Popera ga Títoca̱x naxümatüxü̃ ga Pauru 3:7 - Tupanaarü Ore

⁷ Rü yemaacü tamaxã namecüma rü tüxü̃ narüngü̃xẽxẽ ga Tupana nax nape̱xewa imexü̃ca̱x rü nayauxgüxü̃ca̱x i ngẽma ãmare i maxü̃ i taguma gúxü̃ i írüngu̱xẽẽgüxü̃.

Popera ga Títoca̱x naxümatüxü̃ ga Pauru 3:7 Referans Kwoze

Romanos 8:17

Rü yixema nax Tupanaxacügü ixĩgüxü̃, rü nüxü̃ tacua̱x rü daxũguxü̃ i naanewa tá tanayaxu i ngẽma mexü̃gü ya Tupana tá tüxna ãxü̃. Rü aixcüma Cristurüxü̃ tá tanayaxu i ngẽma mexü̃gü, erü naxrüxü̃ ngúxü̃ tingegü nax wüxigu nüma ínangexmaxü̃wa ingexmagüxü̃ca̱x.

Romanos 3:24

Natürü Tupana rü tamaxã namecüma rü yemaca̱x tüxü̃́ nangetanüãcüma tüxü̃ nimexẽẽgü nax nape̱xewa imexü̃ca̱x. Erü Ngechuchu ya Cristu marü tüxü̃́ nanaxütanü ga tórü pecadugü nax tama ipoxcuexü̃ca̱x.

Popera ga Títoca̱x naxümatüxü̃ ga Pauru 2:11

Tupana rü poraãcüxüchima tamaxã namecüma, rü yemaca̱x núma nanamu ga Nane nax guxü̃ma i duü̃xü̃güaxü̃́ nangẽxmaxü̃ca̱x i maxü̃ i taguma gúxü̃.

1 Corintios 6:11

Rü yexgumarüü̃tama pixĩgü ga ñuxre ga pema ga ü̃pax. Natürü i ñu̱xma ya Tupana rü marü pexü̃́ ínanapi i perü chixexü̃ nax noxrüxicatama pixĩgüxü̃ca̱x. Rü ñu̱xma rü nape̱xewa pime yerü Naãxẽ ya Üünexü̃ rü tórü Cori ya Ngechuchu ya Cristuégagu marü perü pecaduna pexü̃ ínanguxü̃xẽxẽ.

Popera ga Chantiágu ümatüxü̃ 2:5

Pa Chauenexẽgü ya Pexü̃ Changechaü̃güxe, ¡Iperüxĩnüe i ñaa ore! Tupana tüxü̃ nade ya yíxema ñoma i naanewa ngearü diẽruã̱xgüxe, erü nanaxwa̱xe nax nüxü̃́ tayaxõgüxü̃ rü tanayauxgüxü̃ i ngẽma maxü̃ i taguma gúxü̃ i tümamaxã inaxunetaxü̃ ya yíxema nüxü̃ ngechaü̃güxe.

Gálatas 2:16

Rü nüxü̃ tacua̱xgü rü yema mugü ga Moiché ümatüxü̃ rü tama aixcüma tüxü̃ nimexẽxẽ i Tupanape̱xewa, yerü taxúema aixcüma naga taxĩnüe ga yema mugü. Natürü i ñu̱xma rü Tupana tüxü̃ nadau nax imexü̃ erü Ngechuchu ya Cristuaxü̃́ tayaxõgü. Rü yemaca̱x i yixema rü Ngechuchu ya Cristuaxü̃́ tayaxõgü nax ngẽmagagu Tupana tüxü̃ nadauxü̃ nax imexü̃. Rü ngẽmawa nüxü̃ tacua̱xgü rü tama ngẽma mugügagu nixĩ nax Tupanape̱xewa imexü̃, erü taxúema aixcüma naga taxĩnü i ngẽma mugü nax ngẽmaãcü Tupanape̱xewa imexü̃ca̱x.

Romanos 11:6

Rü ñu̱xma nax Tupana tüxü̃ ngechaü̃xü̃gagu tüxü̃ nadexü̃, rü taxucürüwama texé nüxü̃ tixu nax ta̱xacürü mexü̃ nax ixügüxü̃gagu yixĩxü̃ i tüxü̃ nadexü̃. Erü ngẽxguma chi ta̱xacürü mexü̃ ixügüxü̃gagu yixgu nax tüxü̃ nadexü̃, rü natüca̱xmamare chi nixĩ nax nüxü̃́ ingechaü̃tümüxü̃güxü̃.

