Wiyaegü 72:3 - Tupanaarü Ore

³ Rü chanaxwa̱xe nax namuarü oóxü̃ i ngẽma nanetügü i ma̱xpǘneanewa ngẽxmagüxü̃ nax ngẽmaãcü nataãẽgüxü̃ca̱x i duü̃xü̃gü rü nügü nangechaü̃güxü̃ca̱x.

Wiyaegü 72:3 Referans Kwoze

Ichaía 52:7

Rü wüxi i taãxẽ nixĩ nax ma̱xpǘneanewa taxca̱x ne naxũxü̃ ya yimá orearü ngeruxü̃ i mexü̃ i ore taxca̱x nua ngecü rü tamaxã nüxü̃ ixucü nax Tupana tá tüxü̃ rüngü̃xẽẽxü̃ rü tüxü̃ ínanguxü̃xẽẽxü̃ naxme̱xwa i tórü uanü. Rü wüxi i taãxẽ tá nixĩ i ngẽxguma Chióü̃cüã̱xgüxü̃ ñaxgu: —Perü Tupana rü marü pemaxã inacua̱x —ñaxgu.

Joel 3:18

Rü ngẽma ngunexü̃gu rü yima ma̱xpǘnegüwa tá nangẽxma ya tacü ya bínu rü lechi ñoma dexárüxü̃. Rü Yudáanearü natügüwa rü tá nata i norü dexá. Rü yima chopata ya taxü̃newa rü tá nichuxchu i wüxi i dexá i tá Chitíü̃arü doxonexü̃wa yawaianexẽẽxü̃.

Danié 9:24

Rü 70 i yüxügü ngupetüguwena rü yima curü ĩane ya üünene ya Yerucharéü̃ rü ngẽma curü duü̃xü̃gü i Iraétanüxü̃ rü düxwa tá inayarüxo i norü chixexü̃ i naxügüxü̃ rü tá Tupanaga naxĩnüe. Rü Tupana tá nüxü̃́ inanaxoxẽxẽ i ngẽma norü chixexü̃gü, rü tá nüxü̃́ nüxü̃ inarüngüma i ngẽma norü chixexü̃. Rü tá ningucuchi ya yimá aixcüma mecü nax guxü̃guma norü duü̃xü̃gümaxã mea inacuáxü̃ca̱x. Rü ngẽmaãcü tá ningu ga yema Tupana cuxü̃ wéxü̃. Rü wena tá nanamexẽxẽ ya yima napata ya üünene.

Wiyaegü 72:16

¡Toxü̃ rüngü̃xẽxẽ, Pa Tupanax, nax tochixü̃anewa toxü̃́ yaxoxochixü̃ca̱x i torü trigugü rü toxü̃́ nabacaxü̃ca̱x i torü trigunecügü i ma̱xpǘneanewa ngẽxmagüxü̃! ¡Rü namuxẽxẽ i norü o ngẽma Líbanuanewa ngẽxmagüxü̃ i nanetügürüxü̃! ¡Rü ñoma maxẽ i naanewa muxü̃rüxü̃ torü ĩanegüwa yamuxẽxẽ i duü̃xü̃gü!

Wiyaegü 65:12

Rü ngẽma carnéruchitaxü̃gü i paanexü̃wa ngẽxmagüxü̃ rü narüxügü i maxẽ rü naya̱u̱xétüane. Rü yima ma̱xpǘnegü rü maxẽmaxã nanga̱xãẽgü.

Ichaía 45:8

Rü ñanagürü ga Tupana: —Choma rü dauxü̃wa tá ne chanamu i chorü ngü̃xẽxẽ, ñoma daxũwa rünguxü̃ i cherenarüxü̃ rü ñoma caixanexü̃wa ne ũcü ya pucürüxü̃. Rü ñoma i naanewa tá nangu i chorü ngü̃xẽxẽ nax ngẽmaãcü Iraétanüxü̃xü̃ íchanguxü̃xẽẽxü̃ca̱x nawa i norü guxchaxü̃gü —ñanagürü.

Ichaía 60:17

Rü choma ya perü Tupana, rü mexü̃wa rü taãẽwa tá pexü̃ chamaxẽxẽ. Rü choma rü bróũchechicüxü tá pexna chanaxã i úiru, rü fieruchicüü tá pexna chanaxã i diẽrumü, rü mürapewachicüü tá pexna chanaxã i bróũche rü nutagüchicüxü tá pexna chanaxã i fieru.