Rux 4:12 - Tupanaarü Ore

¹² ¡Rü Cori ya Tupana cuxna namugü i muxü̃ i cunegü ngĩwa i ñaa nge, rü yamu i cutanüxü̃ yexgumarüxü̃ ga nax yamuxü̃ ga nanegü ga gumá Fáre ga Yudá nane ixĩcü ga Tamárawáü̃cü! —ñanagürügü.

Rux 4:12 Referans Kwoze

Naanearü ügüchiga 38:29

Natürü gumá íxuxuchime̱xẽchirécü rü wenaxarü nügü ínaxũxme̱xẽxẽ. Rü gumá naenexẽ nixĩ ga nüxíra íxracü. Rü yemaca̱x ga yema íxraxacüxẽẽruxü̃ rü Fáregu inaxüéga yerü ngĩgürügü: —¡Cuxü̃ naxüchica nax cuxíra cuxíraxü̃ca̱x! —ngĩgürügü.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 2:4

Rü yemawena nüma ga Yudá rü nüxü̃́ nayexma ta ga to ga taxre ga nanegü ga naneã̱x ga Tamárawáü̃güxü̃. Rü yema taxre ga nanegü rü Fáre, rü Chéra nixĩ ga naégagü. Rü guxü̃wama rü wüxime̱e̱xpü̱x nixĩ ga Yudá nanegü.

1 Chamué 2:20

Rü nüma ga gumá chacherdóte ga Erí rü Ercanámaxã rü naxma̱xmaxã mexü̃ naxuegu rü ñanagürü: —Nüma ya Cori ya Tupana rü tá cuxü̃́ nanaxütanü namaxã nax cuxü̃́ nax yaxãxacüchigüxü̃ca̱x i ñaa nge natanü ya yimá ngĩne ya Corina namuãcü —ñanagürü. Rü yemawena ga Ercaná rü Ána rü napataca̱x nawoegu.

Ore i mexü̃ ga Matéu ümatüxü̃ 1:3

Rü Yudá rü Fárenatü rü Chéranatü nixĩ. Rü Tamára iyixĩ ga naé ga yema taxre. Rü Fáre rü Eróü̃natü nixĩ. Rü Eróü̃ rü Aráü̃natü nixĩ.

Naanearü ügüchiga 46:12

Rü Yudá nanegü nixĩ ga Éx, rü Onáü̃, rü Cherá, rü Fáre rü Chéra. (Éx, rü Onáü̃ rü Canaáü̃anegutama nayue). Rü Fáre nanegü nixĩ ga Eróü̃, rü Amúx.

Rux 4:18

Ñaa o̱xigü nixĩ ga Boóarü o̱xigü ixĩgüxü̃: Rü Fáre rü Eróü̃ nanatü tixĩ, rü Eróü̃ rü Ráü̃ nanatü tixĩ. Rü Ráü̃ rü Aminadá nanatü tixĩ, rü Aminadá rü Nachóü̃ nanatü tixĩ. Rü Nachóü̃ rü Chamóü̃ nanatü tixĩ, rü Chamóü̃ rü Boó nanatü tixĩ. Rü Boó rü Obéx nanatü tixĩ, rü gumá Obéx rü Ichaxí nanatü tixĩ, rü nüma ga Ichaxí rü Dabí nanatü tixĩ.

Maraquía 2:15

¿Rü tama ẽ̱xna yimátama Tupana yixĩxü̃ ya naxücü i taxü̃ne rü taãxẽ? ¿Rü ta̱xacü nixĩ i pexü̃́ nanaxwa̱xexü̃ ya Tupana? Rü ngẽma pexü̃́ nanaxwa̱xexü̃ nixĩ nax noxrü yixĩgüxü̃ i ngẽma pexacügü. ¡Rü mea nüxna peda̱u̱x i perü maxü̃! Rü tama name i nüxü̃ icuyarüngüma ga yema uneta ga cuxma̱xmaxã nüxü̃ quixuxü̃ ga yexguma cungextü̱xügu ngĩmaxã cuxãxma̱xgu.