Yema Cuáü̃ nüxü̃ dauxü̃ i yixcüra tá ngupetüxü̃chiga 13:16 - Tupanaarü Ore

¹⁶ Rü nanamu nax guxü̃ma ga duü̃xü̃gü, rü woo buxü̃ rüe̱xna yáxü̃, rü woo duü̃xü̃gü i muarü diẽruã̱xgüxü̃ rüe̱xna ngearü diẽruã̱xgüxü̃, rü woo duü̃xü̃gü i ngearü coriã̱xgüxü̃ rüe̱xna duü̃xü̃gü i ixãarü coriã̱xgüxü̃, rü nanamu nax norü tügüneme̱xẽwa rüe̱xna nacatüwa nüxü̃́ nayexmaxü̃ca̱x ga wüxi ga cua̱xruxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 13:16 Referans Kwoze

Yema Cuáü̃ nüxü̃ dauxü̃ i yixcüra tá ngupetüxü̃chiga 20:4

Rü ñu̱xũchi nüxü̃ chadau ga ñuxre ga tochicaxü̃gü. Rü yema tochicaxü̃wa tarütogü ga guxema Tupanaxü̃tawa nayauxgüxe ga pora nax duü̃xü̃güna naca̱xaxü̃ i norü maxü̃chiga. Rü yexgumarüxü̃ ta nüxü̃ chadau ga naãxẽgü ga yema duü̃xü̃gü ga Tupanaarü oreca̱x rü Ngechuchuchigaxü̃ nax yaxugüxü̃ca̱x nadaü̃naagüxü̃. Rü yema nixĩ ga duü̃xü̃gü ga tama yema ngo̱xoxü̃ icua̱xüü̃güxü̃ rü bai ga yema ngo̱xochicüna̱xãxü̃ icua̱xüü̃güxü̃, rü tama nügü ixãgüxü̃ nax nacatüwa rü ẽ̱xna naxme̱xwa yema ngo̱xoégamaxã yaxãégaxü̃. Rü nüxü̃ chadau ga wena nax namaxẽxü̃ ga yema duü̃xü̃gü, rü 1,000 ga taunecü Cristumaxã wüxigu ãẽ̱xgacügü nixĩgü.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:20

Rü yema nüxíraxü̃xü̃ ga ngo̱xo rü niyaxu. Rü wüxigu namaxã niyaxu ga yema to ga ngo̱xo ga orearü uruü̃neta ixĩxü̃ ga yema nüxíraxü̃xü̃ ga ngo̱xope̱xewa naxüxü̃ ga cua̱xruü̃gü ga duü̃xü̃gü tama nüxü̃ cuáxü̃ nax naxügüãxü̃. Rü yema cua̱xruü̃gümaxã nixĩ ga nawomüxẽẽãxü̃ ga yema duü̃xü̃gü ga nüxü̃ icua̱xüü̃güxü̃ ga naxchicüna̱xã ga yema nüxíraxü̃xü̃ ga ngo̱xo rü nügü ixãgüxü̃ nax yema ngo̱xoégamaxã nax yaxüégagüxü̃. Rü yema nüxíraxü̃xü̃ ga ngo̱xo rü yema to ga ngo̱xo ga orearü uruü̃neta ixĩxü̃, rü wüxigu maxẽxacü̃ma nawa nawoü̃ ga gumá naxtaxa ga achúfremaxã iya̱u̱xrachiüne.

Yema Cuáü̃ nüxü̃ dauxü̃ i yixcüra tá ngupetüxü̃chiga 7:3

Rü ñanagürü nüxü̃: “¡Taxṹ i yatacüma penachixexẽẽxü̃ i waixü̃mü rü ngẽma már rü naigü, ñu̱xmatáta yacanacatügü i ngẽma Tupanaarü duü̃xü̃gü ixĩgüxü̃!” ñanagürü.

Echequié 9:4

Rü ñanagürü nüxü̃: —¡Ẽcü, nagu ixũãgüchigü ya daa ĩane ya Yerucharéü̃ rü yaxüégacatü i guxü̃ma i ngẽma duü̃xü̃gü i ñaa ĩanearü chixexü̃gagu ngechaü̃güxü̃ rü ngúxü̃ ingegüxü̃! —ñanagürü.

