Popera ga Títoca̱x naxümatüxü̃ ga Pauru 2:10 - Tupanaarü Ore

¹⁰ Rü tama name i norü coriaxü̃́ nangĩ̱xgü, natürü nanaxwa̱xe i aixcüma meama norü corixü̃ nangechaxü̃gü rü tama nanawomüxẽẽgü. Rü ngẽxguma ngẽmaãcü namaxẽgu, rü guxü̃ma i togü i duü̃xü̃gü rü tá nüxü̃ nadaugü nax aixcüma namexẽchixü̃ i ngẽma ore i duü̃xü̃güxü̃ namaxã ingúexẽẽxü̃ nachiga ya Tupana ya tórü Maxẽxẽẽruxü̃.

Popera ga Títoca̱x naxümatüxü̃ ga Pauru 2:10 Referans Kwoze

Ore i mexü̃ ga Matéu ümatüxü̃ 5:16

Rü name nixĩ i duü̃xü̃güpe̱xewa mea pemaxẽxü̃. Rü ngẽxguma i pema rü duü̃xü̃güca̱x rü ñoma omügürüxü̃ pixĩgü. Rü ngẽmaãcü i duü̃xü̃gü rü tá nüxü̃ nadaugü i ngẽma mexü̃ i pexüxü̃, rü tá nüxü̃ nicua̱xüü̃gü ya Penatü ya daxũwa ngẽxmacü.

Nüxíraxü̃xü̃ ga popera ga Pedru ümatüxü̃ 2:12

Rü name nixĩ i mea pemaxẽ nape̱xewa i ngẽma duü̃xü̃gü i tama Tupanaxü̃ cua̱xgüxü̃. Rü woo ñu̱xma chixri pechiga yadexagügu, natürü tá nüxü̃ nadaugü i ngẽma mexü̃ i pexügüxü̃, rü tá Tupanaxü̃ nicua̱xüü̃gü i ngẽma ngunexü̃ i nagu Tupana guxãxü̃ma icagüxü̃gu.

Norü taxre ga popera ga Cuáü̃ ümatüxü̃ 1:9

Rü yíxema nangupetüxẽẽ́xe ga yema Cristu tüxü̃ ngúexẽẽxü̃, rü tama Tupanaxü̃ tacua̱x. Natürü yíxema tama nüxna íchoxü̃xẽ ga yema Cristu tüxü̃ ngúexẽẽxü̃, rü aixcüma nüxü̃ tacua̱x ya Tanatü ya Tupana rü Nane ya Ngechuchu.

Efesios 4:1

Rü ñu̱xma i choma nax Cristuaxü̃́ chapuracüxü̃gagu chapoxcuxü̃, rü pexü̃ chaca̱xaxü̃ nax ngẽma duü̃xü̃gü ga Tupana naxca̱x naca̱xaxü̃rüxü̃ mea pemaxẽxü̃. Rü pexca̱x nixĩ ga naca̱xaxü̃ ga Tupana nax norü duü̃xü̃gü pixĩgüxü̃ca̱x.

Nüxíraxü̃xü̃ ga popera ga Pedru ümatüxü̃ 3:16

Natürü name nixĩ i tama pegü picua̱xüü̃güãcüma penangãxü̃ rü tama pegügu perüxĩnüeãcüma nax ngẽma duü̃xü̃güarü yexera pixĩgüxü̃. Rü name nixĩ i mea pemaxẽ nax taxuca̱xma pexoegaãẽgüxü̃ca̱x. Rü ngẽxguma ngẽmaãcü pemaxẽgu rü tá naxãnẽxẽ i ngẽma duü̃xü̃gü i chixri pechiga idexagüxü̃ naxca̱x nax Cristuca̱x pemaxẽxü̃.

Popera ga Títoca̱x naxümatüxü̃ ga Pauru 1:3

Rü ñu̱xma rü marü nawa nangu nax Tupana tüxü̃ nüxü̃ cua̱xẽẽxü̃ i ngẽma norü ore i mexü̃ i tüxü̃ maxẽxẽẽxü̃. Rü ngẽmaca̱x nümatama ya Tupana ya tórü Maxẽxẽxẽruxü̃ choxü̃ namu nax nüxü̃ chixuxü̃ca̱x i ngẽma norü ore.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:3

