Popera ga Títoca̱x naxümatüxü̃ ga Pauru 3:10 - Tupanaarü Ore

¹⁰ Rü ngẽxguma chi petanüwa wüxíe ta̱xacürü ngu̱xẽẽtaemaxã ngẽma yaxõgüxü̃xü̃ titoyegu, rü name i wüxicana rüe̱xna taxree̱xpü̱xcüna tümaca̱x cuca rü tüxü̃ cuxucu̱xẽ nax tama ngexü̃ tawagüxü̃ca̱x. Rü ngẽxguma chi tama cuga taxĩnüchaü̃gu rü tanaxüamagu i ngẽma chixexü̃ rü name i noxtacüma tüxü̃ ícumuxũchi natanüwa i ngẽma yaxõgüxü̃.

Popera ga Títoca̱x naxümatüxü̃ ga Pauru 3:10 Referans Kwoze

Romanos 16:17

Pa Chauenexẽgüx, pexü̃ chaca̱a̱xü̃ nax pegüna pedaugüxü̃ca̱x nüxna i ngẽma duü̃xü̃gü i pexü̃ itoyechaü̃xü̃ rü chixexü̃gu pexü̃ yixẽẽchaü̃xü̃. Erü ngẽma duü̃xü̃güarü ngu̱xẽẽtae rü tama namaxã nawüxigu i ngẽma ngu̱xẽẽtae ga noxri peyauxgüxü̃ ga yexguma noxri peyaxõgügu. Rü name nixĩ i noxtacüma nüxna pixĩgachi i ngẽma duü̃xü̃gü rü tama natanügu pexãgü.

Norü taxre ga popera ga Cuáü̃ ümatüxü̃ 1:10

Rü ngẽxguma chi wüxi i duü̃xü̃ petanüwa nguxgu, rü tama yema Cristu tüxü̃ ngúexẽẽxü̃maxã pexü̃ nangúexẽẽgu, rü ¡taũtáma penayaxu i pechiü̃wa rü bai i nüxü̃ perümoxẽgü!

Norü taxre ga popera ga Timutéuca̱x naxümatüxü̃ ga Pauru 3:5

Rü tá nügü nayaxõgünetaxẽxẽ natürü ngẽma norü chixexü̃ i naxügüxü̃wa tá nango̱xoma nax tama aixcüma yaxõgüãxü̃ i ngẽma ore i mexü̃. Rü ngẽma duü̃xü̃gü i ngẽmaãcü maxẽxü̃, rü tama name nax namaxã cuxãmücüxü̃ rü natanügu cuxãxü̃.

2 Tesalonicenses 3:14

Rü ngẽxguma texé tama naga ĩnügu i ñaa ore i poperawa pemaxã nüxü̃ tixuxü̃, rü name i penangugü nax texé tixĩxü̃. Rü tama name i tümamaxã pexãmücü nax taxãneexü̃ca̱x i tümax.

2 Tesalonicenses 3:6

Pa Chauenexẽgüx, tórü Cori ya Ngechuchu ya Cristuégagu pexü̃ tamu nax nüxna pixĩgachixü̃ca̱x i ngẽma yaxõxü̃ i tama nagu ixũxü̃ i ngẽma pexü̃ tangúexẽẽxü̃.

Gálatas 5:20

Rü tupananetachicüna̱xãgüxü̃ nicua̱xüü̃gü, rü yuüca̱x nangúe, rü aigu narüxĩnüe, rü nachoxü̃gawa̱xegü, rü ta̱xacü ninuxü̃wa̱xegü, rü nanuxwa̱xegü, rü duü̃xü̃güxü̃ naxucu̱xẽgü nax tama wüxigu naxĩnüexü̃ca̱x. Rü nayatoye i duü̃xü̃gü, rü nügü nixüxchimüü̃gü.

Gálatas 5:12

Natürü ngẽma duü̃xü̃gü i pexü̃ chixeãẽgüxü̃ rü pexü̃ ucu̱xẽgüxü̃ nax pegü ípewíü̃cha̱xmüü̃pe̱xechiraü̃xü̃ca̱x, rü ¿tü̱xcüü̃ ẽ̱xna i nümagü i taxũ noxtacüma nügü yacaugüpü̱xücharexexü̃ ta?

1 Corintios 11:19

Choma rü nüxü̃ chacua̱x nax woetama aixcüma yixĩxü̃ nax pegü pitoyexü̃ nax ngẽmawa nüxü̃ icuáxü̃ca̱x nax texégü tixĩxü̃ ya yíxema aixcüma Cristuarü duü̃xü̃gü ixĩgüxe.

2 Corintios 13:2

Rü ñu̱xma nax woo pexna chayáxü̃guxü̃ rü yema ucu̱xẽ ga petanüwa pemaxã nüxü̃ chixuxü̃ rü wenaxarü pexna nüxü̃ chacua̱xãchixẽxẽ. Rü ngẽxguma tá wena petanüwa chaxũxgu rü aixcüma tá chanamexẽxẽ i guxü̃ma i ngẽma chixexü̃ i ngéma ngẽxmaxü̃. Rü taũtáma tüxü̃ chaxüpetümare ya yíxema woetama pecadu ügüechaxe rü guxãma ya yíxema chixri maxẽxe

Norü taxre ga popera ga Pedru ümatüxü̃ 2:1

Nũxcüma rü Yudíugütanüwa nayexma ga Tupanaarü orearü uruü̃güneta. Rü ngẽxgumarüxü̃ tá ta petanüwa nangẽxma i ngu̱xẽẽruü̃netagü. Rü nümagü rü cúãcü tá doramaxã nanaxüchicüxü i Tupanaarü ore, rü ngẽmaãcü tá nayaxã ya yimá tórü Cori ya norü Maxẽxẽẽruü̃chire̱x ixĩcü. Rü ngẽmagagu tá noxtacüma napoxcue i ngẽma duü̃xü̃gü i ngẽmaãcü maxẽxü̃, rü paxa tá inayarüxogü.