Wiyaegü 81:9 - Tupanaarü Ore

⁹ Rü tama chanaxwa̱xe i namaxã petupanaã̱xgü i ngẽma tama aixcüma Tupana ixĩxü̃ rü tama chanaxwa̱xe i nüxü̃ picua̱xüü̃gü i naxchicüna̱xãgü.

Wiyaegü 81:9 Referans Kwoze

Ichaía 43:12

Rü ñanagürü ta ga Tupana: —Choma nixĩ ga pemaxã nüxü̃ chixuxü̃ rü tá pexü̃ íchanguxü̃xẽẽxü̃. Rü aixcüma chayanguxẽxẽ ga yema. Rü pema rü meama nüxü̃ pecua̱x nax tama wüxíe i tomare ga tupana yixĩxü̃ ga pexü̃ ínguxü̃xẽẽxü̃, erü choma rü chaxicatama Tupana chixĩ.

Wenaxarü naxümatü ga Tupanaarü mugü 32:12

Rü nüma ga Cori ya Tupanaxicatama nixĩ ga pemaxã inacuáxü̃ rü taxuxü̃ma ga ta̱xacürü tupananeta nixĩ ga nüxü̃ rüngü̃xẽẽxü̃.

Wenaxarü naxümatü ga Tupanaarü mugü 6:14

¡Rü taxũtáma nawe perüxĩ i ngẽma tupananetagü i ngẽma duü̃xü̃gü i pexna ngaicamagüxü̃ nüxü̃ icua̱xüxü̃güxü̃!

Maraquía 2:11

Rü ngẽma Yudátanüxü̃ rü tama Tupanaga naxĩnüe, rü taxü̃ i chixexü̃ naxügü i Yerucharéü̃wa rü Iraéanewa. Rü yima Tupanapata ya üünene ya nüma nüxü̃ nangechaxü̃ne rü nagu nayanachixexẽẽgü, erü ngẽma yatügü i Yudátanüxü̃ rü ngexü̃gü i tupananetagüxü̃ icua̱xüü̃güxü̃maxã nixãxma̱xgü.

Wiyaegü 44:20

Rü ngẽxguma chi nüxü̃ itarüngümaegu i naéga ya Tupana, rü chi nüxü̃ ticua̱xüü̃gux i tomare i tupana, rü nüma rü nüxü̃ nacua̱xama. Erü nüma rü meama nüxü̃ nacua̱x i guxü̃ma i ngẽma bexma taãẽwa nagu rüxĩnüexü̃.

Ínachoxü̃xü̃chiga 15:26

Rü Tupana rü ñanagürü nüxü̃: —Ngẽxguma chi ipexĩnüegu i ngẽma pemaxã nüxü̃ chixuxü̃, rü penaxü̱xgu i ngẽma namaxã chataãẽxü̃, rü naga pexĩnüegu i ngẽma chorü ucu̱xẽgü, rü peyanguxẽẽ̱xgu i ngẽma mugü, rü taxuxü̃táma núma pexca̱x chanamu i ngẽma da̱xaweanegü ga Equítuanecüã̱xgüca̱x yéma chamuxü̃. Erü choma nixĩ i perü Cori ya Tupana i pexü̃ charümeexẽẽxü̃ chixĩxü̃ —ñanagürü.

Nüxíraxü̃xü̃ ga popera ga ãẽ̱xgacügüchiga 22:19

Rü nüma ga Micaía rü nanangãxü̃ rü ñanagürü: —Chanaxwa̱xe i icurüxĩnü i ñaa to i norü ore ya Tupana. Rü nüxü̃ chadau ga Tupana ya norü tochicaxü̃wa rütocü, rü guxü̃ma i daxũcüã̱x i orearü ngeruxü̃ i naxü̃tagu chigüxü̃ ga norü tügünecüwawa rü norü to̱xwecüwawa.

Wiyaegü 50:7

Rü nüma ya Tupana rü ñanagürü: —Pa Chorü Duü̃xü̃gü i Iraétanüxü̃x ¡rü iperüxĩnüe! Rü ñu̱xma rü tá pemaxã chanangõ̱xẽxẽ i ngẽma perü chixexü̃. Rü chaxicatama nixĩ ya Tupana chixĩxü̃. Rü chomatama nixĩ i perü Tupana chixĩxü̃.

Ichaía 28:23

¡Rü dücax, choxü̃ iperüxĩnüe i ngẽma nüxü̃ chixuxü̃! ¡Rü mea iperüxĩnüe i ngẽma chorü dexagü!

Ochéa 4:1

Pa Iraéanecüã̱xgüx ¡iperüxĩnüe i ngẽma pemaxã nüxü̃ yaxuxü̃ ya Cori ya Tupana! Nüma rü pemaxã nanu, erü petanüwa rü marü tataxuma ya texé ya tümamücümaxã ixaixcümáxe, rü bai ya texé ya aixcüma naxǘxe i ngẽma Tupanamaxã nüxü̃ tixuxü̃, rü bai ya texé ya aixcüma Tupanaxü̃ cuáxe.