Wiyaegü 135:4 - Tupanaarü Ore

⁴ Rü nüma rü nüxü̃ naxuneta ga Acóbu ga Iraégu ãégacü nax norü meruxü̃ yixĩxü̃ca̱x.

Wiyaegü 135:4 Referans Kwoze

Nüxíraxü̃xü̃ ga popera ga Pedru ümatüxü̃ 2:9

Natürü pema nixĩ i duü̃xü̃gü i tórü ãẽ̱xgacü ya Tupana pexü̃ dexü̃ nax norü puracü pexügüxü̃ca̱x. Rü pema nixĩ i duü̃xü̃gü i nape̱xewa ixüünexü̃, erü nümatama ya Tupana rü norü duü̃xü̃güxü̃ pexü̃ nixĩgüxẽxẽ nax nüxü̃ pixuxü̃ca̱x i ngẽma mexü̃gü i norü poramaxã naxüxü̃. Rü nümatama ya Tupana nixĩ ga ẽanexü̃wa pexü̃ ínanguxü̃xẽẽxü̃ nax norü ngóonexü̃ i mexẽchixü̃gu pechocuxü̃ca̱x.

Wenaxarü naxümatü ga Tupanaarü mugü 10:15

Natürü natanüwa ga guxü̃ma ga yema togü ga duü̃xü̃gü rü nüma ga Cori ya Tupana rü yexera namaxã nataãxẽ ga yema nũxcümaü̃güxü̃ ga perü o̱xigü rü nüxü̃ nangechaxü̃. Rü yemaca̱x pema nax nataagü pixĩgüxü̃, rü pexü̃ naxuneta. Rü ñu̱xma rü ta rü meama nango̱x nax pexü̃ naxunetaxü̃ nax norü duü̃xü̃gü pixĩgüxü̃.

Maraquía 3:17

Rü nüma ya Cori ya Tupana ya Guxãétüwa Ngẽxmacü rü ñanagürü: —Choma rü íchanamexẽxẽ i wüxi i ngunexü̃ i nagu tá cha̱u̱xca̱x nawoeguxü̃ nax wena chorü duü̃xü̃gü yixĩgüxü̃ca̱x i Iraétanüxü̃. Rü ñoma wüxi i papa i nane i nüxü̃́ puracüxü̃xü̃ ngechaü̃xü̃rüxü̃, rü ngẽmaãcü tá choxü̃́ nangechaü̃tümüxü̃gü.

Ichaía 41:8

Rü yexguma ga Cori ya Tupana rü ñanagürü: —Iperüxĩnüe, Pa Iraétanüxü̃x. Pema rü chorü duü̃ ya Acóbu ya nüxü̃ chaxunetacüarü duü̃xü̃gü pixĩgü rü chomücü ya Abraáü̃taagü pixĩgü.

Wiyaegü 33:12

Rü nataãẽgü i ngẽma duü̃xü̃gü i Cori ya Tupanamaxã Tupanaã̱xgüxü̃ rü ngẽma duü̃xü̃gü ya Cori ya Tupana nügüxü̃́ dexü̃.

1 Chamué 12:22

Rü nümatama ya Cori ya Tupana rü marü pexü̃ nade yerü nanaxwa̱xe nax norü duü̃xü̃gü pixĩgüxü̃. Rü ngẽmaca̱x tagutáma pexü̃ ínawogü erü tama nanaxwa̱xe i texé nüxü̃ tixu nax tama yangu̱xẽẽãxü̃ i norü ore.

Popera ga Títoca̱x naxümatüxü̃ ga Pauru 2:14

Rü nüma ga Ngechuchu rü taxca̱x nayu nax tüxü̃ ínanguxü̃xẽẽxü̃ca̱x nawa i guxü̃ma i chixexü̃, rü mea tüxü̃ yamexẽẽgüxü̃ca̱x nax norü duü̃xü̃gü ixĩgüxü̃ca̱x rü guxü̃guma mexü̃ ixügüxü̃ca̱x.

Wenaxarü naxümatü ga Tupanaarü mugü 26:18

Rü nüma ya Cori ya Tupana rü ñu̱xma pemaxã nüxü̃ nixu, Pa Iraétanüxü̃x, nax pema rü norü duü̃xü̃gü pixĩgüxü̃, yema marü pemaxã nüxü̃ yaxuxü̃rüxü̃. Rü ngẽmaca̱x i ñu̱xma rü penaxwa̱xe nax naga pexĩnüexü̃ i guxü̃ma i norü mugü.

Yeremía 51:19

Natürü nüma ya Acóbutanüxü̃arü Tupana rü tama ngẽma naxchicüna̱xãgürüxü̃ nixĩ. Erü nüma ya Tupana nixĩ i naxüaxü̃ ga ñoma ga naane rü guxü̃ma i nawa ngẽxmagüxü̃. Rü nüma nüxü̃ naxuneta i ngẽma Iraétanüxü̃ nax norü duü̃xü̃gü yixĩgüxü̃ca̱x. Rü nümax, rü Cori ya Tupana ya Guxãétüwa Ngẽxmacü nixĩ i naéga.