Wenaxarü naxümatü ga Tupanaarü mugü 6:8

Rü ngẽma nax tama nüxü̃ iperüngümaexü̃ca̱x i ñaa mugü ¡rü pegüme̱xẽwa rü pegücatüwa peyanga̱xcuchi nax ngẽxma peyangexü̃ca̱x perü cua̱xruxü̃!

Wenaxarü naxümatü ga Tupanaarü mugü 11:18

¡Rü pegüãxẽgu namaxã penguxü̃ i ñaa ore, rü nagu perüxĩnüeecha! ¡Rü pegüchacüüwa, rü pegücatüwa peyanga̱xcuchi i ngẽma mugü nax ngẽmaãcü tama nüxü̃ iperüngümaexü̃ca̱x!

Ínachoxü̃xü̃chiga 13:9

Rü ngẽma nax penaxüchigaxü̃ i ngẽma Üpetüchiga rü ñoma wüxi i perü cua̱xruxü̃ i pechacüxüwa rüe̱xna pecatüwa ngẽxmaxü̃ tá pexna nüxü̃ nacuã̱xãchixẽxẽ nax guxũgutáma Cori ya Tupanaarü ucu̱xẽxü̃ pixuxü̃, erü nüma nixĩ ga norü poramaxã Equítuanewa pexü̃ ínanguxü̃xẽẽxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:5

Rü ñu̱xũchi yema tochicaxü̃xü̃tawa inanaxũ ga wüxi ga naga ga ñaxü̃: “Name nixĩ i tórü Tupanaxü̃ picua̱xüü̃gü i guxãma i pema i buxü̃gü, rü yaxü̃gü, rü guxü̃ma i pema i nüxü̃ pengechaü̃ãcüma nax nüxü̃́ pepuracüexü̃”, ñanagürügü.

Yema Cuáü̃ nüxü̃ dauxü̃ i yixcüra tá ngupetüxü̃chiga 20:12

Rü nüxü̃ chadau ga yema yuexü̃ ga yaexü̃ rü buexü̃ ga yema tochicaxü̃wa rütocüpe̱xegu chigüxü̃. Rü ningena ga poperagü. Rü yexgumarüxü̃ ta ningena ga yema popera i nagu yawǘgüxü̃ i ngẽma duü̃xü̃gü i nüxü̃́ ngẽxmaxü̃ i maxü̃ i taguma gúxü̃. Rü yema yuexü̃ rü yexgumarüxü̃ ga ñuxãcü nax namaxẽxü̃ ga wüxichigü rü yexgumarüxü̃ ga ñuxãcü nax yema poperagu naxümatüxü̃ ga nachiga ga wüxichigü ga duü̃xü̃ rü yemaacü namaxã nüxü̃ nixu nax ngextá tá naxĩxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 6:15

Rü ñoma ga naanewa yexmagüxü̃ ga nachixü̃anegüarü ãẽ̱xgacügü, rü ma̱xpǘnemagu rü ma̱xpü̃́nearü nutatanügu nicu̱xgü. Rü wüxigu yexma namaxã nicu̱xgü ga yema togü ga ãẽ̱xgacügü ga taxü̃gü ga ñoma ga naanemaxã icua̱xgüxü̃, rü churaragüarü ãẽ̱xgacügü ga taxü̃gü, rü yema duü̃xü̃gü ga muarü diẽruã̱xgüxü̃, rü yema duü̃xü̃gü ga ñoma ga naanewa poraexü̃, rü guxü̃ma ga duü̃xü̃gü ga mugüruü̃gü ixĩgüxü̃, rü guxü̃ma ga duü̃xü̃gü ga ngearü coriã̱xgüxü̃.

