Yema Cuáü̃ nüxü̃ dauxü̃ i yixcüra tá ngupetüxü̃chiga 20:11 - Tupanaarü Ore

¹¹ Rü ñu̱xũchi nüxü̃ chadau ga wüxi ga taxü̃ ga tochicaxü̃ ga cómüxü̃, rü nüxü̃ chadau ga gumá nawa rütocü. Rü gumácha̱xwa nibuxmü ga ñoma ga naane rü guxü̃ma ga daxũwa nüxü̃ idauxü̃, rü inayarütauxe.

Yema Cuáü̃ nüxü̃ dauxü̃ i yixcüra tá ngupetüxü̃chiga 20:11 Referans Kwoze

Yema Cuáü̃ nüxü̃ dauxü̃ i yixcüra tá ngupetüxü̃chiga 21:1

Rü yemawena nüxü̃ chadau nax nayexwaca̱xü̃xü̃ ga ñoma ga naane rü nayexwaca̱xü̃xü̃ ga guxü̃ma ga ta̱xacü ga daxũwa yexmagüxü̃. Yerü yema nüxíra yexmagüxü̃ rü marü nangupetü, rü yema már rü marü nataxuma.

Norü taxre ga popera ga Pedru ümatüxü̃ 3:7

Natürü ngẽma ñu̱xma daxũwa ngẽxmaxü̃ rü ñoma i naane i ñu̱xma ngẽxmaxü̃ rü Tupana marü namaxã nanaxuegu nax üxüwa tá yaxaexü̃. Rü ngẽma ngunexü̃ ya Tupana nagu unetaxü̃ nax duü̃xü̃güxü̃ yacagüxü̃ rü napoxcueãxü̃ i ngẽma duü̃xü̃gü i chixexü̃gu maxẽxü̃, rü ngẽma ngunexü̃gu rü yima üxüwa tá nixĩ i ínaguxü̃ i ñoma i naane rü ngẽma daxũwa ngẽxmagüxü̃.

Ore i mexü̃ ga Matéu ümatüxü̃ 25:31

Rü ñanagürü ga Ngechuchu: —Ngẽxguma wenaxarü núma naxũxgu ya Tupana Nane ya duü̃xü̃xü̃ ixĩcü, rü norü tochica i mexẽchixü̃wa tá narüto. Rü norü orearü ngeruü̃gü i daxũcüã̱x rü tá nanaxümücügü.

Danié 2:35

Rü yexguma ga yema fieru rü waixü̃mü rü bróũche rü diẽrumü rü úiru rü wüxixü̃cüütama nixãte̱xeãchi. Rü ñoma trigu icuexechite̱xegurüxü̃ nixĩ ga buanecü yangexü̃, rü taxuxü̃ma yéma nayaxüãchi ga yema naxchicüna̱xã. Natürü gumá nuta ga yema naxchicüna̱xãétüwa dixpütacü rü wüxi ga taxü̃ne ga ma̱xpǘnexü̃ nanaca̱xichi rü guxü̃ma ga ñaa naane rü namaxã nanapá.

Romanos 2:5

Natürü cuma rü tama Tupanaxü̃ cucuáxchaü̃ rü tama nüxü̃ curüxoxchaü̃ i curü chixexü̃. Rü ngẽmaãcü cugüca̱xtama cunayexeraxẽxẽ i curü poxcu i tá cuyaxuxü̃ i ngẽma ngunexü̃ i nagu Tupana norü numaxã napoxcuexü̃ i ngẽma chixexü̃ ügüxü̃.

Ore i mexü̃ ga Matéu ümatüxü̃ 24:35

Rü ñoma i naane rü ngẽma daxũwa nüxü̃ idauxü̃ rü tá nagu̱x. Natürü chorü ore rü tagutáma inayarüxo rü aixcüma tá ningu.

Yema Cuáü̃ nüxü̃ dauxü̃ i yixcüra tá ngupetüxü̃chiga 16:20

Rü guxü̃ma ga capaxũgü rü guxü̃nema ga ma̱xpǘnegü, rü inayarüxogü.

Yema Cuáü̃ nüxü̃ dauxü̃ i yixcüra tá ngupetüxü̃chiga 6:14

Rü guxü̃ma i daxũwa nüxü̃ idauxü̃ rü inayarütaxu. Rü ñoma wüxi i popera i dixcumüãchixü̃rüxü̃ inayarütaxu. Rü guxü̃nema ga guma ma̱xpǘnegü rü yema capaxũgü rü nixĩgachi ga nachicawa.

Yema Cuáü̃ nüxü̃ dauxü̃ i yixcüra tá ngupetüxü̃chiga 20:2

Rü yema Tupanaarü orearü ngeruxü̃ rü yema coyaxü̃ niyaxu. Rü yematama coya nixĩ ga yema nũxcümaü̃xü̃ ga ãxtape ga ngo̱xo ga Chataná ixĩxü̃. Rü yema orearü ngeruxü̃ rü 1,000 ga taunecügüca̱x cadénamaxã nayana̱i̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 12:8

Natürü ga yema coya rü norü orearü ngeruü̃gü rü tama Tupanaarü orearü ngeruü̃güxü̃ narüporamaegü. Rü ñu̱xũchi ga yema coya rü namücügü rü daxũguxü̃ ga naanewa rü nangechica.

