Wiyaegü 12:3 - Tupanaarü Ore

³ Cori ya Tupana rü tá inayanaxoxẽxẽ i guxü̃ma i ngẽma nügü írümegünetaxü̃ rü ngẽma nügü icua̱xüü̃güxü̃.

Wiyaegü 12:3 Referans Kwoze

Ucu̱xẽgüchiga 18:21

Yimá tórü conü nüxü̃ ixuxü̃ i oregagu nixĩ nax imaxẽxü̃ rüe̱xna iyuexü̃. Rü yíxema idexaxüchixe rü tümaarü oregagu ngúxü̃ tinge.

Yema Cuáü̃ nüxü̃ dauxü̃ i yixcüra tá ngupetüxü̃chiga 13:5

Natürü tama yema ngo̱xona nanachu̱xu nax nügü yacua̱xüxüxü̃ca̱x rü chixri Tupanachiga yadexaxü̃ca̱x. Rü yema ngo̱xona naxã ga pora nax 42 ga tauemacü ãẽ̱xgacü yixĩxü̃ca̱x.

Danié 7:8

Rü yexguma yema naxchata̱xcurexü̃ chadawenügu, rü nüxü̃ chadau ga natanüwa nax iyanagoxü̃ ga to ga rüxíxramaexü̃ ga naxchata̱xcure. Rü nanapuxü̃gü ga tomaepü̱x ga naxchata̱xcuregü nax yemaacü naxãchicaxü̃ca̱x ga yema nawa iyacuáxü̃ ga iyarügoxü̃ ga naxchata̱xcure. Rü nüxü̃ chadau nax naxãxẽtüxü̃ ga yema naxchata̱xcure rü guma naxetügü rü duü̃xü̃xetürüxü̃ nixĩgü. Rü nüxü̃́ nayexma ta ga wüxi ga naã̱x ga namaxã poraãcü nügü yacua̱xüüxü̃.

Wiyaegü 17:10

Rü taxúema nüxü̃́ tangechaü̃tümüü̃gü. Rü nügü yacua̱xüü̃güãcüma nidexagü.

Popera ga Yúda ümatüxü̃ 1:16

Rü ngẽma duü̃xü̃gü i norü doramaxã petanügu chocuxü̃ rü ta̱xacüca̱x idexagüwa̱xexüchixü̃ nixĩgü, rü toguã̱xü̃ ixuxwa̱xegüxüchixü̃ nixĩgü. Rü ngẽma duü̃xü̃gü rü noxrütama ngúchaü̃ca̱x daugüxü̃ nixĩgü. Rü nügü icua̱xüü̃güxü̃ nixĩgü. Rü nümaxü̃ mea tümachiga nidexagüneta ya duü̃xẽgü, nax tümaxü̃tawa ta̱xacü nayauxgüxü̃ca̱xmare.

Norü taxre ga popera ga Pedru ümatüxü̃ 2:18

Rü ngẽma ngu̱xẽẽruü̃netagü rü nügü yacua̱xüü̃güãcüma ore i taxuwama mexü̃maxã nidexagü. Rü tüxü̃ nixucu̱xẽgü nax tümaxü̃nearü ngúchaü̃gu taxĩxü̃ca̱x ya yíxema ngexwaca nüxü̃ rüxoexe i ngẽma chixexü̃ i nacüma.

Maraquía 3:13

Rü nüma ya Cori ya Tupana rü ñanagürü: —Pemax rü poraãcü chixexü̃ chomaxã pixugüe. Rü ngẽxguma rü ta ípecaama rü ñaperügügü: “¿Ta̱xacürü chixexü̃ nixĩ i cumaxã tixugüxü̃?” ñapegürügü.

Danié 7:25

Ngẽma ãẽ̱xgacü rü tá Tupana ya Guxãétüwa Ngẽxmacümaxã naguxchiga. Rü tá chixri tümamaxã inacua̱x ya yíxema Tupanaarü duü̃xẽgü. Rü tá naxca̱x nadau nax ñuxãcü nanatoraxü̃xẽẽxü̃ i Tupanaarü mugü, rü tá nüxü̃ naxoo̱x i ngẽma Tupana ueguxü̃ i petagü. Rü yíxema Tupanaarü duü̃xẽgü rü tomaepü̱x ya taunecüarü ngãxü̃ tá naxme̱xwa tangexmagü.

Echequié 29:3

¡Rü namaxã nüxü̃ ixu rü ñacurügü! “Cori ya Tupana rü ñanagürü cuxü̃: ‘Pa Faraóü̃ i Equítuanearü Ãẽ̱xgacüx, choma rü cumaxã nüxü̃ chixu nax curü uanü chixĩxü̃. Rü cuma rü ñoma wüxi i coyaarü ãũxü̃ i taxtü i Nílugu caxü̃rüxü̃ quixĩ. Rü cuma rü ñacurügü: Ngẽma taxtü i Níru rü choxrü nixĩ rü chomatama chanango̱xẽxẽ, ñacurügü.