Ngechuchuarü ngúexü̃gü ga yamugüxü̃arü puracüchiga 26:22

Natürü Tupana choxü̃ narüngü̃xẽxẽ rü ngẽmaca̱x taguma íchayachaxãchi nax guxü̃ma i duü̃xü̃gümaxã nüxü̃ chixuxü̃ i Tupanaarü ore rü woo buxü̃ rü yáxü̃. Rü namaxã nüxü̃ chixu ga yema ore ga nũxcümaü̃güxü̃ ga Tupanaarü orearü uruü̃gü rü Moiché nüxü̃ ixugüxü̃ nax ngúxü̃ tá yangexü̃ ya Cristu rü tá nax nayuxü̃, natürü yemawena rü nüma tá yixĩxü̃ ga nüxíra yuwa ínadaxü̃ nax tatanüxü̃ i Yudíugümaxã rü ngẽma to i duü̃xü̃gü i tama Yudíugü ixĩgüxü̃maxã nüxü̃ yaxuxü̃ca̱x i ore i tüxü̃ maxẽxẽẽxü̃. Rü taguma tomare ga ore duü̃xü̃gümaxã chixu —ñanagürü ga Pauru.

Wiyaegü 115:13

Rü tá mexü̃ tümamaxã naxuegu ya yíxema nüxü̃ ngechaü̃güxe woo yáxe rü buxe.

Yox 34:19

Natürü nüma ya Tupana rü guxãxü̃ma wüxigu narüngü̃xẽxẽ. Rü woo ãẽ̱xgacü ixĩxẽ rü woo diẽruã̱xgüxe rü woo ngearü diẽruã̱xgüxe rü Tupana rü wüxigutama guxãxü̃ narüngü̃xẽxẽ. Erü nüma ya Tupana rü guxãxü̃ma nango̱xẽxẽ.

Yema Cuáü̃ nüxü̃ dauxü̃ i yixcüra tá ngupetüxü̃chiga 15:2

Rü yexgumarüxü̃ ta nüxü̃ chadau ga ta̱xacü ga ñoma már baixétügurüxü̃ ixĩxü̃ rü üxüemarüxü̃ iya̱u̱xracüüxü̃. Rü yema márcutügu tachigü ga guxema nüxü̃ rüyexeragüxe ga yema ngo̱xo rü yema ngo̱xochicüna̱xã. Rü tümagü rü tama tügü tixügüéga namaxã ga yema ngo̱xoéga rü yema norü númeru. Rü tümame̱xẽwa nayexmagü ga tümaarü paxetaruü̃gü ga árpa ga Tupana tüxna ãxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:18

Rü ngẽma duü̃xü̃gü i tama cuxrü ixĩgüxü̃ rü poraãcü nanue, natürü nawa nangu i ngẽma ngunexü̃ i nagu tá cunapoxcuexü̃. Rü marü nawa nangu nax nüxü̃ quicagüxü̃ i guxü̃ma i duü̃xü̃gü i yuexü̃. Rü marü nawa nangu nax nüxü̃́ cunaxütanüxü̃ i ngẽma curü duü̃xü̃gü i curü orearü uruü̃gü, rü ngẽma cupe̱xewa imexü̃, rü guxü̃ma i ngẽma cuxü̃ muü̃exü̃ i yaexü̃ rü buexü̃. Rü marü nawa nangu nax icuyanaxoxẽẽxü̃ i ngẽma duü̃xü̃gü i nachixexẽẽxü̃ i ñoma i naane”, ñanagürügü.

Colosenses 3:11

Rü ñu̱xma rü Tupanape̱xewa rü nüetama nixĩ ega Yudíu quixĩxgu rü ẽ̱xna tama. Rü nüetama nixĩ ega ícuwiecha̱xmüxü̃pe̱xechiraü̃gu rü ẽ̱xna tama. Rü nüetama nixĩ ega ta̱xacürü nachixü̃anecüã̱x i duü̃xü̃ quixĩxgu, rü ẽ̱xna duü̃xü̃ i tama poperaxü̃ icuáxü̃ quixĩxgu. Rü nüetama nixĩ ega wüxi i mugüruxü̃ quixĩxgu, rü ẽ̱xna taxúxearü duü̃xü̃ quixĩxgu. Erü ñu̱xma rü guxü̃arü yexera tüxü̃́ mexü̃ nixĩ nax Cristu rü guxü̃arü yora yixĩxü̃ rü guxü̃wa nangẽxmaxü̃.

