Yema Cuáü̃ nüxü̃ dauxü̃ i yixcüra tá ngupetüxü̃chiga 9:20 - Tupanaarü Ore

²⁰ Natürü ga yema togü ga duü̃xü̃gü ga tama yema poxcuruü̃gümaxã yuexü̃, rü tama nüxü̃ narüxoe ga yema chixexü̃gü ga naxügüxü̃. Rü tama nüxü̃ narüxoe nax nüxü̃ yacua̱xüü̃güxü̃ ga ngo̱xogü rü yema tupananetachicüna̱xãgü ga úirunaxca̱x rü diẽrumünaxca̱x rü cobrenaxca̱x rü nutagünaxca̱x rü nainaxca̱x. Rü yemaacü nüxü̃ nicua̱xüü̃güama ga yema norü tupananetachicüna̱xãgü ga ngearü maxü̃ã́xü̃ rü tama nüxü̃ daugüxü̃ rü tama nüxü̃ ĩnüexü̃ rü tama ixĩxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 9:20 Referans Kwoze

Danié 5:23

Dücax, Pa Ãẽ̱xgacüx, cuma rü Cori ya Tupana ya dauxü̃wa ngẽxmacügu quidauxcüraxü̃. Erü curü duü̃xü̃güxü̃ cuyanuxü̃xẽxẽ i ngẽma naxpáü̃gü ga Tupanapata ya taxü̃nearü ixĩxü̃. Rü ngẽma nüxna cuxuxü̃maxã wüxigu ngẽma naxpáü̃güwa peyaxaxü ga bínu, rü nüxü̃ picua̱xüü̃gü i ngẽma perü tupanachicüna̱xãgü i úirunaxca̱x, rü diẽrumünaxca̱x, rü bróũchenaxca̱x, rü fierunaxca̱x, rü nainaxca̱x rü nutanaxca̱x i ngearü maxü̃ã́xü̃, rü tama tüxü̃ dauxü̃, rü tama tüxü̃ ĩnüxü̃ rü taxuxü̃ma cuáxü̃. Natürü tama nüxü̃ quicua̱xüxü̃ ya yimá Tupana ya naxme̱xwa nangẽxmacü i curü maxü̃ rü namaxã icuácü i guxü̃ma i ta̱xacü icuxüxü̃.

Wenaxarü naxümatü ga Tupanaarü mugü 31:29

Erü choma rü marü nüxü̃ chacua̱x rü ngẽxguma chayuxguwena rü pemax rü tá chixri pemaxẽ, rü tá nüxna pixĩgachi i ngẽma mugü ga pemaxã nüxü̃ chixuxü̃. Rü ngẽxgumarüxü̃ ta nüxü̃ chacua̱x nax yixcüra tá pexca̱x ínanguxü̃ i guxchaxü̃gü nagagu nax chixexü̃ pexügüxü̃ nape̱xewa ya Cori ya Tupana rü ngẽmamaxã nax penanuxẽẽxü̃ —ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 9:21

Rü tama nüxü̃ narüxoe nax namáetagüxü̃, rü yayuüexü̃, rü naxü̃nearü ngúchaü̃ naxügüxü̃ rü nangĩ́ta̱a̱xgüxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 4:1

Tupanaãxẽ ya Üünecü rü meama nüxü̃ nixu rü ngẽxguma yangaicagu nax nagúxchaü̃xü̃ i naane rü nümaxü̃ i duü̃xü̃gü rü tá nüxü̃ narüxoe nax yaxõgüãxü̃. Rü tá nawe narüxĩ i duü̃xü̃gü i nawomüxẽẽgüxü̃ i Chatanáarü ngu̱xẽẽtae nangúexẽẽxü̃.

