Wiyaegü 64:4 - Tupanaarü Ore

⁴ Rü ngẽma íyacu̱xgüxü̃wa rü ínanaxũxũxẽxẽ i chixexü̃ i ore tümaca̱x ya yíxema taxuxü̃ma guxchaxü̃ namaxã üxe. Rü tama namuü̃ãcüma ngürüãchi tümaechita ínanaxũxũxẽxẽ i ngẽma norü dexa i chixexü̃.

Wiyaegü 64:4 Referans Kwoze

Wiyaegü 55:19

Rü nüma ya Tupana ya guxü̃guma ãẽ̱xgacü ixĩcü rü tá choxü̃ naxĩnü rü tá nayaxãneãchitanüxẽxẽ i ngẽma chomaxã rüxuanügüxü̃. Erü nümagü rü tama nüxü̃ narüxoe i nacüma i chixexü̃ rü tama Tupanaga naxĩnüechaü̃.

Wiyaegü 11:2

¡Rü dücax i ngẽma chixexü̃ ügüxü̃ i duü̃xü̃gü! Rü nanape̱xecunüxẽxẽ ya norü würa nax yacu̱xgüãcüma naxnegümaxã tüxü̃ nama̱xgüxü̃ca̱x ya yíxema duẽxẽgü i mea maxẽxe.

Ore i mexü̃ ga Cuáü̃ ümatüxü̃ 19:6

Natürü yexguma Ngechuchuxü̃ nadaugügu ga chacherdótegüarü ãẽ̱xgacügü rü Tupanapata ga taxü̃nearü purichíagü, rü inanaxügüe ga aita nax naxüexü̃. Rü ñanagürügü: —¡Curuchawa yapota! ¡Curuchawa yapota! —ñanagürügü. Rü Pirátu rü ñanagürü nüxü̃: —¡Ẽcü, peyaga rü pematama curuchawa peyapota! Erü choma rü taxuxü̃ma i chixexü̃xü̃ nawa chadau —ñanagürü.

Abacú 3:14

Rü cumax, Pa Tupanax, rü noxrütama naxnegümaxã cuyama̱x ga yema ãẽ̱xgacü ga chixexü̃ üxü̃ ga yexguma norü churaragümaxã curü duü̃xü̃güca̱x íyaxüãchigu nax ñoma buanecü ya taxüchicürüxü̃ nawoonexẽẽãxü̃ca̱x ga curü duü̃xü̃gü ga tama poraexü̃ nax nügü ínapoxü̃güxü̃.

Wiyaegü 64:7

Natürü nüma ya Tupana rü tá naxnemaxã nanamaxgü. Rü ngürüãchi tá nanapíexẽxẽ.

Neemía 4:11

Rü yema torü uanügü rü nagu narüxĩnüe nax taxũchima nüxü̃ tacua̱xgüxü̃ rü nüxü̃ tadauxü̃ ga yexguma chi bexma totanügu nachocuxgu nax toxü̃ nada̱i̱xü̃ca̱x, rü yemaacü nax íyachaxãchigüxẽẽãxü̃ca̱x ga yema puracü.

2 Chamué 15:14

Rü yexguma nüma ga Dabí rü nanamu ga guxü̃ma ga norü churaragüeru ga namaxã Yerucharéü̃wa yexmagüxü̃, rü ñanagürü: —¡Ngĩxã ñu̱xmatama tibuxmü! Erü yixcama rü taxucürüwatama Acharóü̃cha̱xwa tibuxmü. ¡Ngĩxã, rü peporaãxẽgü! Erü ngürüãchi tá tüxü̃ nayangau rü chixexü̃ tá tamaxã naxü, rü taramaxã tá tüxü̃ nadai ya guxãma ya ĩanecüã̱x —ñanagürü.

1 Chamué 18:11

Rü ngürüãchi Dabíxü̃ nanacu̱x ga norü wocae nax ĩxtapü̱xmaxã yamutanüãxü̃ca̱x. Natürü nüma ga Dabí rü taxree̱xpü̱xcüna nügü ínapoxü̃ama.

Wiyaegü 55:22

¡Cori ya Tupanamaxã nüxü̃ ixu i curü guxchaxü̃gü! Rü nüma rü tá cuxü̃ naporaxẽxẽ. Rü taguma nanaxwa̱xe nax chixexü̃gu tayixü̃ rü ngẽxma tarüchoxü̃ ya yíxema mexü̃ ügüxe.

Wiyaegü 57:5

Natürü cuma, Pa Chorü Tupanax, rü daxũguxü̃ i naanemaxã icucua̱x rü curü üüne rü ñoma i naane namaxã nanapá.