Efesios 6:8

Rü name nixĩ i ngẽmaãcü mea pepuracüe, erü nüxü̃ pecua̱x rü wüxichigü i pema rü woo wüxi i coriarü mugüruxü̃ pixĩgügu rü ẽ̱xna taxúxearü mugüruxü̃ pixĩgügu, natürü tórü Cori ya Ngechuchu tá pexü̃́ nanaxütanü naxca̱x i ngẽma mexü̃ i pexüxü̃.

Gálatas 6:17

Rü ñu̱xmawena rü tama chanaxwa̱xe nax texé ta̱xacürü guxchaxü̃gü choxna ãxü̃. Erü choma rü aixcüma tórü Cori ya Ngechuchuarü duü̃xü̃ chixĩ. Rü ngẽma chorü o̱xrigüchica i chowa ngẽxmagüxü̃wa nüxü̃ pecua̱x nax aixcüma yixĩxü̃ i ngẽma.

Gálatas 3:28

Rü ñu̱xma rü Tupanape̱xewa rü nüetama nixĩ ega woo Yudíugü pixĩgügu rü ẽ̱xna tama. Rü nüetama ega woo wüxi i coriarü duü̃xü̃gü pixĩgügu rü ẽ̱xna taxúearü duü̃xü̃gü pixĩgügu. Rü nüetama ega woo piyatügu rü ẽ̱xna pingexgu. Erü ñu̱xma nax Ngechuchu ya Cristuarü duü̃xü̃gü nax pixĩgüxü̃, rü wüxitama i duü̃xü̃ pixĩgü i guxãma i pemax.

1 Corintios 12:13

Rü yexguma íibaiü̃gu rü Tupanaãxẽ ya Üünecü rü wüxitama i naxü̃ne tüxü̃ nixĩgüxẽxẽ. Rü woo Yudíugü nax ixĩgüxü̃, rüe̱xna tama Yudíugü nax ixĩgüxü̃, rü woo mugüruxü̃ ixĩgügu, rüẽ̱xna taxúxeme̱xẽwa ingẽxmagügu, natürü wüxitama i naxü̃ne tüxü̃ nixĩgüxẽxẽ i nümax i Naãxẽ ya Üünexü̃ i nüxicatama ixĩxü̃. Rü guxãma i yixema rü Tupana marü tüxna nananguxẽxẽ i ngẽma Naãxẽ ya Üünexü̃.

Wiyaegü 49:2

Rü guxãma i pema i diẽruã̱xgüxe, rü pema ya ingearü diẽruã̱xgüxe, rü pema i duü̃xü̃gümaxã icua̱xgüxe, rü pema i togüme̱xẽwa ngẽxmagüxe ¡rü mea iperüxĩnüe i ñaa ore!

Norü taxre ga to ga popera ga ãẽ̱xgacügüchiga ümatüxü̃ 15:13

Rü wüxi ga uneta inaxügü naxca̱x ga duü̃xü̃ ga tama Tupanaga ĩnüexü̃ nax noxtacüma yama̱xgüãxü̃ca̱x rü woo yaxü̃ rü woo buxü̃ rü woo yatüxü̃ rü woo ngexü̃.

Norü taxre ga popera ga Timutéuca̱x naxümatüxü̃ ga Pauru 3:8

Rü ngẽma duü̃xü̃gü i chixexü̃maxã ngẽma ngexü̃güxü̃ womüxẽẽgüxü̃, rü chixexü̃guxicatama narüxĩnüe, rü tama aixcüma nayaxõgü i Tupanaarü ore. Rü naxchi naxaie i ngẽma ore i aixcüma ixĩxü̃, naxrüxü̃ ga yema yuüxü̃gü ga Yane rü Yambré ga tama Moichéga ĩnüechaü̃xü̃.

Chacaría 13:6

Rü ngẽxguma texé nüxna cagu: “¿Rü tü̱xcüü̃ cuwitüxüne?” rü nüma rü ñaãcü tá tüxü̃ nangãxü̃: “Chomücüpatagu choxü̃ nawigü” —ñanagürü.