Wiyaegü 109:13 - Tupanaarü Ore

¹³ ¡Rü noxtacüma guxü̃ yue i nataagü nax ngẽmaãcü yanaxoxochixü̃ca̱x i nape̱xeégagü!

Wiyaegü 109:13 Referans Kwoze

Ucu̱xẽgüchiga 10:7

Yimá yatü ya mea maxü̃cü, rü mexü̃maxã nüxna tacua̱xãchi, natürü ngẽma yatü i chixexü̃gu maxü̃xü̃, rü duü̃xü̃gü rü paxa nüxü̃ inarüngümae.

Wiyaegü 37:28

Erü nüma ya Cori ya Tupana rü nüxü̃ nangechaü̃ i ngẽma maxü̃ i we̱xguxü̃, rü taguma tüxü̃ ínawogü ya yíxema aixcüma nawe rüxĩxe. Rü guxü̃gutáma tüxna nadau. Natürü ngẽma chixexü̃gu maxẽxü̃, rü Tupana tá inayanaxoxẽxẽ i nanegü rü nataagü.

Yox 18:19

Rü norü ĩanewa rü taxuxü̃táma i nataagü ínayaxügü, rü taxuxü̃táma i napatacüã̱x namaxẽ.

Yeremía 22:30

Rü Cori ya Tupana rü ñanagürü: —Ngẽxguma poperagu penaxümatüégagu i ñaa yatü i Yeconía, rü yatü i ngexacüxü̃ ñaxü̃ ngẽxma tá pexümatü. Rü yatü i taxuwama mexü̃ ñaxü̃ tá ngẽxma pexümatü. Erü taxuxü̃táma i nanegü ãẽ̱xgacüwa nangu nax Dabíarü tochicaxü̃wa natoxü̃ca̱x rü ngẽmaãcü Yudáanearü ãẽ̱xgacü nax yixĩxü̃ca̱x —ñanagürü ya Cori ya Tupana.

Wiyaegü 21:10

Rü ngẽxgumarüxü̃ ta ñoma i naanewa tá icuyanaxoxẽxẽ i naxacügü rü nataagü i ngẽma curü uanügü.

1 Chamué 3:13

Yerü marü namaxã nüxü̃ chixuchire̱x rü poxcu i taguma guxü̃gu tá chanapoxcue i ngẽma nanegü naxca̱x i ngẽma chixexü̃ i nüma marü nüxü̃ nacuáxü̃. Yerü ga nanegü rü chixexü̃ chomaxã nixugüxe rü nüma rü tama nüxna nachogü naxca̱x ga yema chixexü̃ ga naxügüxü̃.

Wenaxarü naxümatü ga Tupanaarü mugü 29:20

Rü nüma ya Cori ya Tupana rü taxũtáma nüxü̃́ nüxü̃ narüngüma i ngẽma norü chixexü̃, rü naétügu tá nananguxẽxẽ i norü nu. Rü naxca̱x tá ínangugü i guxü̃ma i ngẽma guxchaxü̃gü i ñaa poperagu ümatüxü̃. Rü ñu̱xũchi nataagü i ngẽma yatü rü Tupana rü ñoma i naanewa tá inayanaxoxẽxẽ.

Wenaxarü naxümatü ga Tupanaarü mugü 25:19

Rü ngẽxguma nüma ya Cori ya Tupana rü ngẽma naane i tá pexna naxãxü̃wa nüxü̃ pexü̃ naporamaexẽẽgu i guxü̃ma i ngẽma perü uanügü i ngẽma naanearü ngaicamawa ngẽxmagüxü̃, rü ngẽxguma daiwa perüngü̃gügu, rü ñu̱xũchi tá peyanaxoxẽxẽ i naéga i guxü̃ma i ngẽma duü̃xü̃gü i Amaréxtanüxü̃ nax taxuwama nüxna nacua̱xãchiexü̃ca̱x i ngẽma duü̃xü̃gü. ¡Rü taxṹ i nüxü̃ iperüngümaexü̃ i ngẽma!

Wenaxarü naxümatü ga Tupanaarü mugü 9:14

¡Rü taxṹ i choxna cunachu̱xuxü̃ nax chanadaixü̃ i ngẽma duü̃xü̃gü nax noxtacüma iyanaxoxü̃ca̱x i ñoma i naanewa rü taxúema nüxna cua̱xãchiexü̃ca̱x! Rü ngẽmawena rü tá cuwa chanango̱xẽxẽ i duü̃xü̃gü i ngẽma rüxoxü̃arü yexera iporaxü̃ rü muxũchixü̃”, ñanagürü.

Iraétanüxü̃arü muxchiga 27:4

Rü tama name nax ngẽmaca̱x iyanaxoxü̃ i tümatanüxü̃tanüwa i ngẽma tonatüéga nagagu nax nataxuxü̃ma i wüxi ya tümane i yatüxü̃. ¡Rü ngẽmaca̱x ngẽma tonatüenexẽgütanüwa rü toxna naxã i wüxi i naane! —ngĩgürügügü.

Nüxíraxü̃xü̃ ga popera ga ãẽ̱xgacügüchiga 16:11

Rü yexguma yatocuchigu ga Zimrí nax ãẽ̱xgacü yixĩxü̃ rü inanaxügü nax nadaiaxü̃ ga guxü̃ma ga Baachátanüxü̃. Rü taxuxü̃ma ga yatüxü̃ ínayaxüxẽxẽ ga Baachátanüxü̃wa rü woo namücügütanüxü̃wa nax yemaacü taxuxü̃ma ütanüxü̃ca̱x.

Ester 9:10

Rü guxü̃ma ga yemagü rü Amáü̃ ga Yudíugüarü uanü nanegü nixĩgü. Natürü nüma ga Yudíugü rü tama nanade ga yema Amáü̃ nanegüarü yemaxü̃gü. Rü nüma ga Amáü̃ rü Amedáta nane nixĩ.

Yox 18:17

Rü nachiga rü tá inayarüxo i ñoma i naanewa, rü tagutáma ñuxgu texé nüxna tacua̱xãchi i naéga.

Wiyaegü 21:11

Erü ngẽma curü uanügü rü nagu narüxĩnüe nax chixexü̃gu cuxü̃ nagu̱xẽẽgüxü̃ca̱x, natürü taxũtáma mea nüxü̃́ ínanguxuchi i ngẽma nagu naxĩnüexü̃.