Wiyaegü 9:9 - Tupanaarü Ore

⁹ Rü nüma ya Cori ya Tupana rü tüxü̃ ínapoxü̃ ya yíxema togü chixri tümamaxã icuáxe. Rü ngẽxguma ngúxü̃ tingexgu rü tüxü̃ narüngü̃xẽxẽ.

Wiyaegü 9:9 Referans Kwoze

Ucu̱xẽgüchiga 18:10

Naéga ya Cori ya Tupana, rü wüxi i poxü̃ruxü̃ i poraxü̃ nixĩ. Rü ngẽmaca̱x ngẽma mexü̃gu maxü̃xü̃ i duü̃xü̃, rü naxca̱x nixũ nax naxü̃tagu nügü yanacúxü̃ca̱x.

Naúü̃ 1:7

Rü nüma ya Cori ya Tupana rü namecüma. Rü ngẽxguma guxchaxü̃ ínguxgu rü nüma nixĩ i tüxna nadauxü̃. Rü nüma rü tüxü̃ ínapoxü̃ ya yíxema nüxü̃́ yaxõgüxe.

Wiyaegü 32:7

Rü cumax rü chorü dauruxü̃ quixĩ, rü cuma nixĩ i choxü̃ ícupoxü̃xü̃ i ngẽxguma ãũcümaxü̃wa changexmagu. Rü ngẽxguma nüxü̃ charüporamaegu i chorü uanügü, rü chorü guxü̃cüwawa tá taãẽãcü cunawiyaegüxẽxẽ i duü̃xü̃gü.

Wiyaegü 46:1

Nüma ya Tupana rü tórü poxü̃ruxü̃ nixĩ rü tórü poraxẽẽruxü̃ nixĩ. Rü nüma rü tüxü̃ narüngü̃xẽxẽ ega guxchaxü̃ taxca̱x ínguxgux.

Wiyaegü 62:8

Pa Chorü Duü̃xü̃güx ¡guxü̃guma nüxü̃́ peyaxõgü ya Tupana! ¡Rü perü yumüxẽwa namaxã nüxü̃ pixu i perü guxchaxü̃gü! Erü nüma nixĩ i aixcüma tórü ngü̃xẽẽruxü̃ i tórü cu̱xchicaxü̃ yixĩxü̃.

Wiyaegü 37:39

Natürü ngẽma duü̃xü̃gü i mexü̃ rü Tupanawa nixĩ i ne naxũxü̃ i norü ngü̃xẽxẽ. Rü nüma nixĩ i nüxna nadauxü̃ ega guxchaxü̃ naxca̱x ínguxgu.

Wiyaegü 18:2

Rü cuma nixĩ ya nuta ya taxüchicü ya chorü poxü̃ruxü̃ quixĩxü̃. Rü cuma nixĩ i chorü dauruxü̃ quixĩxü̃. Rü cuma nixĩ i choxü̃ cunapuxü̃ nüxna i chorü uanügü. Rü cuma nixĩ i chorü tüpe̱xeruxü̃ quixĩxü̃. Rü cuma nixĩ i curü poramaxã choxü̃ cumaxẽẽxü̃. Rü cuma nixĩ i chorü cu̱xchicaxü̃ i ma̱xpǘnewa nagu changaxixü̃ quixĩxü̃.

Ore i mexü̃ ga Luca ümatüxü̃ 13:34

Rü dücax, Pa Yerücharéü̃cüã̱x, pema peyadaietanü i Tupanaarü orearü uruü̃gü, rü nutamaxã ípenamuxũchigü i Tupanaarü orearü ngeruü̃gü i pexca̱x núma namugüxü̃. Rü ñuxree̱xpü̱xcüna wüxigu chaugüxü̃tagu pexü̃ chanutaque̱xexẽẽchaü̃, ñoma wüxi i ota ya naxacüã̱x nügütüü̃gu tüxü̃ nutaque̱xexü̃rüxü̃. Natürü pema rü tama penaxwa̱xe.

Ichaía 8:14

Natürü ngẽxguma taxũtáma chauga pexĩnüegu rü choma rü tá perü toxyepe̱xeruxü̃ chixĩ. Rü ngẽma Yudáanearü duü̃xü̃güca̱x rü Iraéanearü duü̃xü̃güca̱x rü ñoma wüxi i nuta i nagu ipucutügücürüxü̃ tá chixĩ. Rü wüxi i norü guxcharuxü̃ tá chixĩ i ngẽma Yerucharéü̃cüã̱xgü.

Wiyaegü 50:15

¡Rü cha̱u̱xca̱x peca ega ngẽxguma guxchaxü̃ pexü̃ ngupetügu! Rü choma rü tá pexü̃ íchapoxü̃ rü pema rü tá choxü̃ picua̱xüü̃gü —ñanagürü ya Tupana.

Wiyaegü 46:7

Rü nüma ya Cori ya Tupana ya Guxãétüwa Ngẽxmacü rü tatanüwa nangẽxma. Rü yimá Acóbuarü Tupana nixĩ ya tórü poxü̃ruxü̃ ixĩcü.