Ngechuchuarü ngúexü̃gü ga yamugüxü̃arü puracüchiga 19:26

Rü marü nüxü̃ pedaugü rü nüxü̃ pexĩnüe nax ngẽma Pauru yaxucu̱xẽgüxü̃ i duü̃xü̃gü, rü namaxã nüxü̃ yaxuxü̃ nax tama aixcüma tupanagü yixĩxü̃ i ngẽma tupanagü i yixema ixügüxü̃. Rü ngẽmaãcü muxü̃ma i duü̃xü̃güxü̃ nüxü̃ narüxoexẽxẽ nax tama tórü tupanagüaxü̃́ yaxõgüãxü̃ca̱x. Rü tama núma Epéchiuwaxicatama ngexü̃ nawagü natürü wixguxüchi guxü̃ i Áchiaanewa ngẽmaãcü chixri nayaxucu̱xẽgü i duü̃xü̃gü.

Ngechuchuarü ngúexü̃gü ga yamugüxü̃arü puracüchiga 7:41

Rü yexguma nanaxügü ga wüxi ga wocaxacüchicüna̱xã norü tupanaxü̃. Rü ñu̱xũchi naxca̱x nanadai ga ñuxre ga carnérugü nax yemamaxã nüxü̃ yacua̱xüü̃güxü̃ca̱x. Rü wüxi ga peta naxca̱x naxügü ga yema wocaxacüchicüna̱xã ga nümatama naxügüxü̃.

Yeremía 1:16

Rü ngẽma tá nixĩ i ngẽma poxcu i namaxã chaxueguxü̃ i ngẽma duü̃xü̃gü i chixexü̃ ügüxü̃ rü choxna ixĩgachixü̃. Erü nüxü̃ nicua̱xüü̃gü rü pumarate̱xe naxca̱x ínagugü i ngẽma togü i nachixü̃anegüarü tupanachicüna̱xãgü i nümatama ügüxü̃.

2 Corintios 12:21

Rü chaxoegaãxẽ erü ngẽxguma wena petanüwa chaxũxgu, rü ngürüãchi Tupana tá pegagu choxü̃ naxãnexẽxẽ rü choxü̃ naxauxẽxẽ nagagu nax muxü̃ma i pemax rü marü ñuxgumama pecadu pexügüechaxü̃, rü tama nüxü̃ perüxoechaü̃xü̃ nax Tupanape̱xewa chixexü̃ pexügüxü̃, rü nai i ngexü̃maxã nax pemaxẽxü̃, rü togü i chixexü̃ nax pexügüxü̃.

Yeremía 51:17

Rü guxü̃ma i duü̃xü̃gü rü nangeãẽgümare rü naechitamare namaxẽ. Rü ngẽmaca̱x nanaxügü i tupananetachicüna̱xãgü rü ngẽmamaxã nügütama nawomüxẽẽgü. Rü ngẽma naxügüxü̃ rü naxchicüna̱xãgümare nixĩgü rü nataxuma i norü pora rü nataxuma i norü maxü̃.

Ngechuchuarü ngúexü̃gü ga yamugüxü̃arü puracüchiga 17:29

Rü ñu̱xma nax Tupanaxacügü ixĩgüxü̃, rü tama name i nagu tarüxĩnüe rü Tupana rü wüxi i naxchicüna̱xã i úirumüwa rü ẽ̱xna diẽrumüwa rü ẽ̱xna nutawa ixüxü̃rüxü̃ nixĩ. Erü guxü̃ma i ngẽma naxchicüna̱xãgü rü nümatama i duü̃xü̃gü nagu naxĩnüexü̃ãcüma nanaxügü.

Ore i mexü̃ ga Matéu ümatüxü̃ 21:32

Yerü Cuáü̃ ga báiü̃xẽẽruxü̃ rü núma naxũ nax pemaxã nüxü̃ yaxuxü̃ca̱x nax ñuxãcü tá pemaxẽxü̃, natürü ga pema rü tama nüxü̃́ peyaxõgü. Natürü ga yema yatügü ga Rómaarü ãẽ̱xgacüca̱x diẽru ngĩxü̃ dexü̃ rü yema ngexü̃gü ga naxü̃nemaxã taxexgüxü̃ rü Cuáü̃axü̃́ nayaxõgü. Natürü ga pema rü woo nüxü̃ nax pedaugüxü̃ nax yaxõgüãxü̃, rü tama nüxü̃ perüxoechaü̃ i pecüma i chixexü̃ nax peyaxõgüxü̃ca̱x —ñanagürü.

