Wiyaegü 10:9 - Tupanaarü Ore

⁹ Rü ñoma leóü̃ i naxmaxü̃wa naeü̃ca̱x idawenüxü̃rüxü̃ nügü nixĩxẽxẽ i ngẽma yatü i chixexü̃. Rü ngéma iyacúxü̃wa tüxü̃ nananguxẽxẽ ya yíxema turaxe nax ngẽmaãcü tüxü̃ yayaxuxü̃ca̱x. Rü ngẽxguma tüxü̃ yayaxu̱xgu rü marü taxucürüwama nüxna tiña.

Wiyaegü 10:9 Referans Kwoze

Wiyaegü 17:12

Rü nümagü rü ñoma leóü̃gürüxü̃ choxü̃ nicu̱xeü̃gü rü choxna nayu̱xgu nax choxü̃ yama̱xgüxü̃ca̱x.

Wiyaegü 59:3

Erü nangẽxma i yatügü i máxwa̱xegüxü̃ i naxca̱x daugüxü̃ nax ñuxãcü tá choxü̃ yama̱xgüxü̃. Ngẽma duü̃xü̃gü i tama ngechaxü̃wa̱xegüxü̃ rü nagu narüxĩnüe nax ñuxãcü tá choxü̃ yama̱xgüxü̃ woo taxuxü̃ma i chixexü̃ chaxü̱xgu rü bai i ta̱xacürü pecadu chaxü̱xgu.

Miquéa 7:2

Rü ñoma i naanewa rü marü nataxuma i duü̃xü̃gü i mexü̃gu rüxĩnüexü̃ rü Tupanamaxã ixaixcümagüxü̃. Rü wüxichigü rü naxca̱x nadau nax ñuxãcü guxchaxü̃ togueca̱x naxüxü̃. Rü ngẽxguma guxchaxü̃ ngẽxmagu, rü guxü̃ma rü ínamemare nax nügü nada̱i̱xü̃.

Wiyaegü 35:10

Rü guxü̃ma i chorü maxü̃maxã rü ñacharügü tá: —¿Texé cumaxã tawüxigu, Pa Cori Pa Tupanax? Erü yíxema ngearü diẽruã̱xgüxe rü taxuxü̃ma tüxü̃́ ngẽxmagüxe, rü cuma rü tüxü̃ ícupoxü̃ nüxna i ngẽma tüxü̃ rüporamaegüxü̃ rü ngẽma chixri tümaarü puracü ütanügüxü̃ —ñachagürü tá.

Ore i mexü̃ ga Cuáü̃ ümatüxü̃ 10:12

Natürü ngẽma diẽruca̱xmare puracüxü̃, rü ngẽxguma aixü̃ nada̱u̱xgu rü carnérugüna ngéma niña. Rü ngẽmaãcü nanaxü erü tama aixcüma norü dauruxü̃ nixĩ i nüma, rü tama noxrü nixĩ i ngẽma carnérugü. Rü ngẽma ai rü carnérugüxü̃ ínayauxü̃ rü ngẽxma tüxü̃ naxüanexẽẽmare.

Chacaría 11:3

Rü ngẽma carnérugüarü dauruü̃gü rü tagaãcü naxauxe erü yimá maxẽ ya imexẽchicü rü marü nixae. Rü nüxü̃ naxĩnüe i ngẽma leóü̃ nax yanginetanücüüxü̃, erü ngẽma naixnecügü i natü i Yudáü̃cutüwa ngẽxmagüxü̃ rü marü nixae.

Abacú 3:14

Rü cumax, Pa Tupanax, rü noxrütama naxnegümaxã cuyama̱x ga yema ãẽ̱xgacü ga chixexü̃ üxü̃ ga yexguma norü churaragümaxã curü duü̃xü̃güca̱x íyaxüãchigu nax ñoma buanecü ya taxüchicürüxü̃ nawoonexẽẽãxü̃ca̱x ga curü duü̃xü̃gü ga tama poraexü̃ nax nügü ínapoxü̃güxü̃.

Amúx 3:4

Rü ngẽxguma naixnecüwa yangunecüxügu i wüxi i leóü̃ rü ngẽmawa nüxü̃ tacua̱x nax ngẽxma naxãẽü̃xü̃. Rü ngẽxguma wüxi i leóü̃acü naxmaxü̃wa yangunecüxügu rü ngẽmawa nüxü̃ tacua̱x nax ta̱xacü ngẽxma yayaxuxü̃.

Echequié 22:29

Rü ngẽma duü̃xü̃gü i taarü naaneã̱xgüxü̃ rü chixexü̃gu namaxẽ rü nangĩ̱xgü. Rü tama aixcüma mea tüxü̃́ nanaxütanü ya yíxema nüxü̃́ puracüexe ya ngearü diẽruã̱xgüxe. Rü chixri tümamaxã inacua̱xgü ya yíxema to i nachixü̃anecüã̱xgü ixĩgüxe.

Auxexü̃chiga 3:10

Rü nüma ga Cori ya Tupana rü ñoma leóü̃ i tüxü̃ ícu̱xẽü̃xü̃rüxü̃ nixĩ cha̱u̱xca̱x. Rü ñoma osu i marü ímemarexü̃ i tüxü̃ iyauxchaü̃xü̃rüxü̃ nixĩ cha̱u̱xca̱x.

