Yema Cuáü̃ nüxü̃ dauxü̃ i yixcüra tá ngupetüxü̃chiga 19:11 - Tupanaarü Ore

¹¹ Rü ñu̱xũchi nüxü̃ chadau ga daxũguxü̃ ga naane nax yawãxnaxü̃. Rü yéma nango̱x ga wüxi ga cowaru ga cómüxü̃. Rü gumá naétüwa rütocü rü naéga nixĩ i Aixcüma Yanguxẽẽcü rü Ixaixcümacü. Rü nüma rü tama inatü i ngẽxguma poxcu naxueguxgu rü ngẽxguma norü uanügümaxã nügü nadaixgu.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:11 Referans Kwoze

Yema Cuáü̃ nüxü̃ dauxü̃ i yixcüra tá ngupetüxü̃chiga 6:2

Rü ichadawenü rü nüxü̃ chadau nax yéma nangóxü̃ ga wüxi ga cowaru ga cómüxü̃. Rü yema naétüwa rütoxü̃ rü nüxü̃́ nayexma ga wüxi ga norü würa. Rü wüxi ga nga̱xcueruxü̃ nüxna naxã. Rü nüma rü nagu narüxĩnü nax norü uanügüxü̃ tá narüporamaexü̃. Rü inaxũãchi nax norü uanügüxü̃ naporamaexü̃ca̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 3:14

Rü yema chomaxã idexaxü̃ rü ñanagürü ta: “Chanaxwa̱xe i Laodichéawa ngẽxmagüxü̃ i yaxõgüxü̃arü ãẽ̱xgacüca̱x cunaxümatü rü ñacurügü tá: ‘Ñaa nixĩ i norü ore ya yimá aixcüma ixĩcü. Rü nüma nixĩ i nüxü̃ yaxuxü̃ i ore i aixcüma ixĩxü̃ rü inaxügüxü̃ ga guxü̃ma ga yema Tupana üxü̃’.

Wiyaegü 50:6

Ngẽma dauxü̃wa ngẽxmaxü̃ i naane nanango̱xẽxẽ nax Tupana rü ãẽ̱xgacü ya aixcüma mecü nax yixĩxü̃.

Yeremía 33:15

Rü ngẽxguma nawa nanguxgu i ngẽma ngunexü̃, rü wüxi i nataxüchi ya ãẽ̱xgacü ya Dabítaxa rü ñaa nachixü̃anearü ãẽ̱xgacü ya mecü tá nixĩ. Rü nüma rü aixcüma meama tá duü̃xü̃gümaxã inacua̱x i ñaa nachixü̃anewa.

Ichaía 32:1

Rü tá nangẽxma ya wüxi ya ãẽ̱xgacü ya we̱xgu duü̃xü̃gümaxã icuácü, rü ãẽ̱xgacügü i mea duü̃xü̃gümaxã icua̱xgüxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 4:1

Rü yemawena ga choma ga Cuáü̃ rü ichadauwenü rü nüxü̃ chadau ga wüxi ga ĩã̱x ga iwãxnaxü̃ ga daxũguxü̃ ga naanewa. Rü yema naga ga nacornétagaraü̃xü̃ ga noxri nüxü̃ chaxĩnüxü̃ ga chomaxã idexaxü̃, rü ñanagürü choxü̃: “¡Nuxã naxĩnagü! Rü tá cuxü̃ nüxü̃ chadauxẽxẽ i ngẽma yixcüra tá ngupetüxü̃”, ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 3:7

Rü yema chomaxã idexaxü̃ rü ñanagürü ta: “Chanaxwa̱xe i Filadélfiawa ngẽxmagüxü̃ i yaxõgüxü̃arü ãẽ̱xgacüca̱x cunaxümatü rü ñacurügü tá: ‘Ñaa nixĩ i norü ore ya yimá Üünecü ya aixcüma Cristu ixĩcü. Rü nüma rü ãẽ̱xgacü ya Dabírüxü̃ poracü nixĩ. Rü nüxü̃́ nangẽxma i pora nax yawãxnaãxü̃ca̱x rü nawãxtaãxü̃ca̱x. Rü ngẽxguma texéca̱x yawãxnaãgu, rü taxucürüwama texé tümacha̱xwa tanawãxta. Rü ngẽxguma texécha̱xwa nawãxtaãgu, rü taxucürüwa texé tümaca̱x tayawãxna’.

Ichaía 45:21

Rü pema nax naxchicüna̱xãgümaxã petupanaã̱xgüxü̃ rü name nax pegüna pecagüxü̃ rü choxü̃ penawéxü̃ i ta̱xacüwa pexü̃ nangü̃xẽẽxü̃ i ngẽma perü tupanagü i nainaxca̱x. ¿Rü texé tixĩ ga noxriarü ügügu naxü̃pa nüxü̃ ixuxe i ngẽma tá ngupetüxü̃? ¿Rü texé tixĩ ga nũxcüma nüxü̃ ixuxe ga yema? ¿Rü tama ẽ̱xna choma ya Cori ya Tupana yixĩxü̃? Rü nataxuma i to ya Tupana, rü chaxicatama nixĩ i choxü̃́ nangẽxmaxü̃ i pora nax pexü̃ chimexẽẽgüxü̃ rü pexü̃ íchanguxü̃xẽẽxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:5