Echequié 28:9

Rü ngẽxguma ngẽma tá cuxü̃ yama̱xgüxü̃pe̱xegüwa cungexmagu rü marü taxũtáma cugügu curüxĩnügu rü wüxi i tupana quixĩ. Rü ngẽxguma ngẽma tá cuxü̃ ima̱xgüme̱xẽxü̃wa cungexmagu rü tá nüxü̃ quicua̱xãchi nax wüxi i duü̃xü̃mare quixĩxü̃ rü tama wüxi i tupana.

Echequié 28:2

—Cumax, Pa Yatüx, ¡Yima Tíruarü ãẽ̱xgacümaxã nüxü̃ ixu i ñaa ore! Cori ya Tupana rü ñanagürü cuxü̃: “Cumax, Pa Tírucüã̱xgüarü Ãẽ̱xgacüx, cugü quicua̱xüxü̃ rü cugügu curüxĩnügu rü wüxi i tupana quixĩ rü Tupanaarü toruü̃wa curüto. Rü cuxca̱x rü taxucürüwa curü uanügü cuxü̃ narüporamae erü márcutüwa cungexma. Natürü i cumax rü tama wüxi i tupana quixĩ. Rü wüxi i duü̃xü̃mare quixĩ woo nagu curüxĩnügu nax wüxi i tupanaarü cua̱x cuxü̃́ ngẽxmaxü̃.

1 Chamué 2:3

Rü tama name i texé tügü ticua̱xüxü̃ i ngẽxguma tidexagu rü tama name i tügü ítarüta, erü Cori ya Tupana ya Guxü̃xü̃ma Cuáxcü rü nanangugü i guxü̃ma i ngẽma naxüxü̃ i wüxichigü i duü̃xü̃.

Ínachoxü̃xü̃chiga 15:9

Rü ngẽma uanü rü norü ĩnüwa rü ñanagürü: “Nawe tá change ñu̱xmatáta nüxü̃ ichayangau. Rü ngẽxguma nüxü̃ ichayangauxgu rü tá chanayaxu i chorü tara rü chorü poramaxã tá chayama̱x. Rü nüxna tá chanapuxü̃ i guxü̃ma i norü ngẽmaxü̃gü i chanaxwa̱xexü̃. Rü tá ichayanu i ngẽma nüxna chapuxü̃xü̃”, ñaxü̃gu narüxĩnü.

Ichaía 10:10

Rü choma rü marü nüxü̃ charüporamae ga muxü̃ma ga nachixü̃anegü ga muarü tupananetaxã̱xgüxü̃. Rü guma ĩanegü rü Yerucharéü̃arü yexera rü Chamáriaarü yexera namu ga norü tupananetachicüna̱xãgü.

Wiyaegü 55:22

¡Cori ya Tupanamaxã nüxü̃ ixu i curü guxchaxü̃gü! Rü nüma rü tá cuxü̃ naporaxẽxẽ. Rü taguma nanaxwa̱xe nax chixexü̃gu tayixü̃ rü ngẽxma tarüchoxü̃ ya yíxema mexü̃ ügüxe.

Wiyaegü 116:11

Rü chorü ĩ̱xãchiãẽgagu rü ñacharügü: —Guxü̃ma i duü̃xü̃gü rü nidorata̱a̱xgü —ñachagürü.

Wiyaegü 140:12

Rü choma nüxü̃ chacua̱x rü nüma ya Cori ya Tupana rü mea namaxã inacua̱x i ngẽma ngearü diẽruã́xü̃. Rü tüxü̃ ínapoxü̃ ya yíxema naxĩ̱xãchiãẽgüxe.

Ucu̱xẽgüchiga 26:24

Ngẽma aigu rüxĩnüxü̃, rü inayacu̱x nax naxaixwa̱xexü̃. Rü norü dexa rü nameneta, natürü naãẽwa rü chixexü̃gu narüxĩnü.

Ichaía 59:4

Rü taxúema i pema mexü̃ i ĩnümaxã ãẽ̱xgacü ya guxchaxü̃arü mexẽẽruü̃pe̱xewa pexĩ. Rü ngẽma guxchaxü̃ ínamexẽẽgüpe̱xewa rü taxúema nüxü̃ tixu i ngẽma ore i aixcüma ixĩxü̃. Rü nüxü̃ tixu i ngẽma dora ixĩxü̃ rü taxúema aixcümaxü̃ tixu. Erü chixexü̃maxã penapagü rü tama aixcüma penango̱xẽxẽ i ngẽma perü chixexü̃gü.

Yeremía 9:8

Rü yima norü conügü rü ñoma chuxchigü i ãũcümaxü̃rüxü̃ nixĩgü, rü yexü̃cürü doraxü̃ nixugüecha. Rü mea namücügüxü̃ narümoxẽgüneta, natürü naãẽwa nagu narüxĩnüe nax chixexü̃gu tüxü̃ nangu̱xẽẽgüxü̃.

Yeremía 12:6

Rü woo ngẽma cuenexẽgü rü woo cupatacüã̱xgü rü cuechita chixexü̃ cumaxã nixugüe. ¡Rü taxṹ i nüxü̃́ cuyaxõxü̃ ega woo mexü̃ i dexamaxã cumaxã yadexagügu! —ñanagürü ga Cori ya Tupana.