Yema Cuáü̃ nüxü̃ dauxü̃ i yixcüra tá ngupetüxü̃chiga 11:19 - Tupanaarü Ore

¹⁹ Rü ñu̱xũchi Tupanapata ga taxü̃ne ga daxũguxü̃ ga naanewa yexmane, rü niwãxna. Rü yéma norü aixepewa nango̱x ga yema baú ga Tupanaarü uneta nagu nuxü̃. Rü naxãẽmacüane, rü poraãcü nicuxcuane, rü naxĩã̱xãchiane rü poraãcü gáuxü̃ narüyi.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:19 Referans Kwoze

Yema Cuáü̃ nüxü̃ dauxü̃ i yixcüra tá ngupetüxü̃chiga 16:21

Rü daxũwa narüyi ga gáuxü̃ ga itapütaxü̃, rü duü̃xü̃güétügu nayi. Rü wüxipütachigü ga yema gáuxü̃, rü 40 ga quírugu nixĩ ga nayaxü̃. Rü ga duü̃xü̃gü rü Tupanamaxã naguxchigagü nagagu ga yema poxcuruxü̃ ga gáuxü̃, yerü poraãcü nüxü̃́ nangu̱x ga yema poxcu ga Tupana namaxã napoxcuexü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 4:5

Rü yema tochicaxü̃ ga ngãxü̃wa üxü̃ rü yemawa ínaxũxũ ga ãẽmacügü rü duruanexü̃ rü nagagü. Rü yema tochicaxü̃pe̱xewa nayexmagü ga 7 ga omügü ga yéma naigüxü̃. Rü yema omügü nixĩ ga yema 7 ga Tupanaãxẽ ya Üünecü.

Yema Cuáü̃ nüxü̃ dauxü̃ i yixcüra tá ngupetüxü̃chiga 8:5

Rü ñu̱xũchi ga yema orearü ngeruxü̃ rü nanayaxu ga yema buetarexacü ga pumaraarü gute̱xeruxü̃. Rü yema pumaraarü gute̱xechicawa nanayaxu ga ã́xwe ga naicü, rü gumámaxã nanaxüãcu ga gumá buetarexacü. Rü ñu̱xũchi ñoma ga naaneétügu nanaña. Rü yexgumatama poraãcü nidu̱xruane, rü nayexma ga nagagü, rü naxãẽmacüane rü naxĩã̱xãchiane.

Ichaía 30:30

Rü nüma ya Cori ya Tupana rü tá pexü̃ nüxü̃ naxĩnüxẽxẽ i naga i tagaxüchixü̃ rü tá pexü̃ nanawe̱x i norü pora. Rü perü uanümaxã tá poraãcü nanu. Rü üxüema i guxü̃xü̃ iguxü̃ tá naxca̱x nango̱xẽxẽ, rü ãẽmacügü tá naxca̱x nanaxüxẽxẽ rü taxüchicü ya pucü tá ínanguxẽxẽ rü gáuxü̃püta tá narüyixẽxẽ.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:11

Rü ñu̱xũchi nüxü̃ chadau ga daxũguxü̃ ga naane nax yawãxnaxü̃. Rü yéma nango̱x ga wüxi ga cowaru ga cómüxü̃. Rü gumá naétüwa rütocü rü naéga nixĩ i Aixcüma Yanguxẽẽcü rü Ixaixcümacü. Rü nüma rü tama inatü i ngẽxguma poxcu naxueguxgu rü ngẽxguma norü uanügümaxã nügü nadaixgu.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:15

Rü yema norü 7 ga Tupanaarü orearü ngeruxü̃, rü nayacue ga norü cornéta. Rü nayexma ga nagagü ga tagaxü̃ ga daxũguxü̃ ga naanewa inaxũgüxü̃ ga ñagüxü̃: “Ñu̱xma rü tórü Cori ya Tupana rü Nane ya Cristu nixĩ i namaxã icua̱xgücü i guxü̃ma i ñoma i naane. Rü nümagü rü guxü̃gutáma namaxã inacua̱xgü”, ñagüxü̃.

Iraétanüxü̃arü muxchiga 10:33

Rü yemaacü guma Cori ya Tupanaarü ma̱xpǘne ga Chinaíwa inaxĩãchi rü tomaepü̱x ga ngunexü̃ inaxĩ. Rü yema baú ga Cori ya Tupanaarü mugüpane nagu üxü̃ rü nape̱xegu nayangegü. Rü yemaacü wüxi ga nachica ga mexü̃ nax nagu napegüxü̃ca̱x nadaugü.

