Wiyaegü 142:5 - Tupanaarü Ore

⁵ Rü cuxna nixĩ i chaca̱xaxü̃, Pa Cori Pa Tupanax, rü cuxü̃ ñachagürü: —Cuma nixĩ i chorü cu̱xchicaxü̃ quixĩxü̃. Rü cuma nixĩ i choxna cunaxãxü̃ i guxü̃ma i ta̱xacü i choxü̃́ ngẽxmaxü̃ i ñoma i naane i nawa chamaxü̃wa —ñachagürü.

Wiyaegü 142:5 Referans Kwoze

Wiyaegü 16:5

Pa Corix, cuma nixĩ i ñoma i õnarüxü̃ choxü̃ cuporaxẽẽxü̃. Rü ñoma chorü copa i mexü̃rüxü̃ quixĩ. Rü cuxme̱xwa nangẽxma i chorü maxü̃.

Auxexü̃chiga 3:24

Rü ngẽmaca̱x chaugümaxã ñachagürü: —Nüma ya Cori ya Tupana rü chomaxã inacua̱x, rü ngẽmaca̱x nüxü̃́ chayaxõ —ñachagürü.

Wiyaegü 119:57

Rü cumax, Pa Corix, nixĩ i chorü Tupana quixĩxü̃. Rü choma rü marü cumaxã nüxü̃ chixu nax nagu tá chamaxü̃xü̃ i ngẽma curü ore.

Norü taxre ga popera ga Timutéuca̱x naxümatüxü̃ ga Pauru 4:17

Natürü tórü Cori choxü̃ naporaxẽxẽ rü choxü̃́ nanatauxchaxẽxẽ nax mea nüxü̃ chixuxü̃ca̱x ga norü ore i mexü̃ i tüxü̃ maxẽxẽẽxü̃. Rü yemaacü guxü̃ma ga yema duü̃xü̃gü ga tama Yudíugü ixĩgüxü̃ ga yéma yexmagüxü̃ rü nüxü̃ naxĩnüe ga yema ore. Rü yemaacü tórü Cori ya Ngechuchu choxna nadau nax tama yu chomaxã naxueguxü̃ca̱x.

Wiyaegü 91:2

Rü choma rü ñachagürü cuxü̃: —Pa Corix, cuxicatama nixĩ i chorü cu̱xchicaxü̃ quixĩxü̃, rü chorü poxü̃ruxü̃ quixĩxü̃ rü chorü Tupana ya cuxü̃́ chayaxõcü quixĩxü̃ —ñachagürü cuxü̃.

Wiyaegü 46:1

Nüma ya Tupana rü tórü poxü̃ruxü̃ nixĩ rü tórü poraxẽẽruxü̃ nixĩ. Rü nüma rü tüxü̃ narüngü̃xẽxẽ ega guxchaxü̃ taxca̱x ínguxgux.

Wiyaegü 27:13

Natürü i choma rü chayaxõ nax nüxü̃ tá chadauxü̃ nax aixcüma choxü̃ nangechaü̃xü̃ ya Cori ya Tupana i guxü̃ma i ngẽma ngunexü̃gü i nagu chamaxü̃xü̃gu.

Ore i mexü̃ ga Cuáü̃ ümatüxü̃ 16:32

Rü nawa tá nangu i ngunexü̃ rü ñu̱xmatátama nixĩ i nax pegü pewoonexü̃. Rü wüxichigü i pema rü tá pepatawa pexĩ, rü chaxica tá nua choxü̃ peta̱x. Natürü tama chaxica changexma, erü Chaunatü rü chauxü̃tawa nangẽxma.

Wiyaegü 73:26

Rü ñoma i naanewa rü ñaa chaxune rü chauãxẽ rü naturae. Natürü i cumax, Pa Tupanax, rü cunaporaxẽxẽ i chorü maxü̃ne. Rü guxü̃gutáma chorü Tupana quixĩ.

Wiyaegü 56:13

Erü cuma rü chorü guxchaxü̃wa choxü̃ ícunguxuchixẽxẽ nax tama chayuxü̃ca̱x. Rü choxü̃ ícupoxü̃ nax curü ngóonexü̃wa chamaxü̃xü̃ca̱x.

Wiyaegü 46:11

Rü Cori ya Tupana ya Guxãétüwa Ngẽxmacü rü tatanüwa nangẽxma. Rü nümatama i Acóbuarü Tupana nixĩ i tórü poxü̃ruxü̃ yixĩxü̃.

Wiyaegü 46:7

Rü nüma ya Cori ya Tupana ya Guxãétüwa Ngẽxmacü rü tatanüwa nangẽxma. Rü yimá Acóbuarü Tupana nixĩ ya tórü poxü̃ruxü̃ ixĩcü.

Wiyaegü 35:12

Rü yema mexü̃ ga naxca̱x chaxüxü̃ rü chixexü̃maxã choxü̃́ nanatáeguxẽẽgü. Rü ngẽma rü poraãcü ngechaxü̃ choxna naxã.

Ngu̱xẽẽtaeruü̃arü ore 4:1

Rü yemawena rü nüxü̃ chadau nax ñoma i naanewa naxrüxü̃ i duü̃xẽgümaxã chixri icua̱xgüxü̃. Rü tüxü̃ chadau nax taxauxexü̃ ga guxema duü̃xẽgü ga chixri tümamaxã inacua̱xgüxe, rü taxúema tüxü̃ rüngü̃xẽẽxü̃ nax tataãẽgüxü̃ca̱x. Rü ngẽma duü̃xü̃gü i chixri tümamaxã icua̱xgüxü̃ rü poraãcü chixri tümamaxã nachopetü rü taxúema texé tüxü̃ tarüngü̃xẽxẽ.