Rux 2:4 - Tupanaarü Ore

⁴ Rü yexguma Rux yéma yexmayane rü nüma ga Boó rü ínangu ga Beréü̃wa nax ne naxũxü̃, rü yema naanewa ínayadau. Rü yema buxetatanüxü̃xü̃ narümoxẽ rü ñanagürü: —¡Cori ya Tupana pexü̃tawa ngexma̱x! —ñanagürü. Rü nüma ga buxetatanüxü̃ rü nanangãxü̃gagü rü ñanagürügü: —¡Cori ya Tupana cuxü̃ rüngü̃xẽxẽ̱x! —ñanagürügü.

Rux 2:4 Referans Kwoze

2 Tesalonicenses 3:16

Rü chanaxwa̱xe i nümatama ya tóxrü Cori ya tóxrü ngüxmüxẽẽruxü̃ guxü̃guma i guxü̃wama pexna nanaxã i norü taãxẽ. Rü chanaxwa̱xe nax petanüwa nangẽxmaxü̃ i guxãma i pemax.

Ore i mexü̃ ga Luca ümatüxü̃ 1:28

Rü yema nachica ga María nawa yexmaxü̃gu naxücu ga Gábi, rü ñanagürü ngĩxü̃: —Nuxmae Pa Maríax. Tupana rü poraãcü cumaxã nataãxẽ, rü cuxü̃tawa nangẽxma. Rü guxü̃ i ngexü̃güarü yexera marü cuxü̃ narüngü̃xẽxẽ —ñanagürü.

Ãẽ̱xgacügü ga guxchaxü̃güarü mexẽxẽruü̃gü 6:12

Rü nüma ga Tupanaarü orearü ngeruxü̃ i daxũcüã̱x rü Yedeóü̃ca̱x nango̱x rü ñanagürü nüxü̃: —Cori ya Tupana rü cuxü̃tawa nangẽxma, Pa Yatü ya Poracü rü Tama Muü̃wa̱xecüx —ñanagürü.

Norü taxre ga popera ga Timutéuca̱x naxümatüxü̃ ga Pauru 4:22

Rü chanaxwa̱xe i tórü Cori ya Ngechuchu ya Cristu cumaxã nangẽxma. ¡Rü Tupana pexü̃ rüngü̃xẽxẽ ya guxãma i pemax!

Wiyaegü 118:26

Rü Tupana rü namaxã nataãxẽ ya yimá Coriégagu núma ũcü. Rü toma rü Tupanapatawa mexü̃ pemaxã taxuegu.

Rux 4:11

Rü nüma ga yema ãẽ̱xgacügü rü guxü̃ma ga yema duü̃xü̃gü ga yéma irüdaunüxü̃ rü nanangãxü̃ga rü ñanagürügü: —Aixcüma toma nixĩ i nua itarüdaunüxü̃ rü itarüxĩnüexü̃. Rü nüma ya Tupana i ñu̱xma cuxna imucü i ñaa nge, rü tanaxwa̱xe i ngĩxü̃ narüngü̃xẽxẽ nax naxãxacüxü̃ca̱x ngĩxrüxü̃ ga Raqué rü Léa ga ngĩwa ne ixĩcü i guxãma i yixema i Iraétanüxü̃. Rü cumax, Pa Boóx ¡rü Tupana cuxü̃ rüngü̃xẽxẽ nax wüxi ya yatü ya duü̃xü̃güpe̱xewa mecü quixĩxü̃ i nua Beréü̃wa i Efrátawa!

Yochué 24:15

Natürü ngẽxguma tama Cori ya Tupanawe perüxĩxchaü̃gu ¡rü ñu̱xmatama nüxü̃ pixu i ta̱xacürü tupanawe tá perüxĩxü̃, rüe̱xna ngẽma tupananetagü ga nũxcüma ga perü o̱xigü nüxü̃ icua̱xüü̃güxü̃ ga taxtü ga Eufrátecutüwa, rüe̱xna ngẽma norü tupananetagü i Amoréutanüxü̃ i ñaa naanegu ãchiü̃güxü̃! Natürü i chomax rü chauxacügü rü Cori ya Tupanawe tá nixĩ i tarüxĩxü̃ —ñanagürü ga Yochué.