Wiyaegü 97:2

Rü pamüemaxü̃ i caixanexü̃maxã ínaxümaeguãchi. Rü nüma nixĩ i ãẽ̱xgacü i aixcüma mea nangugüxü̃ i wüxichigü i duü̃xü̃güarü maxü̃. Rü aixcüma nawe̱xgu i ngẽma namaxã naxueguxü̃ i wüxichigü.

Wiyaegü 89:14

Rü ngẽxguma curü tochicaxü̃wa curütoxgux nax cunangugüxü̃ca̱x i wüxichigü i duü̃xü̃arü maxü̃, rü guxü̃ma wüxiguraxü̃ãcüma cunangugü rü aixcüma nawe̱xgu i ngẽma namaxã cuxueguxü̃ i wüxichigü. Rü cuma rü aixcüma ngechaü̃wa̱xecü rü ixaixcümacü quixĩ.

Wiyaegü 47:8

Rü ngẽma yatügü i tachigaxü̃ i guxü̃ i nachixü̃anegüwa ngẽxmagüxü̃ rü namaxã nangutaque̱xe i ngẽma duü̃xü̃gü i Abraáü̃arü Tupanaaxü̃́ yaxõgüxü̃. Rü nüma ya Tupana rü norü tochicaxü̃ i üünexü̃wa narüto rü guxü̃ma i nachixü̃anegüarü ãẽ̱xgacügümaxã inacua̱x. Rü nüma rü guxü̃étüwa nangẽxma.

Yema Cuáü̃ nüxü̃ dauxü̃ i yixcüra tá ngupetüxü̃chiga 4:2

Rü yexgumatama ga choma rü Tupanaãxẽ ya Üünecü rü chauãẽmaxã inacua̱x, rü daxũwa nanaga. Rü yéma daxũguxü̃ ga naanewa nüxü̃ chadau ga wüxi ga tochicaxü̃ ga mexẽchixü̃ ga yéma wüxi nawa rütoxü̃.

Yox 9:6

Rü núma ya Tupana rü nayaxĩã̱xcüüxẽxẽ i ñoma i naane rü nayadu̱xruxẽxẽ i ngẽma natüxü̃wa ngẽxmaxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:11

Rü ñu̱xũchi nüxü̃ chadau ga daxũguxü̃ ga naane nax yawãxnaxü̃. Rü yéma nango̱x ga wüxi ga cowaru ga cómüxü̃. Rü gumá naétüwa rütocü rü naéga nixĩ i Aixcüma Yanguxẽẽcü rü Ixaixcümacü. Rü nüma rü tama inatü i ngẽxguma poxcu naxueguxgu rü ngẽxguma norü uanügümaxã nügü nadaixgu.

Naanearü ügüchiga 18:25

Cha̱u̱xca̱x rü tama name nax cunada̱i̱xü̃ i ngẽma mea maxẽxü̃ i duü̃xü̃gü wüxigu namaxã i ngẽma chixexü̃ ügüxü̃, ñoma chi guxü̃ma naxügüxü̃rüxü̃ i ngẽma chixexü̃. Rü taxucürüwama ngẽma cuxü erü tama ngẽmagu curüxĩnü. Rü cuma nixĩ i guxãarü maxü̃maxã icucuáxü̃ ¿rü tama ẽ̱xna i ngẽma mea maxẽxü̃gagu nüxü̃ icurüngümaxü̃ nax cunadaiãcuxü̃ ya yima ĩane? —ñanagürü.

Wiyaegü 102:26

Rü guxü̃ma i ngẽma rü tá inayarüxo, natürü i cuma rü guxü̃gutáma cunaxa̱i̱xrügumaraxü̃. Rü ñoma i naane rü ngẽma dauxü̃wa nüxü̃ idauxü̃ rü wüxi i naxchirurüxü̃ tá nangau. Rü cuma rü tá cunaxüchicüxü rü ñoma wüxi i duü̃xü̃ i naxchiru i ngauxü̃ ítáxü̃ rü ngexwaca̱xü̃xü̃ i naxchirugu icúxü̃rüxü̃ tá nixĩ.

Ichaía 6:1

Rü gumá taunecü ga ãẽ̱xgacü ga Uchía nagu yucü rü nüxü̃ chadau ga Cori ya Tupana ga wüxi ga tochicaxü̃ ga dauxü̃wa yexmaxü̃wa nax natoxü̃. Rü yema naxpechinüchiru rü nanatüétü ga guma napata ga taxü̃ne.

Ore i mexü̃ ga Matéu ümatüxü̃ 11:22

Natürü pemaxã nüxü̃ chixu rü ngẽma ngunexü̃ ya Tupana nagu napoxcuexü̃ i pecaduã̱xgüxü̃, rü ngẽma ngunexü̃gu rü ngẽma Tírucüã̱x rü Chidóü̃cüã̱xarü yexera tá pexü̃ napoxcue i pemax, Pa Corachíü̃cüã̱x rü Bechaídacüã̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 21:5

Rü gumá yema tochicaxü̃wa rütocü rü ñanagürü: “Dücax, choma rü chanangexwacaxü̃xẽxẽ i guxü̃ma i ta̱xacü i ngẽxmaxü̃”, ñanagürü. Rü ñu̱xũchi ñanagürü ta: “¡Naxümatü i ñaa ore! Erü ñaa ore rü aixcüma nixĩ, rü ñaa nixĩ i ore i mexü̃ nax yaxõxü̃”, ñanagürü.