Gálatas 3:29

Rü ñu̱xma nax Cristuarü pixĩgüxü̃, rü ngẽmaca̱x nixĩ i aixcüma Abraáü̃taagü pixĩgü. Rü ngẽmaca̱x i pema rü tá ta penayaxu i guxü̃ma ga yema Abraáü̃maxã inaxunetaxü̃ ga Tupana.

Romanos 4:16

Rü yexguma Tupana Abraáü̃maxã ixunetagu nax nüxü̃ tá nangü̃xẽẽxü̃, rü Abraáü̃arü õgagu nixĩ ga namaxã inaxunetaxü̃. Rü ngẽmaca̱x i guxãma i yixema nax Abraáü̃rüxü̃ yaxõgüxü̃ rü taxca̱x ta nixĩ ga yema Tupanaarü uneta ga Abraáü̃maxã nüxü̃ yaxuxü̃. Rü ngẽmawa nüxü̃ tacua̱x rü tama yíxema mugü auregüxeca̱xicatama nixĩ i ngẽma Tupanaarü uneta, natürü guxãma ya yíxema Abraáü̃rüxü̃ Tupanaaxü̃́ yaxõgüxeca̱x ta nixĩ. Rü ñu̱xma rü guxãma i yixema nax Abraáü̃rüxü̃ mea yaxõgüxü̃ rü Abraáü̃xacügü tixĩgü rü nüma rü tanatü nixĩ i Tupanape̱xewa yerü nüxíra nayaxõ.

Romanos 3:28

Rü yixema nüxü̃ tacua̱x rü ngẽxguma Cristuaxü̃́ yaxõgügu nixĩ i Tupanape̱xewa imexü̃, rü tama ngẽma mugü nax ixauregüxü̃ca̱x nixĩ i nape̱xewa imexü̃.

Nüxíraxü̃xü̃ ga popera ga Pedru ümatüxü̃ 3:7

Rü ngẽxgumarüxü̃ ta i pemax, Pa Yatügüx, rü name nixĩ i mea pexma̱xü̃ pengechaü̃gü rü yáxna ngĩmaxã pexĩnüe, erü ngĩma rü irüturamae. Rü name nixĩ i ngĩmaxã petaãẽgü erü Tupana pexna naxãxü̃rüxü̃ ngĩxna nanaxã i maxü̃ i taguma gúxü̃. Rü name nixĩ i ngẽmaãcü mea ngĩxü̃ pengechaxü̃gü nax taxuxü̃ma yatoxyepe̱xexü̃ca̱x i perü yumüxẽgü.

Popera ga Yudíugü ga yaxõgüxü̃ca̱x ümatüxü̃ 11:9

Rü yexguma nawa nanguxgu ga yema naane ga Tupana namaxã ixunetaxü̃, rü wüxi ga to ga nachixü̃anecüã̱xrüxü̃ ĩpata ga naxchirunaxca̱xmaxãmare naxãpata. Rü yexgumarüü̃tama ga nane ga Ichaá rü nataxa ga Acóbu rü yema naanewa ĩpata ga naxchirunaxca̱xmaxãmare naxãpatagü, rü naxca̱xgü rü ta nixĩ ga yema uneta ga Tupana Abráü̃maxã nüxü̃ ixuxü̃.

Popera ga Yudíugü ga yaxõgüxü̃ca̱x ümatüxü̃ 11:7

Rü yexguma Noémaxã yadexaxgu ga Tupana, rü nüma ga Noé rü nayaxõ rü naga naxĩnü. Rü Tupana rü namaxã nüxü̃ nixu rü tá ínanguxü̃ ga mucü ga taxüchicü ga taguma duü̃xü̃gü nüxü̃ daucü rü tá guxü̃wama inanguanexẽẽcü. Rü Tupana namaxã nüxü̃ nixu nax naxüaxü̃ca̱x ga wüxi ga wapuru ga taxü̃ne nax tama nayuexü̃ca̱x ga nüma rü naxma̱x rü nanegü rü naneã̱xgü. Rü Tupanaga naxĩnü ga Noé, rü nanaxü ga gumá wapuru, rü yemaacü tama nayue ga nüma rü napatacüã̱x yerü Tupanaaxü̃́ nayaxõ. Natürü yema togü ga duü̃xü̃gü rü tama Noérüxü̃ nayaxõgü, rü yemaca̱x Tupana nanapoxcue. Rü nüma ga Tupana rü Noéxü̃ nixu nax nape̱xewa namexü̃, yerü nüxü̃́ nayaxõ.

