Yochué 11:16 - Tupanaarü Ore

¹⁶ Rü nüma ga Yochué rü nayapu ga guxü̃ma ga yema naane ga máxpü̱xanexü̃ rü guxü̃ma ga yema naane ga Négue, rü guxü̃ma ga yema naane ga Gochéü̃, rü yema naane ga natü ga Yudáü̃arü metachinüxü̃. Rü yemaacü nayapu ga guxü̃ma ga yema máxpü̱xanexü̃, rü yema doxonexü̃ nax Iraétanüxü̃arü yixĩxüca̱x.

Yochué 11:16 Referans Kwoze

Yochué 10:41

Rü yemaacü wüxicana guxü̃ma ga yema ãẽ̱xgacügüxü̃ nadai rü nanapu ga guxü̃ma ga norü naanegü ga Cadé-banéawa inaxügü rü ñu̱xmata Gáchawa nangu, rü Gochéü̃wa inaxügü rü ñu̱xmata Gabaóü̃wa nangu. Yerü woetama Iraétanüxü̃étüwa naxü ga Tupana.

Yochué 12:8

Rü yema naane ga napuxü̃xü̃ rü ma̱xpǘxanexü̃ nixĩ, rü yema ma̱xpǘnegüarü doxonexü̃ nixĩ, rü natü ga Yudáü̃arü metachinüanexü̃ nixĩ, rü ma̱xpǘanepechinügü nixĩ, rü yema naxnücüanexü̃ ga súrwaama üxü̃ nixĩ, rü yema Négue nixĩ. Rü yema naanegü rü noxri rü Itítanüxü̃güarü, rü Amoréutanüxü̃güarü, rü Cananéugüarü, rü Ferechéugüarü, rü Ebéugüarü, rü Yebuchéugüarüchire̱x nixĩgü.

Yochué 11:21

Rü yexguma nixĩ ga Yochué ga nadaiãcuãxü̃ ga norü ĩanegü ga Anátanüxü̃ ga ma̱xpǘne ga Ebróü̃gu ãchiü̃güxü̃ rü Debíxgu rü Anáxgu ãchiü̃güxü̃, rü guxü̃nema ga guma ma̱xpǘnegü ga Yudáanewa yexmagünegu, rü Iraéanewa yexmagünegu ãchiü̃güxü̃.

Echequié 36:8

Natürü i pema, Pa Iraéanearü Ma̱xpǘnegüx, rü pewa tá narüxügü i muxü̃ma i nanetügü i taxü̃ i muarü oṍxü̃ naxca̱x i chorü duü̃xü̃gü i Iraétanüxü̃ i paxa tá pexca̱x woeguxü̃.

Echequié 17:23

Rü yimá Iraéanewa ngẽxmane ya ma̱xpǘne ya rümáchanemaenewa tá narüxü rü tá namuchacüxü, rü tá namuarü oõ̱x, rü wüxi ya ocayiwa ya baxcane tá nixĩ. Rü naguxü̃raü̃xü̃ i naeü̃gü rü tá natüxü̃wa namaxẽ, rü ñu̱xũchi naguxü̃raü̃xü̃ i werigü tá natanütüxü̃gu nixüachiaxü̃.

Yochué 9:1

Rü gumá Itítanüxü̃arü ãẽ̱xgacü, rü Amoréutanüxü̃arü ãẽ̱xgacü, rü Canaáü̃tanüxü̃arü ãẽ̱xgacü, rü Ferechéutanüxü̃arü ãẽ̱xgacü, rü Ebéutanüxü̃arü ãẽ̱xgacü, rü Yebuchéutanüxü̃arü ãẽ̱xgacü, rü nüxü̃ nacuáchigagü ga yema Yericúwa rü Áiwa ngupetüxü̃. Rü yema ãẽ̱xgacügü rü natü ga Yudáü̃arü oéstegu nixĩ ga naxãchiü̃güxü̃, rü nümaxü̃ rü ínamáxpü̱xanexü̃gu rü togü rü ínametachinüanexü̃gu, rü togü rü Már i Mediteráneucutügu rü ñu̱xmata Líbanuarü naanewa nangu.

Yochué 10:40

Rü Yochué rü norü churaragümaxã nanadaiãcu ga guxü̃ma ga yema ĩanegü ga yema naanewa yexmagüxü̃. Rü nüxü̃ narüporamae ga yema ãẽ̱xgacügü ga máxpü̱xanexü̃wa yexmagüxü̃, rü yema naxnücüane ga Néguewa yexmagüxü̃, rü yema ínadoxonexü̃wa yexmagüxü̃, rü yema ma̱xpǘnepechinü̃güwa yexmagüxü̃. Rü yemaacü nanadai ga guxü̃ma ga yema ãẽ̱xgacügü namaxã ga norü duü̃xü̃gü. Rü bai ga wüxi ga íyaxüxü̃ yema Cori ya Iraétanüxü̃arü Tupana namaxã nüxü̃ ixuxü̃rüxü̃.

Yochué 11:15

Rü nüma ga Cori ya Tupana rü Moichéxü̃ namu nax nadaiaxü̃ ga yema duü̃xü̃gü, rü nüma ga Moiché rü Yochuémaxã nüxü̃ nixu ga yema Tupanaarü mu. Rü nüma ga Yochué rü meama nayanguxẽxẽ ga guxü̃ma ga yema Tupana Moichémaxã nüxü̃ ixuxü̃.

Wiyaegü 105:44

Rü togü ga duü̃xü̃güarü naane nüxna naxã. Rü nabü ga togüarü puracüwa ne ũxü̃maxã nanachibüexẽxẽ.

Wenaxarü naxümatü ga Tupanaarü mugü 1:7

¡Rü penade i perü ngẽmaxü̃gü rü ipexĩãchi nax ngẽma Amoréutanüxü̃arü máxpü̱xanexü̃wa pexĩxü̃! ¡Rü nawa pexĩ i guxü̃ma i ngẽma naanegü i norü ngaicamana ngẽxmagüxü̃! ¡Rü ngẽxgumarüxü̃ ta Arabáanewa, rü máxpü̱xanexü̃wa, rü doxonexü̃wa, rü Négueanewa, rü Már i Mediteráneupechinüwa, rü Canaáü̃tanüxü̃arü naanewa, rü Líbanuanewa rü ñu̱xmata taxtü i Eufrátewa pexĩ!