Yeremía 44:8

¿Rü tü̱xcüü̃ choxü̃ penuxẽxẽ namaxã i ngẽma chixexü̃ i pexügüxü̃ rü ngẽma nax pumarate̱xe naxca̱x pigugüxü̃ i norü tupananetagü i Equítuane i nawa pengugüxü̃ nax nua pemaxẽxü̃ca̱x? Rü ngẽma chixexü̃ i pexügüxü̃gagu rü pematama naxca̱x pedaugü i perü poxcu. Rü ngẽmaãcü wüxi i cua̱xruxü̃ tá pixĩgü naxca̱x i guxü̃ma i ngẽma togü i nachixü̃anegü i ñoma i naanewa ngẽxmagüxü̃. Rü tá chixexü̃maxã pexü̃ narüdaunü rü tá pexü̃ nacugüe.

Yeremía 25:6

¡Rü taxṹ i nawe perüxĩxü̃ i ngẽma tupananetachicüna̱xãgü! ¡Rü taxṹ i naxca̱x pengutaque̱xegüxü̃ rü nüxü̃ picua̱xüü̃güxü̃! ¡Rü taxṹ i Cori ya Tupanaxü̃ penuxẽxẽxü̃ nagagu nax nüxü̃ picua̱xüü̃güxü̃ i ngẽma tupananetachicüna̱xãgü i pematama pexüxü̃! Rü ngẽxguma i nüma ya Cori ya Tupana rü taxuxü̃táma i guxchaxü̃ pexca̱x ínanguxẽxẽ”, ñanagürügü pexü̃.

Yeremía 5:3

Pa Corix, ngẽma naxca̱x cudauxü̃ nixĩ i duü̃xü̃gü i aixcüma cuga ĩnüexü̃. Natürü woo cunapoxcue, rü tama cuga naxĩnüechaü̃. Rü cunadai, natürü tama inaxĩnüechaü̃. Yerü nutaarü yexera nataiarü maxü̃ã̱xgü, rü tama nüxü̃ narüxoechaü̃ i nacüma i chixexü̃.

Wiyaegü 106:37

Rü tüxü̃ inamugü ga naxacüxegü nax yema ngo̱xogüca̱x tüxü̃ ínaguxü̃ca̱x.

Norü taxre ga to ga popera ga ãẽ̱xgacügüchiga ümatüxü̃ 34:25

Yerü ñaa duü̃xü̃gü rü choxna nixĩgachi rü norü tupananetagüca̱x pumara ínagu. Rü yemaacü choxü̃ nanuxẽẽgü namaxã ga yema chixexü̃ ga naxügüxü̃. Rü ngẽmaca̱x nixĩ i chanuxü̃ namaxã ya daa ĩane rü taxũtáma namaxã icharüngüxmüxü̃.

Norü taxre ga popera ga ãẽ̱xgacügüchiga 22:17

Yerü yema duü̃xü̃gü rü choxna nixĩgachi rü norü tupananetagüca̱x pumara ínagu. Rü yemaacü choxü̃ nanuxẽẽgü namaxã ga yema chixexü̃ nax naxügüxü̃. Rü ngẽmaca̱x nixĩ i chanuxü̃ namaxã ya daa ĩane rü taxũtáma icharüngüxmüxü̃.

Wenaxarü naxümatü ga Tupanaarü mugü 32:17

Rü ñu̱xũchi ngo̱xogüca̱x penadai rü ípenagu ga ãmaregü. Rü yemaacü nüxü̃ picua̱xüü̃gü ga tupananetagü ga ngexwaca nüxü̃ peyangaugüxü̃ ga ü̃pa tama nüxü̃ pecuáxü̃ rü perü o̱xigü taguma nüxü̃ icua̱xüü̃güxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 16:8

Rü yema norü ãgümücü ga orearü ngeruxü̃ rü üa̱xcüétügu nayabaãcu ga norü copu. Rü yemaacü poraãcü nananaiemaxẽxẽ ga üa̱xcü nax yema norü naiemaxü̃maxã ínaguãxü̃ca̱x ga duü̃xü̃gü.