Rü ngẽxgumarüxü̃ ta chanaxwa̱xe nax pexü̃ nangü̃xẽẽxü̃ rü pexü̃ nataãẽxẽẽxü̃ ya Ngechuchu ya Cristu ga meama nüxü̃ ixucü ga Tupanachiga ga ñoma ga naanewa. Rü nüma nixĩ ga nüxíra yuwa ínadaxü̃. Rü nüma nixĩ i namaxã inacuáxü̃ i guxü̃ma i ñoma i naanewa ngẽxmagüxü̃ i nachixü̃anegüarü ãẽ̱xgacügü. Rü nüma rü tüxü̃ nangechaü̃, rü nagümaxã tüxü̃́ inayanaxoxẽxẽ i tórü pecadugü.

Wiyaegü 99:4

Rü cumax, Pa Corix, rü ãẽ̱xgacü ya poraxüchicü quixĩ rü curü me nixĩ nax meama guxü̃ma i duü̃xü̃gümaxã icucuáxü̃. Rü cumatama nixĩ i nüxü̃ quixuxü̃ nax cupe̱xewa rü nawüxiguxü̃ i guxü̃ma i duü̃xü̃gü. Rü toma nax Iraétanüxü̃ tixĩgüxü̃ rü cuma rü aixcüma meama tomaxã icucua̱x rü ngẽma mugü ga toxna cuxãxü̃ rü meama niwe̱x.

Ore i mexü̃ ga Cuáü̃ ümatüxü̃ 14:6

Rü Ngechuchu nanangãxü̃, rü ñanagürü: —Choma nixĩ i nama i Chaunatüxü̃tawa nadaxü̃. Rü ngẽma nüxü̃ chixuxü̃ rü aixcüma nixĩ. Rü choma nixĩ i duü̃xü̃güxü̃ chamaxẽxẽẽxü̃. Rü chaugaguxicatama nixĩ i Chaunatüxü̃tawa nangugüxü̃ i duü̃xü̃gü.

Echequié 1:1

Rü yexguma marü 5 ga taunecü Babiróniaanewa nayexmagu ga ãẽ̱xgacü ga Yoaquíü̃ ga yéma nax nagagüãxü̃, rü choma i chacherdóte i Echequié ya Buchí nane rü yema Yudíugü ga Babiróniaanewa nagagüxü̃tanüwa chayexma ga natü ga Quebáxcutüwa. Rü yexguma ga choma rü 30 ga taunecü choxü̃́ nayexmagu rü wüxi ga ngunexü̃ meama norü ãgümücü ga tauemacü arü 5 ga ngunexü̃gu rü ngürüãchi cha̱u̱xca̱x ningena ga daxũguxü̃ ga naane rü Tupanaxü̃ chadau.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:19

Rü ñu̱xũchi Tupanapata ga taxü̃ne ga daxũguxü̃ ga naanewa yexmane, rü niwãxna. Rü yéma norü aixepewa nango̱x ga yema baú ga Tupanaarü uneta nagu nuxü̃. Rü naxãẽmacüane, rü poraãcü nicuxcuane, rü naxĩã̱xãchiane rü poraãcü gáuxü̃ narüyi.

Chacaría 1:8

Rü wüxi ga chütaxü̃gu rü chango̱xetü rü nüxü̃ chadau ga wüxi ga duü̃xü̃ ga dauxü̃cüã̱x ga cowaru ga dauxü̃étügu aunagüxü̃. Rü wüxi ga ngatewa yexmaxü̃ ga naixtanüpechitawa nayachaxãchi, norü cowarumaxã. Rü yemaweama nayexmagü ga wüxitücumü ga cowaru ga idauxü̃, rü to ga idáuxraxü̃ rü to ga icómüxü̃.

Ínachoxü̃xü̃chiga 15:3

Rü nüma ya Cori ya Tupana nixĩ i daiwa naporaxü̃. Rü Cori ya Tupana nixĩ i naéga.

Ore i mexü̃ ga Cuáü̃ ümatüxü̃ 1:51

Rü ñanagürü ta ga Ngechuchu: —Aixcüma pemaxã nüxü̃ chixu rü tá nüxü̃ pedaugü nax yawãxnaxü̃ i daxũguxü̃ i naane. Rü tá nüxü̃ pedaugü i Tupanaarü orearü ngeruü̃gü i daxũcüã̱x i ngéma ĩgüxü̃ rü írüxĩgüxü̃ i naétüwa ya Tupana Nane ya duü̃xü̃xü̃ ixĩcü —ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:19

Rü ñu̱xũchi nüxü̃ chadau ga yema nüxíraxü̃xü̃ ga ngo̱xo rü guxü̃ma ga nachixü̃anegüarü ãẽ̱xgacügü ga norü churaragümaxã yéma ngutaque̱xegüxü̃ nax nügü nada̱i̱xü̃ca̱x namaxã ya yimá cowaruétügu ixũcü rü norü churaragü.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:21

Rü yema tara ga gumá cowaruétüwa rütocüa̱xwa ixũxũxü̃maxã nanadai ga yema ngo̱xogüarü churaragü. Rü guxü̃ma ga ngurucugü, rü yemamachimaxã nangãxcharaü̃gü.