Popera ga Yudíugü ga yaxõgüxü̃ca̱x ümatüxü̃ 6:17

Rü yemaca̱x ga Tupana rü yexguma inaxunetagu namaxã ga yema duü̃xü̃gü ga nayauxgüxü̃ tá ga yema ngü̃xẽxẽ ga Tupana nüxna ãxchaü̃xü̃, rü nügüégagutama inaxuneta, yerü nanaxwa̱xe nax meama nüxü̃ nacua̱xgüxü̃ nax aixcüma tá yangu̱xẽẽãxü̃ rü tagutáma naxüchicüüãxü̃ ga yema uneta ga namaxã nüxü̃ yaxuxü̃.

Gálatas 4:7

Rü ngẽmaca̱x i ñu̱xma rü Tupanaxacüxüchi quixĩ, rü tama norü mugüruü̃mare quixĩ. Rü ñu̱xma nax naxacüxüchi quixĩxü̃, rü norü ngúchaü̃ nixĩ nax Cristugagu cuxna naxããxü̃ i ngẽma maxü̃ i taguma gúxü̃.

Romanos 4:4

Rü ngẽxguma texéaxü̃́ wüxi i puracü ütanügu rü tümaarü puracütanü nixĩ i ngẽma, rü tama tümaarü ãmare nixĩ.

Popera ga Títoca̱x naxümatüxü̃ ga Pauru 2:13

Rü name nax ngẽmaãcü mea imaẽxü̃ ñu̱xma nax ínangu̱xẽẽgüxü̃ nax nataeguxü̃ ya Ngechuchu ya Cristu ya tórü Maxẽxẽxẽruxü̃ ya tórü Tupana ya tacü ixĩcü.

Ore i mexü̃ ga Matéu ümatüxü̃ 25:34

Rü ngẽxguma i nüma ya Ãẽ̱xgacü rü tá ñanarügü nüxü̃ i ngẽma norü tügünecüwawa ngẽxmagüxü̃: “¡Nua pexĩ i pemax ya Chaunatü mexü̃ pemaxã uegugüxe! ¡Rü nüma ãẽ̱xgacü íyixĩxü̃wa pichocu rü penayaxu i pechica ga noxritama naane naxü̱xgu pexca̱x namexẽẽxü̃!

Ore i mexü̃ ga Márcu ümatüxü̃ 10:17

Rü yexguma marü inaxũãchichaü̃gu ga Ngechuchu, rü yéma naxca̱x niña ga wüxi ga yatü. Rü nape̱xegu nayacaxã́pü̱xü, rü nüxna naca rü ñanagürü nüxü̃: —Pa Ngúexẽxẽruxü̃ ya Mecü, ¿ta̱xacü tá chaxüxü̃ nax chanayaxuxü̃ca̱x i maxü̃ i taguma gúxü̃? —ñanagürü.

2 Tesalonicenses 2:16

Rü tórü Cori ya Ngechuchu ya Cristu rü Tanatü ya Tupana ya tüxü̃ ngechaü̃cü rü guxü̃guma taãxẽ tüxna ãcü rü marü tamaxã namecüma rü ngẽmaca̱x tamaxã inaxuneta nax guxü̃gutáma naxü̃tawa ingẽxmagüxü̃.

Popera ga Yudíugü ga yaxõgüxü̃ca̱x ümatüxü̃ 1:14

Rü guxü̃ma i Tupanaarü orearü ngeruü̃gü i daxũcüã̱x rü naãxẽgü i Tupanaaxü̃́ puracüexü̃ nixĩgü. Rü nüma ya Tupana rü nanamugü nax nüxü̃ yanangü̃xẽẽgüxü̃ca̱x i guxü̃ma i ngẽma duü̃xü̃gü ya Tupana naxwa̱xexü̃ nax nayauxgüãxü̃ i maxü̃ i taguma gúxü̃.