Wiyaegü 20:1

¡Cori ya Tupana cuxü̃ ĩnü, Pa Ãẽ̱xgacüx, ngẽxguma guxchaxü̃wa cungexmagu! ¡Rü yimá Acóbuarü Tupana cuxü̃ ípoxü̃ nüxna i curü uanü!

Wenaxarü naxümatü ga Tupanaarü mugü 33:27

Rü yimá Cori ya Tupana ya guxü̃guma ngẽxmacü, rü nüma nixĩ i perü poxü̃ruxü̃ yixĩxü̃. Rü ngẽma norü pora i guxü̃guma nüxü̃́ ngẽxmaxü̃ rü perü ngü̃xẽẽruxü̃ nixĩ. Rü nüma nixĩ i pexna yabuxmüxẽẽãxü̃ i perü uanügü, rü nüma nixĩ i pexü̃ namuxü̃ nax penada̱i̱xü̃ca̱x.

Popera ga Yudíugü ga yaxõgüxü̃ca̱x ümatüxü̃ 6:18

Rü nüxü̃ tacua̱x rü ngẽxguma ta̱xacüca̱x nügüégagu inaxunetagu ya Tupana, rü taxucürüwama tüxü̃ nawomüxẽxẽ rü nanaxüchicüü i ngẽma. Rü ñu̱xma i guxãma i yixema nax Tupanaarü ngü̃xẽẽca̱x idauxü̃ nax tüxü̃ ínapoxü̃xü̃ca̱x, rü tüxü̃́ nangẽxma i taxü̃ i taãxẽ, erü nüxü̃ tacua̱x rü aixcüma tá tanayaxu i ngẽma maxü̃ i taguma gúxü̃ i tamaxã inaxunetaxü̃.

Ichaía 32:2

Rü wüxichigü i ngẽma ãẽ̱xgacügü rü ñoma cu̱xchicaxü̃ i buanecücha̱xwa naxchipeta icúxü̃rüxü̃ tá nixĩgü. Rü ñoma ĩpata ya pucü ya taxüchicücha̱xwa natüxü̃gu ngaxínerüxü̃ tá nixĩgü. Rü ñoma natügü i paanexüchixü̃gu iya̱xgüxü̃rüxü̃ tá nixĩgü. Rü ñoma chianexü̃wa ngẽxmacü ya taxüchicü ya nutachipetarüxü̃ tá nixĩgü i ngẽma ãẽ̱xgacügü.

Wiyaegü 108:12

¡Rü torü uanügücha̱xwa toxü̃ rüngü̃xẽxẽ nax nüxü̃ tarüporamaegüxü̃ca̱x! Erü taxuwama toxü̃́ name i toxrüxü̃ i duü̃xü̃güarü ngü̃xẽxẽ.

Wiyaegü 142:4

Rü ngẽxguma chorü tügünecüwagu chadawenügu rü tataxuma ya texé ya chorü ngü̃xẽẽwa ũxẽ. Rü tataxuma ya texé ya choxü̃ ípoxü̃xẽ. Rü tataxuma ya texé ya cha̱u̱xca̱x oegaãẽxe.

Wiyaegü 48:3

Rü Yerucharéü̃wa ngẽxmane ya ãẽ̱xgacüpatagüwa nixĩ i nangẽxmaxü̃ ya Tupana. Rü nüma ya Tupana rü nügü nango̱xẽxẽ nax yima ĩanearü poxü̃ruxü̃ ya aixcüma poracü yixĩxü̃.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 16:33

Rü ngẽma naigü i naixnecüwa ngẽxmagüxü̃ rü name nixĩ i taãẽãcü nicuxcu nape̱xewa ya Cori ya Tupana ya núma ũcü nax ñoma i naanemaxã inacuáxü̃ca̱x.

Wiyaegü 7:9

Pa Cori Pa Tupana ya Ixaixcümacüx, cuma rü cunangugü i wüxichigü i duü̃xü̃güarü ĩnügü rü norü ngúchaü̃gü i naãẽwa nagu naxĩnüexü̃. ¡Rü iyanaxoxẽxẽ i norü chixexü̃ i ngẽma chixexü̃gu maxẽxü̃! ¡Natürü yíxema mexü̃gu maxü̃́xẽ rü tüxna nadau nax tama chixexü̃gu tanguxü̃ca̱x!

Wiyaegü 67:5

Pa Tupanax, name nixĩ nax guxü̃ma i duü̃xü̃gü i guxü̃ma i nachixü̃anecüã̱x cuxü̃ yacua̱xüü̃güxü̃.

Wiyaegü 96:10

¡Rü guxü̃ma i nachixü̃anecüã̱xgümaxã nüxü̃ pixu rü ñapegügü: —Nüma ya Cori ya Tupana nixĩ i ãẽ̱xgacü ya guxãétüwa ngẽxmacü yixĩxü̃ —ñapegügü! Rü nüma rü wüxitama ga namaxü̃gu nayaxũxẽxẽ ga ñoma ga naane nax tama ngẽma namaxü̃na yaxũgachixü̃ca̱x. Rü nüma nixĩ i meama guxü̃ma i nachixü̃anegümaxã inacuáxü̃.