Ichaía 32:7

Rü ngẽma dauxcüraxü̃wa̱xexü̃ rü womüxẽẽgu namaxü̃ rü ngẽma nagu naxĩnüxü̃ nixĩ nax chixexü̃ naxüxü̃. Rü ãẽ̱xgacüpe̱xewa doramaxã tüxü̃ nachixechigaxẽxẽ ya yíxema ngearü diẽruã̱xgüxe rü yíxema ngü̃xẽẽca̱x ícaxaxe.

Ichaía 3:15

¿Texé pexü̃ tamu nax chixexü̃gu penayixẽẽxü̃ i chorü duü̃xü̃gü, rü chixri tümamaxã ipecuáxü̃ ya yíxema duü̃xẽgü ya ngearü ngẽmaxü̃xã̱xgüxe? —ñanagürü ya Cori ya Tupana ya Guxãétüwa Ngẽxmacü.

Ucu̱xẽgüchiga 28:15

Wüxi i ãẽ̱xgacü i chixexü̃ i chixri norü duü̃xü̃gü i ngearü diẽruã̱xgüxü̃maxã icuáxü̃, rü ñoma wüxi i leóü̃ i norü numaxã ingĩ̱xinecüüxü̃rüxü̃ nixĩ, rü wüxi i osu i taiyaxüchixü̃rüxü̃ nixĩ i ngẽma ãẽ̱xgacü i chixexü̃.

Ucu̱xẽgüchiga 22:16

Ngẽma diẽruã́xü̃ rü yíxema ngearü diẽruã́xẽaxü̃́ nangĩ̱x nax yexera nadiẽruã́xü̃ca̱x, rü ngẽmagagu düxwa tá ngearü diẽruã̱xwa nangu. Rü ngẽxgumarüxü̃ ta ya yíxema diẽruã́xü̃na ãmare ãxẽ rü ngearü diẽruã̱xwa tá tangu.

Ucu̱xẽgüchiga 14:31

Tupanaaxü̃́ nangu̱x i ngẽxguma texé wüxi i ngearü diẽruã́xẽmaxã chixri icua̱xgu. Natürü Tupana rü tümamaxã nataãxẽ ya yíxema ngearü diẽruã́xẽmaxã mea icuáxe.

Wiyaegü 140:5

Rü ngẽma duü̃xü̃gü i nügü icua̱xüü̃güxü̃ rü chopexegu nanaxǘgü i wüxi i norü yauxruxü̃. Rü choxü̃ niwaiyemaxü̃gü namaxã i ngẽma norü yauxruxü̃ rü norü bocupararuxü̃.

Wiyaegü 12:5

Natürü nüma ya Cori ya Tupana rü ñanagürü: —Choma rü tá tümaétüwa chachogü rü tá tüxü̃ charüngü̃xẽxẽ ya yíxema ngearü diẽruã̱xgüxe rü turaexe rü chixri tümamaxã inacua̱xgüxe. Erü ngẽma nixĩ i tanaxwa̱xegüxü̃ ya yíxema ngúxü̃ ingegüxe —ñanagürü.

Ngechuchuarü ngúexü̃gü ga yamugüxü̃arü puracüchiga 23:21

¡Natürü taxũtáma nüxü̃́ cuyaxõ! Erü 40 arü yexera i yatügü rü marü nügümaxã inaxunetagü, rü ñanagürügü: “Tachixexü̃gugü tá ega ta̱xacü ingõ̱xgügu rüe̱xna ixaxegügu naxü̃pa nax yamáxü̃ i Pauru”, ñanagürügü. Rü ñu̱xma rü marü ínamemaregü nax namagu nana̱i̱xgüaxü̃, rü curü orexicatama nixĩ i ñu̱xma ínangu̱xuxẽẽgüxü̃ —ñanagürü.

Abacú 1:15

Rü ngẽma Cadéugü rü to i nachixü̃anecüã̱xgüxü̃ ínayauxü̃, ñoma wüxi i choxniexü̃ norü poxwamaxã rüe̱xna norü püchamaxã choxni íyauxü̃rüxü̃. Rü ngẽxguma wüxigu nanuãgu i choxni rü nüma rü nataãxẽ.

Yeremía 5:26

Erü chorü duü̃xü̃gütanüwa rü nangẽxma i yatügü i chixexü̃ ügüxü̃. Rü ngẽma yatügü rü ñoma werigüca̱x yüta ixüxü̃rüxü̃ norü doramaxã chixexü̃gu nanayixẽxẽ i ngẽma togü i duü̃xü̃gü.

Wiyaegü 37:14

Rü ngẽma chixexü̃gu rüxĩnüexü̃ rü norü tara nanatúxuchi, rü norü würaxü̃ natú nax tüxü̃ namaxü̃xü̃ca̱x ya yíxema taxuxü̃ma tüxü̃́ ngẽxmaxe rü yíxema mexü̃gu rüxĩnüxe. Rü ngẽmaãcü tüxü̃ nadaixchaü̃ ya yíxema mecümagüxe.

Wiyaegü 109:31

Erü nüma ya Tupana rü tümaétüwa nachogü ya yíxema ngearü ngẽmaxü̃ã̱xgüxe. Rü naxme̱xwa tüxü̃ ínapoxü̃ i ngẽma tüxü̃ íxuaxü̃güxü̃.