Ichaía 41:7

Rü yema naxchicüna̱xãarü üruxü̃ rü nüxü̃́ nanangúchaü̃xẽxẽ ga yema úirumaxã puracüxü̃ nax natüxüneã́xü̃ca̱x ga yema naxchicüna̱xã. Rü yema natamüca̱x martiyumaxã íipomüxü̃ rü nanataãẽxẽxẽ ga yema dextaruxü̃ íipomüxü̃ rü ñanagürü nüxü̃: “Name i ngẽma dextaruxü̃”, ñanagürü. Rü ñu̱xũchi itapuamaxã ínayapota ga yema naxchicüna̱xã nax tama yawáxü̃ca̱x.

Ichaía 2:8

Natürü ñaa nachixü̃anewa rü ta namu i ngẽma tupananetachicüna̱xãgü. Rü duü̃xü̃gü rü nümagütama naxme̱xmaxã naxüxgüxü̃ i tupananetachicüna̱xãgüxü̃ nicua̱xüü̃gü.

Norü taxre ga to ga popera ga ãẽ̱xgacügüchiga ümatüxü̃ 28:22

Rü woo nax yema guxchaxü̃ naétüwa yexmaxü̃, natürü tama Cori ya Tupanaga naxĩnü. Rü yemaacü nixĩ ga guma ãẽ̱xgacü ga Acháx.

Lebítanüxü̃arü puracüchiga 17:7

Rü ngẽma Iraétanüxü̃ rü chanaxwa̱xe i nüxü̃ narüxoe nax ãmare naxca̱x ínaguxü̃ i ngẽma chíbuchicüna̱xãgü i noxri nüxü̃ yacua̱xüü̃güxü̃ rü chixexü̃wa nagagüxü̃. Rü ngẽma pemaxã nüxü̃ chixuxü̃ i mu nixĩ i guxü̃gutáma nagu pexĩxü̃ i pema rü penegü rü petaagü.

Wenaxarü naxümatü ga Tupanaarü mugü 4:28

Rü ngéma tá nixĩ i nüxü̃ picua̱xüü̃güxü̃ i tupananetachicüna̱xãgü i duü̃xü̃gümare naiwa rü nutawa ügüxü̃ i tama tüxü̃ dauxü̃, rü tama tüxü̃ ĩnüxü̃, rü tama chibüxü̃, rü tama ingü̃ãcüüxü̃.

Danié 5:4

Rü guxü̃ma ga yema yéma yexmagüxü̃ rü bínu nixaxgü rü nüxü̃ nicua̱xüü̃gü ga norü tupananetachicüna̱xãgü ga úirunaxca̱x, rü diẽrumünaxca̱x, rü bróũchenaxca̱x, rü fierunaxca̱x, rü nainaxca̱x rü nutanaxca̱x ixĩgüxü̃.

Miquéa 5:13

Rü tá nagu chapogü i perü tupananetachicüna̱xãgü rü perü nutapütagü i pexca̱x üünexü̃ nax taguma wena nüxü̃ picua̱xüü̃güxü̃ca̱x i ngẽma tupananetachicüna̱xãgü i pematama pexügüxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 9:19

Yerü ga yema cowarugü rü naã̱xwa rü nareexü̃wa nixĩ ga nüxü̃́ nayexmaxü̃ ga norü pora. Rü gumá nareexü̃gü rü ñoma ãxtaperüxü̃ nixĩgü rü nixãeru. Rü yemamaxã duü̃xü̃güxü̃ nangõ̱x rü ngúxü̃ nüxü̃ ningexẽxẽ.

Yema Cuáü̃ nüxü̃ dauxü̃ i yixcüra tá ngupetüxü̃chiga 15:1

Rü ñu̱xũchi ga daxũguxü̃ ga naanewa rü nüxü̃ chadau ga wüxi ga to ga taxü̃ ga cua̱xruxü̃ ga namaxã ibaixãchixü̃. Rü nayexma ga 7 ga orearü ngeruü̃gü ga daxũcüã̱x ga nüxü̃́ yexmagüxü̃ ga 7 ga poxcuruü̃gü. Rü yema guxchaxü̃gu nixĩ ga yagúxü̃ ga norü nu ga Tupana.