Naanearü ügüchiga 18:19

Rü chomatama marü chanayaxu nax nanegümaxã rü nataagümaxã nüxü̃ yaxuxü̃ca̱x i ngẽma chorü mugü nax nümagü i nataagü naga naxĩnüexü̃ca̱x, rü mexü̃ naxügüxü̃ca̱x nax ngẽmaãcü choma chayanguxẽẽxü̃ca̱x i guxü̃ma ga yema namaxã nüxü̃ chixuxü̃”, ñaxü̃gu narüxĩnü ga Tupana.

Nüxíraxü̃xü̃ ga popera ga Timutéuca̱x naxümatüxü̃ ga Pauru 6:2

Rü ngẽxguma chi ngẽma mugüruü̃gü rü naxrüxü̃ yaxõgüxü̃maxã nacoriã̱xgügu, rü tama tanaxwa̱xe i ngẽma nax nügüenexẽgü yaxĩgüxü̃ca̱x nüxü̃ narüxoe nax nüxü̃ nangechaü̃güxü̃ i norü corigü. Natürü narümemae nax yexeraãcü mea naga naxĩnüexü̃ rü nüxü̃́ napuracüexü̃ erü norü corigü rü naxrüxü̃ yaxõgüxü̃ nixĩgü rü naenexẽgü ya Tupana nüxü̃ ngechaü̃güxü̃ nixĩgü. Pa Timutéux, chanaxwa̱xe i meama cunangúexẽxẽ i ngẽma cumaxã nüxü̃ chixuxü̃, rü guxü̃ma i yaxõgüxü̃pe̱xewa nüxü̃ quixu.

Rux 2:3

Rü yexguma ga Rux rü wüxi ga naanewa ixũ rü yema buxetatanüxü̃we iyadeetanü ga chebádaya̱xa ga yéma iyietanüxü̃. Rü megu ingu yerü yema naane rü Boó ga Erimérextanüxü̃arü nixĩ.

Rux 2:5

Rü ñu̱xmachi ga Boó rü yema buxetatanüxü̃eruna naca, rü ñanagürü: —¿Texétanüxü̃ iyixĩ i ngẽã pacü? —ñanagürü.

Naanearü ügüchiga 28:3

¡Rü Tupana ya Guxãétüwa Ngẽxmacü rü cuxü̃ rüngü̃xẽxẽ rü yamuxẽxẽã i cutaagü nax ngẽmaãcü muxü̃ma i nachixü̃ane cuwa ngóxü̃ca̱x!

Iraétanüxü̃arü muxchiga 6:24

“¡Rü Tupana cuxü̃ rüngü̃xẽxẽ rü guxü̃guma cuxna nada̱u̱x!

Ãẽ̱xgacügü ga guxchaxü̃güarü mexẽxẽruü̃gü 6:16

Rü nüma ga Cori ya Tupana rü nanangãxü̃ rü ñanagürü: —Choma ya Tupana rü cuxü̃tawa tá changexma. Rü tauxchaãcü tá cunadai i ngẽma Madiáü̃tanüxü̃ ñoma wüxitama i yatü quimáxü̃rüxü̃ —ñanagürü.

1 Chamué 17:37

Rü gumá Cori ya Tupana ga leóü̃na rü osu i düraxü̃na choxü̃ ípoxü̃cü, rü yimátátama nixĩ i ñaa Firitéume̱xẽwa choxü̃ ípoxü̃cü —ñanagürü. Rü yexguma ga Chaú nanangãxü̃ rü ñanagürü: —¡Ẽcü ngéma naxũ rü Cori ya Tupana cuxü̃ íxümücü! —ñanagürü.

Wiyaegü 134:3

¡Rü nüma ya Cori ya Tupana ya daxũguxü̃ i naane rü ñoma i naanearü üruxü̃, rü yima ma̱xpǘne ya Chióü̃wa cuxca̱x ne nanamu i norü ngü̃xẽxẽ!

Yeremía 31:23

Rü Cori ya Guxãétüwa Ngẽxmacü ya Iraétanüxü̃arü Tupana rü ñanagürü: —Ngẽxguma chanawoeguxẽẽgu i ngẽma Yudátanüxü̃ nawa i ngẽma nachixü̃ane i ñu̱xma nawa muruü̃gü yaxĩgüxü̃, rü ngẽxguma wenaxarü ñaa naanewa rü norü ĩanegüwa nangẽxmagügu, rü ñanagürügü tá: “Pa Ma̱xpǘne ya Üünene ya Chióü̃x, ¡Tupana cuxü̃ rüngü̃xẽxẽ, erü cuwa nixĩ ya Tupana mea norü duü̃xü̃gümaxã inacuáxü̃!” ñanagürügü tá.