Wiyaegü 74:3 - Tupanaarü Ore

³ ¡Rü nua naxũ rü íyadau ya daa curü ĩane nax guxü̃wama nagu napogüene! Rü yema curü uanügü rü cupatawa rü nagu napogüe ga guxü̃ma ga ta̱xacü yéma yexmagüxü̃.

Wiyaegü 74:3 Referans Kwoze

Danié 9:17

Pa Torü Tupanax, choma rü curü duü̃xü̃ chixĩ. ¡Rü nüxü̃ naxĩnü i chorü yumüxẽ i nawa cuxü̃ chaca̱a̱xü̃xü̃! Rü cugüégagu cuxna chaca nax nüxü̃ cungechaü̃ãcüma nüxü̃ cudauxü̃ nax ñuxãcü poraãcü nachixexü̃ ya yima cupata ya taxü̃ne.

Auxexü̃chiga 1:10

Rü nüma ga yema uanügü rü nügüaxü̃́ nanade ga guxü̃ma ga yema yemaxü̃gü ga Yerucharéü̃wa yexmagüxü̃. Rü yema Yerucharéü̃cüã̱xgü rü nüxü̃ nadaugü, Pa Tupanax, nax cupatagu nachocuxü̃ ga yema togü ga nachixü̃anecüã̱xgü i tama yaxõgüxü̃, woo cuma nüxü̃ quixu nax tama namexü̃ nax ngexerüxemare nagu ücuxü̃ ya yima cupata.

Wiyaegü 79:1

Pa Tupanax, ngẽma tama cuxü̃́ yaxõgüxü̃ rü naxca̱x ínayaxüãchi ya yima cupata ya üünene rü nanaxãũãchixẽxẽ. Rü nüma ya ĩane ya Yerucharéü̃ rü nagu napogüe.

Ore i mexü̃ ga Luca ümatüxü̃ 21:24

Rü norü uanügü rü taramaxã tá nanadai i ñuxre. Rü togü, rü tá ínanayauxü̃ nax to i nachixü̃anewa nagagüãxü̃ca̱x. Rü ñu̱xũchi i ngẽma norü uanügü rü tá nagu napogüe ya yima ĩane ya Yerucharéü̃. Rü ngẽmaãcü tá nangupetü ñu̱xmatáta nawa nangu i ngẽma ngunexü̃ i nagu Tupana ínawoxü̃xü̃ i ngẽma uanügü.

Ore i mexü̃ ga Márcu ümatüxü̃ 11:17

Rü inanaxügü nax nangúexẽẽtaexü̃, rü ñanagürü: —Tupanaarü ore i ümatüxü̃wa rü: “Chopata rü yumüxẽpataxü̃ tá nixĩ naxca̱x i guxü̃ma i nachixü̃anecüã̱xgü”, ñanagürü. Natürü i pema rü ngĩ́ta̱a̱xgüxü̃pataxü̃ peyaxĩxẽxẽ —ñanagürü.

Miquéa 3:12

Pa Ãẽ̱xgacügüx, pegagu rü yima ma̱xpǘne ya Chióü̃ rü wüxi i naane i ngẽxma maxẽmaxã rüxümarexü̃ tá nixĩ. Rü yima ĩane ya Yerucharéü̃ rü naxtapü̱xgüxica tá ngẽxma naxãũxchita —ñanagürü.

Miquéa 1:3

Rü nüma ya Cori ya Tupana rü tá ngẽma ínangexmaxü̃wa ínaxũxũ, rü ma̱xpǘneétügu yaxũãcüma tá nua naxũ.

Danié 11:31

Rü ngẽma norü churaragü rü tá chixexü̃ nawa naxügü ya yima Tupanapata ya taxü̃ne rü yima ĩane ya ípoxegune ya Yerucharéü̃. Rü tá inayanaxoxẽxẽ nax wüxichigü i ngunexü̃ Tupanaca̱x ãmare yagugüxü̃. Rü ngẽmatama ãmarearü guruü̃wa tá nayagugü i ngẽma Tupanaca̱x ãũãchixü̃.

Danié 9:27

Rü wüxi i yüxügu i ngẽma ãẽ̱xgacü rü muxü̃ma i duü̃xü̃gümaxã tá wüxi i uneta naxü. Natürü yima yüxüarü ngãxü̃gu rü nüma i ngẽma ãẽ̱xgacü rü tá nayanuxũ nax Tupanaca̱x ãmare tigugüxü̃ rü itanaxãgüxü̃ i ãmaregü. Rü ngẽma ãmarearü guruü̃pe̱xewa tá taxü̃ i chixexü̃ naxü rü ñu̱xmatáta Tupana nayama̱x i ngẽma ãẽ̱xgacü i chixexü̃ üxü̃ —ñanagürü.

Yeremía 52:13

Rü yexguma Yerucharéü̃wa nanguxgu rü nawa nanangixichi ga Tupanapata ga taxü̃ne, rü ãẽ̱xgacüpata, rü guxü̃nema ga guma ĩanearü ĩpatagü wüxigu namaxã ga napatagü ga yema duü̃xü̃gü ga tachigagüxü̃ ga Yerucharéü̃wa.