Iraétanüxü̃arü muxchiga 4:15

Rü ngẽxguma Aróü̃ rü nanegü marü nüxü̃́ nagu̱xgu nax yanáixpüü̃güãxü̃ i guxü̃ma i ngẽma Tupanapataarü ngẽmaxü̃gü i üünegüxü̃, rü ngẽxguma marü inaxĩãchichaü̃gu, rü nüma i Queáxtanüxü̃ rü ngéma tá naxĩ nax yanaxãxü̃ca̱x i guxü̃ma i ngẽma ngẽmaxü̃gü. Natürü taxũtáma nüxü̃ ningõgügü i ngẽma ngẽmaxü̃gü i üünegüxü̃ nax tama nayuexü̃ca̱x. Rü guxü̃ma i ngẽma Tupanapataarü ngẽmaxü̃gü rü Queáxtanüxü̃ tá nixĩ i yanaxü̃.

Iraétanüxü̃arü muxchiga 4:5

Rü ngẽxguma tá inaxĩãchigu i duü̃xü̃gü nax to i nachicawa naxĩxü̃, rü nüma i Aróü̃ rü nanegü tá nixĩ inayauxgüxü̃ i norü tüyepe̱xeruxü̃ i ngẽma naxmachiã i Üünexüchixü̃. Rü ngẽmamaxã tá nanatüétügü i ngẽma baú i Tupanaarü mugü nagu nuxcuxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 16:18

Rü ñu̱xũchi naxãẽmacüane, rü poraãcü nicuxcuane, rü poraãcü nidu̱xruane. Rü poraãcü naxĩã̱xãchiane. Rü noxri Tupana duü̃xü̃güxü̃ üxgumama rü taguma nayexma ga wüxi ga ĩã̱xãchiane ga yemarüxü̃ poraxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:13

Rü yexgumatama poraãcü naxĩã̱xãchiane. Rü wüxi ga yema norü 10 arü üye ga guma ĩane, rü niwa̱xgü. Rü 7,000 ga duü̃xü̃gü nayue namaxã ga yema ĩã̱xãchiane. Rü yema togü ga duü̃xü̃gü ga maxẽxü̃ rü poraãcüxüchi namuü̃e. Rü Tupana ya daxũguxü̃ i naanewa ngẽxmacüxü̃ nicua̱xüü̃gü.

Yema Cuáü̃ nüxü̃ dauxü̃ i yixcüra tá ngupetüxü̃chiga 8:7

Rü yema nape̱xewa yexmaxü̃ ga Tupanaarü orearü ngeruxü̃ rü nüxíra nayacue ga norü cornéta. Rü yexgumatama ñoma ga naaneétügu narüyi ga gáuxü̃pütagü rü üxüẽma ga nagümaxã ãéü̃xü̃. Rü wüxi ga yema norü tomaepü̱xarü üye ga naane rü nixa. Rü yexgumarüxü̃ ta wüxi ga yema norü tomaepü̱xarü üye ga naixnecü rü nixa. Rü guxü̃ma ga natüane rü nixae.

Ichaía 32:19

Rü woo taxü̃ i gáuxü̃pütagü rüyixgu rü perü naixnecüxü̃ nachixexẽẽãgu, rü woo perü ĩanegu napogüegu, natürü i pema rü tá petaãẽ rü taxü̃ i dexá íngexmaxü̃gu tá petoegü. Rü ngéma tá penachibüexẽxẽ i perü woca rü perü búru.

Ichaía 28:2

Rü ngẽmaca̱x nüma ya Cori ya Tupana rü ngéma tá nanamugü i norü uanügü i churaragü i poraxüchixü̃. Rü ñoma gáuxü̃ i dauxü̃wa rüyi̱xü̃rüxü̃ rü buanecü ya taxüchicü ya ĩpatagügu pogüxü̃rüxü̃ tá nixĩgü. Rü ñoma pucü ya taxüchicü ya guxü̃wama nanguanexẽẽcürüxü̃ ta nixĩgü i ngẽma churaragü. Rü ngẽma norü uanügü i churaragü rü tá nagu napogüe ya yima ĩane ya Chamária ya namaxã nügü yacua̱xüü̃güne i ngẽma duü̃xü̃gü i ngãxwa̱xegüxü̃ i Efraíü̃anewa ngẽxmagüxü̃.

