétanüxü̃ rü taxre ga ãẽ̱xgacügüxü̃ narüporamae ga natü ga Yudáü̃arü éstewaama. Rü ñaagü nixĩ ga norü naane ga napugüxü̃: Rü natü ga Arnóü̃wa inaxügü ñu̱xmata ma̱xpǘne ga Ermóü̃wa nangu. Rü namaxã nanangauxẽxẽ ga yema naane ga Yudáü̃arü doxonexü̃ ga éstewaama yexmaxü̃.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 5:11

Rü yema Gáxtanüxü̃ rü Bacháü̃anewa namaxẽ. Rü norü üyeane rü Rubéü̃tanüxü̃arü to̱xma̱xtawa inaxügü rü ñu̱xmata ĩane ga Chacáwa nangu. Rü nüxíraxü̃ ga norü ãẽ̱xgacü rü Yoé nixĩ. Rü yemawena ga Chapáü̃, rü nawena ga Yaanái, rü nawena ga Chapáx.

Yeremía 40:8

Rü nüma ga yema Yudíugüarü churaragüarü ãẽ̱xgacügü rü yexguma nüxü̃ nacua̱xgügu nax Guedaría yema naanearü ãẽ̱xgacü yixĩxü̃, rü norü churaragümaxã Mispáwa naxĩ nax íyadaugüãxü̃ca̱x. Rü natanüwa nayexmagü ga Netanía nane ga Ismaé, rü Caréa nanegü ga Yoanáü̃ rü Yonatáü̃, rü Tanúmex nane ga Cheraía, rü Netopácüã̱x ga Efái nanegü, rü Yechanía ga wüxi ga yatü ga Maacáxcüã̱x nane. Rü guxü̃ma ga yemagü wüxigu namaxã ga norü churaragü rü Guedaríaxü̃tawa ínayadaugü.