Wiyaegü 118:1 - Tupanaarü Ore

¹ Pa Duü̃xü̃güx, ¡Cori ya Tupanana moxẽ pexãgü! Erü nüma rü namecümaxüchi rü guxü̃guma tüxü̃ nangechaü̃.

Wiyaegü 118:1 Referans Kwoze

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 16:34

¡Rü moxẽ nüxna pexã ya Cori ya Tupana! Erü nüma rü namecümaxüchi rü ngẽma norü ngechaü̃ rü taguma nagu̱x.

Wiyaegü 107:1

¡Moxẽ nüxna pexãgü ya Cori! Erü nüma rü namecüma rü norü ngechaü̃ rü taguma inayacua̱x.

Wiyaegü 106:1

Name i Cori ya Tupanaxü̃ ticua̱xüü̃gü. ¡Rü moxẽ nüxna pexã! Erü nüma rü namecüma rü ngẽma norü ngechaü̃ rü taguma inayacua̱x.

Yeremía 33:11

Rü tá nüxü̃ pexĩnüe nax taãẽãcüma aita naxüexü̃ i duü̃xü̃gü rü tá nüxü̃ pexĩnüe nax taãẽãcüma nügümaxã yadexagüxü̃ i ngẽma ãxma̱xgüchaü̃xü̃ rü ãtegüchaü̃xü̃. Rü duü̃xü̃gü rü ñanagürügü tá: “¡Moxẽ nüxna pexã ya yima Cori ya Tupana ya Guxãétüwa Ngẽxmacü, erü nüma rü namecüma rü norü ngechaü̃ rü tagutáma nagu̱x!” ñanagürügü tá. Rü pema rü chopatawa tá penana i perü ãmaregü i namaxã moxẽ choxna pexãgüxü̃. Rü choma rü tá nüxü̃ charüngü̃xẽxẽxü̃ i ñaa naanearü duü̃xü̃gü nax noxrirüxü̃ nataãẽgüxü̃ca̱x. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.

Wiyaegü 118:29

¡Rü nüxna moxẽ pexãgü ya Cori ya Tupana! Erü nüma rü namecümaxüchi rü ngẽma norü ngechaü̃ rü taguma inayagu̱x.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 16:8

—¡Moxẽ nüxna pexãgü ya Cori ya Tupana! ¡Rü norü ngü̃xẽxẽca̱x ípeca! ¡Rü guxü̃ma i nachixü̃anecüã̱xgümaxã nüxü̃ pixu i ngẽma mexü̃gü i pexca̱x naxüxü̃!

Wiyaegü 136:1

¡Moxẽ nüxna pexãgü ya Cori ya Tupana! Erü nüma rü namecümaxüchi rü ngẽma norü ngechaü̃ rü taguma inayagu̱x.

Wiyaegü 103:17

Natürü ngẽma Tupanaarü ngechaü̃ tümaca̱x ya yíxema naga ĩnüexe rü taguma inayacua̱x. Rü tümaxacügüwa naxüe nax guxü̃guma Tupana tümamaxã mecümaxü̃ ya yíxema mea yanguxẽẽgüxe i norü uneta rü tama nüxü̃ irüngümaexe nax naga taxĩnüexü̃ i norü mugü.

Wiyaegü 100:5

Erü nüma ya Cori rü namecüma rü ngẽma norü ngechaü̃ rü guxü̃guma nangẽxmaecha. Rü ngẽma nax yaxaixcümaxü̃ rü taguma inayacua̱x.