Rü ngẽxguma chi tangẽxmagu ya wüxíe ya namaxã tangu̱xẽẽtaegu i wüxi i ngu̱xẽẽtae i tama namaxã wüxiguxü̃ i tórü ngu̱xẽẽtae i aixcüma mexü̃, rü tama namaxã wüxiguxü̃ i tórü Cori ya Ngechuchu ya Cristuarü ngu̱xẽẽtae i mexü̃, rü tama namaxã wüxiguxü̃ i ngẽma ngu̱xẽẽtae i Tupanaarü orewa ngóxü̃, rü tügü ticua̱xüxü̃ rü taxuxü̃ma tacua̱x. Rü ngẽmaca̱x ngexü̃rüüxü̃mare i dexaca̱x rü tachoxü̃gawa̱xe, rü tama texéga taxĩnüchaü̃. Rü düxwa ñoma tida̱xawexü̃rüxü̃ tixĩ namaxã i ngẽma tümacüma. Rü ngẽmagagu rü taxãũxãchiwa̱xe, rü tanuxwa̱xe, rü taguxchigawa̱xe, rü taxúeãxü̃ma tayaxõ.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:1

Guxãma ya yíxema yaxõgüxe ya mugüruxü̃gü ixĩgüxe, rü tanaxwa̱xe i tümaarü corigüga taxĩnüe rü nüxü̃ tangechaxü̃ nax ngẽmaãcü taxúema Tupanachiga rü tórü ngu̱xẽẽtaechiga chixri idexagüxü̃ca̱x.

1 Corintios 4:2

Rü ngẽxguma texé wüxi i puracü tüxna ãxgu, rü name nixĩ i mea tayanguxẽxẽ i ngẽma puracü nax ngẽmaãcü tügü itawéxü̃ca̱x nax wüxi i duü̃xü̃ i mexü̃ tixĩxü̃.

Ore i mexü̃ ga Luca ümatüxü̃ 16:10

Yíxema mea namaxã icuáxe ega woo noxretama tümame̱xẽwa ngẽxmagu, rü ngẽxguma muxü̃ma tümame̱xẽwa ngẽxmagu rü tá ta mea namaxã itacua̱x. Natürü yíxema chixri namaxã icuáxe ega noxretama tümame̱xẽwa ngẽxmagu, rü ngẽxguma muxü̃ma tümame̱xẽwa ngẽxmagu rü ngẽxgumarüxü̃ tá ta chixri namaxã itacua̱x.

Ore i mexü̃ ga Matéu ümatüxü̃ 24:45

¿Rü texé tixĩxü̃ ya tümaarü coriarü duü̃xü̃ ya aixcüma yanguxẽẽ́xẽ rü tümaãẽxü̃ cuáxe? ¿Tama ẽ̱xna yíxema tixĩxü̃ ya tümaarü cori tüxna ãgaxe nax mea nüxna tadauxü̃ca̱x rü mea oragu tanachibüexẽxẽxü̃ca̱x i norü duü̃xü̃gü?

Wiyaegü 101:6

Rü tá naxca̱x chadau i yatügü i aixcüma mea maxẽxü̃ nax chauxü̃tawa nangẽxmagüxü̃ca̱x rü chorü ngü̃xẽẽruü̃gü yixĩgüxü̃ca̱x.

1 Chamué 26:23

¡Rü Tupana tüxü̃́ naxütanü ya wüxíechigü naxca̱x i ngẽma mexü̃ nax taxüxü̃ rü ngẽma nax tixaixcümaxü̃! Rü woo nüma ya Cori ya Tupana rü ñoma i ngunexü̃gu cho̱xme̱xgu cuxü̃ nanguxẽxẽ, Pa Ãẽ̱xgacüx, rü tama cuxü̃ chiima̱x, erü nüma ya Cori ya Tupana nixĩ ga ãẽ̱xgacüxü̃ cuxü̃ naxunetaxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 5:17

Rü ngẽma yaxõgüxü̃arü ãẽ̱xgacügü i aixcüma meama ngẽma yaxõgüxü̃maxã icua̱xgüxü̃, rü name nixĩ i ngẽma yaxõgüxü̃ aixcüma nüxü̃ nangechaü̃gü rü namaxã nataãẽgü. Rü yexera name i nüxü̃ nangechaü̃gü rü namaxã nataãẽgü i ngẽma Tupanaarü orexü̃ ixugüxü̃ rü nangúexẽẽxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 1:1

Pa Timutéux, cuxü̃ charümoxẽ. Rü choma i Pauru nixĩ i cuxca̱x chanaxümatüxü̃ i ñaa popera. Rü choxü̃ nixĩ i namuxü̃ ya Tupana ya tüxü̃ maxẽxẽẽcü rü tórü Cori ya Ngechuchu ya Cristu ya ínanguxẽẽgücü nax wena núma naxũxü̃. Pa Timutéux, cuma rü chaune quixĩ i Tupanaarü orewa. Rü chanaxwa̱xe nax Tanatü ya Tupana rü tórü Cori ya Ngechuchu ya Cristu cuxna naxãxü̃ i norü ngü̃xẽxẽ rü norü ngechaü̃ rü norü taãxẽ.