Echequié 13:11

Rü ngẽma cómüxü̃maxã nachagüxü̃ i ngẽma naxtapü̱x, rü namaxã nüxü̃ ixu rü tá niwa̱x i ngẽma naxtapü̱x. Erü pucü ya tacü tá ínangu, rü gáuxü̃ i ñoma nutapütagürüxü̃ ixĩxü̃ tá narüyi. Rü wüxi ya buanecü ya tacü ya íxãũxẽmacü tá ínangu, rü tá niwa̱x i ngẽma naxtapü̱x.

Wiyaegü 105:32

Rü pucüchicüxü yema nachixü̃aneétügu nanayixẽxẽ ga gáuxü̃. Rü ãẽmacü inaxüxẽxẽ.

Wiyaegü 18:12

Rü nawa ínaxũxũ ga ba̱i̱xbeanexü̃ rü nanangóonexẽxẽ. Rü yema caixanexü̃wa narüyi ga gáuxü̃ rü ã́xwe ga inaicü.

Yochué 10:11

Rü yexguma Iraétanüxü̃cha̱xwa nabuxmügu ga yema Amoréutanüxü̃ nagu ga yema Bex-oróü̃arü tuãchixü̃, rü nüma ga Cori ya Tupana rü gáuxü̃ ga itapütaxü̃ naétügu nayixẽxẽ. Rü Iraétanüxü̃ daixü̃arü yexera yema gáuxü̃maxã nayue ga Amoréutanüxü̃.

Echequié 13:13

Rü ngẽmaca̱x i choma i Cori ya Tupana rü nüxü̃ chixu rü chorü numaxã tá íchananguxẽxẽ i wüxi ya buanecü ya íxã̱ũ̱xẽmacü. Rü chorü numaxã tá tacü ya pucü íchananguxẽxẽ. Rü gáuxü̃ i tapütaxü̃ tá charüyi̱xẽxẽ nax ngẽmaãcü chorü numaxã chanaxoxẽxẽ i guxü̃ma.

Yema Cuáü̃ nüxü̃ dauxü̃ i yixcüra tá ngupetüxü̃chiga 4:1

Rü yemawena ga choma ga Cuáü̃ rü ichadauwenü rü nüxü̃ chadau ga wüxi ga ĩã̱x ga iwãxnaxü̃ ga daxũguxü̃ ga naanewa. Rü yema naga ga nacornétagaraü̃xü̃ ga noxri nüxü̃ chaxĩnüxü̃ ga chomaxã idexaxü̃, rü ñanagürü choxü̃: “¡Nuxã naxĩnagü! Rü tá cuxü̃ nüxü̃ chadauxẽxẽ i ngẽma yixcüra tá ngupetüxü̃”, ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 7:15

Rü ngẽmaca̱x nixĩ i Tupanaarü tochicaxü̃pe̱xewa tangexmagüxü̃ rü ngunecü rü chütacü rü nüxü̃́ tapuracüexü̃ i napatawa. Rü nümatama ya Tupana ya tochicaxü̃wa rütocü rü napatawa tá tüxna nadau.

Yema Cuáü̃ nüxü̃ dauxü̃ i yixcüra tá ngupetüxü̃chiga 12:1

Rü ñu̱xũchi daxũwa nango̱x ga wüxi ga cua̱xruxü̃ ga taxü̃. Rü iyexma ga wüxi ga nge ga üa̱xcümaxã ãxchirucü. Rü tauemacüétügu ichi. Rü 12 ga woramacurigü nixĩ ga ngĩrü nga̱xcueruxü̃ ga ngĩeruwa yexmaxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 16:1

Rü ñu̱xũchi nüxü̃ chaxĩnü ga wüxi ga naga ga tagaãcü gumá Tupanapata ga taxü̃newa inaxũxü̃ ga ñaxü̃ nüxü̃ ga yema 7 ga orearü ngeruü̃gü: “¡Ngéma pexĩ, rü naaneétügu peyabagüãcu i ngẽma 7 i copugü i Tupanaarü numaxã ixããcuxü̃!” ñanagürü.