Wiyaegü 118:15 - Tupanaarü Ore

¹⁵ Rü ngẽma Tupanaarü duü̃xü̃gü rü napatagüwa taãẽãcüma nawiyaegü i ngẽxguma nüxü̃ naxĩnüegu nax Tupana nüxü̃ naporamaegüxẽẽxü̃ i ngẽma namaxã rüxuanüã̱xgüxü̃. Rü ñanagürügü: —Nüma ya Cori ya Tupana rü norü poramaxã tüxü̃ ínapoxü̃ nüxna i ngẽma tamaxã rüxuanüã̱xgüxü̃.

Wiyaegü 118:15 Referans Kwoze

Wiyaegü 89:13

Rü yima cuchacüxü rü naporaxüchi. Rü yima curü tügünechacüxü rü napora rü yimamaxã nüxü̃ curüporamae i ngẽma cumaxã rüxuanügüxü̃.

Wiyaegü 60:12

Pa Tupanax, ¡toxü̃ rüngü̃xẽxẽ! Rü curü ngü̃xẽẽmaxã tá nüxü̃ tarüporamae i ngẽma torü uanügü, erü cuma rü tá cuyayitanüxẽxẽ.

Ínachoxü̃xü̃chiga 15:6

Pa Cori ya Tupanax, cuma nixĩ i curü tügünechacüxü ya poranemaxã cunada̱i̱xü̃ i torü uanügü.

Ore i mexü̃ ga Luca ümatüxü̃ 1:51

Rü guxü̃ ga norü poramaxã inayanaxoxẽxẽ ga yema nagu naxĩnüexü̃ ga yema nügütama icua̱xüü̃güxü̃.

Wiyaegü 98:1

¡Rü ngexwaca̱xü̃xü̃ i wiyaegu Cori ya Tupanaca̱x pewiyaegü! Yerü muxü̃ma ga mexü̃ ga taxü̃gü norü poramaxã naxü. Rü nachacüxü ya üünene rü poranemaxã tórü uanügüxü̃ narüporamae.

Yema Cuáü̃ nüxü̃ dauxü̃ i yixcüra tá ngupetüxü̃chiga 18:20

Natürü ñu̱xma nax napoxcuxü̃ ya yima ĩane, rü name nixĩ i cutaãxẽ Pa Daxũguxü̃ i Naane. Rü ngẽxgumarüxü̃ ta rü name nixĩ i petaãẽgü i pema i Tupana norü oremaxã pexü̃ namugüxe, rü pema i Tupanaarü orexü̃ ixugüe, rü guxãma i pema i Tupanaarü duü̃xü̃gü ixĩgüxe. Erü ñu̱xma nax napoxcuxü̃ ya yima ĩane, rü ngẽmaãcü Tupana pexü̃ naxütanü naxca̱x ga yema chixexü̃ ga pemaxã naxügüxü̃ ga gumá ĩanecüã̱x”, ñanagürügü.

Ngechuchuarü ngúexü̃gü ga yamugüxü̃arü puracüchiga 16:34

Rü ñu̱xũchi ga nüma ga poxcupataü̃arü dauruxü̃ rü napatawa Pauruxü̃ rü Chíraxü̃ nagagü. Rü õna nüxna naxã rü nataãxẽ ga nüma rü guxü̃ma ga napatacüã̱xgü ta, yerü Tupanaaxü̃́ nayaxõgü.

Ichaía 65:13

Rü Tupana rü ñanagürü ta: —Ngẽma chorü duü̃xü̃gü i choxü̃́ yaxõgüxü̃ rü taxũtáma nataiyae, natürü i pema ya choxna ixĩgachitanüxẽ rü tá pitaiyae. Rü ngẽma chorü duü̃xü̃gü rü tá naxaxegü, natürü i pema rü tá pita̱xawae. Rü ngẽma chorü duü̃xü̃gü rü tá nataãẽgü, natürü i pema rü tá pexãnee.

Wiyaegü 119:111

Rü ngẽma curü mugü nixĩ i chorü ãmare i guxü̃guca̱x ixĩxü̃. Erü ngẽmagü nixĩ i taãxẽ choxna ãxü̃.

Wiyaegü 68:3

Natürü ngẽma mexü̃ ügüxü̃ rü tá nataãẽgü. Rü Tupanape̱xewa rü name nax poraãcü nataãẽgüxü̃.

Wiyaegü 44:3

Rü tama tümaarü poramaxã rü tümanegümaxã nixĩ ga tanayauxgüxü̃ ga ñaa naane. Natürü yema curü poragagu rü curü ngü̃xẽẽgagu nixĩ ga nawa tangugüxü̃ ga yema naane. Yerü cuma rü tüxü̃ cungechaü̃ rü tümamaxã cumecüma.

Wiyaegü 32:11

¡Cori ya Tupanamaxã petaãẽgü, Pa Duü̃xü̃gü i Mexü̃gu Rüxĩnüexü̃x! ¡Rü petaãẽgü rü taãẽmaxã Tupanaxü̃ picua̱xüü̃gü!

Wiyaegü 45:4

Rü cumax, Pa Ãẽ̱xgacüx, rü ngẽma curü poramaxã nüxü̃ curüyexera i guxü̃ma i tórü uanügü rü ícunapoxü̃ i ngẽma ore i aixcüma ixĩxü̃. Rü yíxema duẽxẽgü i tama tügü icua̱xüü̃güxe rü cuma rü tüxü̃ ícupoxü̃. Rü yima curü tügünechacüxümaxã rü taxü̃ i mexü̃gü cuxü.

Wenaxarü naxümatü ga Tupanaarü mugü 12:12

Rü ngẽma nachicawa i Cori ya Tupanape̱xewa rü tá penaxüchiga wüxigu namaxã i penegü rü pexacügü rü perü puracütanüxü̃ rü ngẽma Lebítanüxü̃ i petanüwa maxẽxü̃. Erü nümagü i Lebítanüxü̃ rü taxuxü̃ma i naanegü nayauxgü i perü naanewa.

Wiyaegü 119:54

Rü ñoma i naanewa nax paxaãchi chamaxü̃xü̃gu, rü ngẽma curü mugü nixĩ i chorü wiyae ixĩxü̃, erü choxü̃ nataãẽxẽxẽ.

Wiyaegü 5:12

Erü cuma rü mexü̃ tümamaxã cuxuegu ya yíxema aixcüma cuga ĩnüxe. Rü ngẽma curü ngechaü̃ rü tümaarü poxü̃ruxü̃ nixĩ.

Wiyaegü 111:2

Rü guxü̃ma i ngẽma Cori ya Tupana üxü̃ rü nataxüchi. Rü yíxema aixcüma namaxã taãẽxe i ngẽma Tupana üxü̃ rü nawa tangu̱x.