Filipenses 4:8

Rü ñu̱xma Pa Chauenexẽgüx, rü name nixĩ i nagu perüxĩnüe i guxü̃ma i ngẽma ore i aixcüma ixĩxü̃, rü guxü̃ma i ngẽma nacüma i taxucürüwama texé chixri nachiga idexaxü̃. Rü name nixĩ i nagu perüxĩnüe i guxü̃ma i ngẽma ore i aixcüma mea iwéxü̃, rü guxü̃ma i ngẽma Tupanape̱xewa mexü̃, rü guxü̃ma i nacümagü i duü̃xü̃gü namaxã taãẽxü̃, rü guxü̃ma i ngẽma nacümagü i duü̃xü̃gü mea nachiga idexagüxü̃. Rü ngẽmaãcü name nixĩ i nagu perüxĩnüe i guxü̃ma i ngẽma nacümagü i mexü̃ nax nüxü̃ icua̱xüü̃güxü̃.

Filipenses 1:27

Rü ngẽma guxü̃arü yexera rümemaexü̃ nixĩ nax naxca̱x pedauxü̃ nax mea pemaxẽxü̃, ngẽma Cristuarü ore pemaxã nüxü̃ ixuxü̃rüxü̃. Rü ngẽxguma petanüwa chaxũxgu rü ẽ̱xna woo tama ngéma chaxũxgu, natürü nüxü̃ chaxĩnüchaü̃ nax guxãma wüxigu pegü peporaexẽẽxü̃ nax taguma nüxü̃ perüchauxü̃ca̱x nax peyaxõgüxü̃, rü ngẽmaãcü Tupanaaxü̃́ pepuracüexü̃ nax yexeraãcü yaxũchigüxü̃ca̱x i norü ore.

Ichaía 12:2

Rü Tupana nixĩ ya choxü̃ maxẽẽcü, rü ngẽmaca̱x nüxna charüyoe rü taxuca̱xma tü̱xcüü̃ chamuü̃. Rü nüma ya Cori ya Tupana nixĩ i chorü cu̱xchicaxü̃ rü chorü poraxẽẽruxü̃. Rü nüma nixĩ i chorü maxẽẽruxü̃ —ñacurügü tá.

1 Chamué 22:14

Rü yexguma ga Aimérex rü ãẽ̱xgacüxü̃ nangãxü̃ rü ñanagürü: —¿Texé i guxü̃ma i curü churaragüerutanüwa, Pa Ãẽ̱xgacüx, i aixcüma cuga ĩnüxe Dabírüxü̃? Rü naétü, Pa Ãẽ̱xgacüx, rü cuã̱xte nixĩ rü naeru nixĩ i ngẽma churaragü i cuxna daugüxü̃. Rü ngẽmaca̱x natachiga i cupatawa, Pa Ãẽ̱xgacüx.

Ore i mexü̃ ga Cuáü̃ ümatüxü̃ 12:6

Natürü ga Yúda rü tama aixcüma nagu narüxĩnü ga yema ngearü diẽruã̱xgüxü̃. Natürü yema ñanagürü yerü nüma rü wüxi ga ngĩ́ta̱xaxü̃ nixĩ. Rü naxme̱xwa nayexma ga yema choca ga diẽru nagu naxǘgüxü̃ ga Ngechuchu rü norü ngúexü̃gü. Rü Yúda rü ñuxguacü rü noxrüxü̃tama ngĩxne nangĩ̱xĩxü̃.

Ore i mexü̃ ga Luca ümatüxü̃ 1:47

Rü chorü Cori ya chorü Maxẽxẽruü̃maxã chataãẽxü̃chi.

Ore i mexü̃ ga Luca ümatüxü̃ 1:80

Rü gumá bucü rü niyachigü rü wüxichigü ga ngunexü̃gu yexeraãcü Tupanagu narüxĩnü rü naxca̱x namaxü̃. Rü chianexü̃ ga taxúema íxãpataxü̃wa nayexma ñu̱xmata nawa nangu ga yema ngunexü̃ ga Iraétanüxü̃ca̱x nügü nango̱xẽẽxü̃.

Popera ga Títoca̱x naxümatüxü̃ ga Pauru 3:4

Natürü nüma ya Tupana ya tórü Maxẽxẽxẽruxü̃ rü tüxü̃ nanawe̱x i norü mecüma rü norü ngechaü̃ naxca̱x i guxü̃ma i duü̃xü̃gü.