Ichaía 61:4

Rü pemax, Pa Yerucharéü̃cüã̱xgüx, rü tá peyamexẽẽgü ya yima ĩanegü ya ü̃pama ichixegüne.

Ichaía 25:10

Rü yimá Cori ya Tupaname̱xẽ tá nixĩ i ma̱xpǘne ya Chióü̃xü̃ ípoxü̃ne. Natürü Moáxü̃ rü tá nayapuxcuchigü ñoma maxẽ i paxü̃ wüxi i guxchirepáü̃gu yapu̱xcuchixü̃rüxü̃.

Ichaía 10:6

Rü choma tá nixĩ i Achíriaanearü ãẽ̱xgacüxü̃ chamuxü̃ nax duü̃xü̃gü i chixexü̃gu maxẽxü̃ca̱x rü wüxi i nachixü̃ane i choxü̃ nuẽẽxü̃ca̱x íyagoõchixü̃ca̱x nax nüxü̃́ nangĩ́xü̃ca̱x rü nüxna napuxü̃ãxü̃ca̱x i norü ngẽmaxü̃gü rü nagu napugüexü̃ca̱x ñoma ĩanearü namagüwa ngẽxmaxü̃ i ãcharaxü̃gu napugüexü̃rüxü̃.

Wiyaegü 44:26

¡Ẽcü inachi rü paxa nua naxũ rü toxü̃ yarüngü̃xẽxẽ! ¡Rü taxü̃ i curü ngechaü̃gagu toxü̃ ínanguxü̃xẽxẽ!

Wiyaegü 44:23

Pa Corix ¿tü̱xcüü̃ cupe? ¡Rü naba̱i̱xãchi, rü taxṹ i toxü̃ ícuwogüxüchixü̃!

Neemía 2:13

Rü yematama chütaxü̃gu rü Ngategu ãégaxü̃ ga ĩã̱xwa íchaxũxũ rü Dragóü̃arü Puchuwaama chaxũ ñu̱xmata Guxchirearü ĩã̱xwa changu. Rü meama chanangugü ga yema naxtapü̱x ga guma Yerucharéü̃arü poxeguxü̃ ga nagu napogüexü̃ rü norü ĩã̱xgü ga ínaguxü̃.

Neemía 2:3

Rü ãẽ̱xgacüxü̃ changãxü̃ rü ñachagürü: —Pa Ãẽ̱xgacüx ¡Guxü̃guma namaxü̃! ¿Ñuxãcü chi i tama changechaü̃xü̃? Erü yima ĩane ya chaunatügü nagu ta̱xgüne rü nachicaxicatama nixĩ, rü naxtapü̱xarü ĩã̱xgü rü ínanagu —ñachagürü.

Neemía 1:3

Rü nümagü rü choxü̃ nangãxü̃gü rü ñanagürügü: —Ngéma rü tama aixcüma mea inixũ. Rü ngẽma duü̃xü̃gü i Yudáanegu rüchoxü̃ rü poraãcü ngúxü̃ ningegü rü chixexü̃ nüxü̃ naxüpetü. Rü ngẽma naxtapü̱x ya yima tórü ĩane ya Yerucharéü̃ rü nanaxa̱i̱xrügumaraxü̃tama ga nagu nax napogüexü̃ rü tauta wena Yechúa nanaxügü. Rü yema naxtapü̱xarü ĩã̱xgü ga ínaguxü̃ rü tauta wena nanaxüchicüxügü —ñanagürügü.

Yochué 10:24

Rü yexguma Yochuépe̱xewa nagagüã̱xgu rü nüma ga Yochué rü naxca̱x naca ga guxü̃ma ga Iraétanüxü̃ ga iyatüxü̃ rü yema churaragüerugü ga naxü̃tawa yexmagüxü̃ rü ñanagürü nüxü̃: —¡Nua pexĩ rü nanaxãwa pengagü i ñaa ãẽ̱xgacügü! —ñanagürü. Rü nüma ga yema churaragüerugü rü yemaacü nanaxügü.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:2

¡Natürü ngẽma naa̱xtü ya Tupanapata ya taxü̃ne, rü taxũtáma cunangugü! Erü ngẽma duü̃xü̃gü i tama Tupanaaxü̃́ yaxõgüxü̃na marü nanaxã. Rü nümagü rü 42 ya tauemacü tá chixri namaxã inacua̱x ya yimá ĩane ya üünene.

Norü taxre ga popera ga ãẽ̱xgacügüchiga 25:9

Rü nayagu ga guma Tupanapata ga taxü̃ne rü ãẽ̱xgacüpata rü napatagü ga yema ãẽ̱xgacügü ixĩgüxü̃. Rü yemaacü ínanagu ga guxü̃nema ga ĩpatagü ga guma ĩanewa yexmagüne.