Ochéa 4:13 - Tupanaarü Ore

¹³ Rü ma̱xpǘnegüwa rü ngẽma naigü i taxü̃arü gáuxchipetawa norü tupananetagüca̱x ínanagugü i pumarate̱xegü rü norü ãmaregü. Rü ngẽmaca̱x pexacügü rü peneã̱xgü rü ngeãẽgüxü̃ nixĩgü.

Ochéa 4:13 Referans Kwoze

Ichaía 1:29

Rü pema rü tá na̱xcha̱xwa pexãnee i ngẽma naigü i taxü̃ rü putüraanecügü i perü me ixĩxü̃ i nawa nüxü̃ picua̱xüü̃güxü̃ i ngẽma tupananetachicüna̱xãgü.

Echequié 6:13

Rü ngẽxguma ngẽma maxẽxü̃ i duü̃xü̃gü nüxü̃ daugügu i ngẽma yuexü̃ i naxchicüna̱xãgüpe̱xegu nuquegüxü̃, rü ãmarearü guruü̃gücüwagu nuquegüxü̃, rü guxü̃ma i ngüchitaerugüxü̃gu nuquegüxü̃, rü ma̱xpǘnegügu nuquegüxü̃, rü guxü̃ma i nai i taetaxü̃tüü̃gu nuquegüxü̃, rü guxü̃ma i castaña i taetaxü̃tüü̃gu nuquegüxü̃, rü ñu̱xũchi ngẽma nachicagü i norü naxchicüna̱xãgüca̱x pumarate̱xe íyagugüxü̃gu nuquegüxü̃, rü ngẽxguma ngẽmaxü̃ nadaugügu i ngẽma duü̃xü̃gü i íyaxügüxü̃ rü tá nüxü̃ nicua̱xãchitanü nax choma chixĩxü̃ ya Cori ya Tupana.

Yeremía 3:6

Rü yexguma Yochía ãẽ̱xgacü ixĩxgu ga Yudáanewa rü yexguma nixĩ ga Cori ya Tupana ga choxü̃ ñaxü̃: —¿Nüxü̃ cudauxü̃ i ngẽma naxügüxü̃ i ngẽma Iraéanecüã̱xgü i tama ixĩnüechaü̃xü̃? Rü nümagü rü guxü̃nema ya ma̱xpǘnegüwa, rü guxü̃ma i nai i imeetaxü̃tüü̃wa rü tupanachicüna̱xãxgüxü̃ nicua̱xüü̃gü. Rü ngẽmaãcü choxna nixĩgachi ñoma wüxi i nge i ngĩtena ngeãẽcürüxü̃.

Amúx 7:17

Natürü i ñu̱xma rü ñaa nixĩ i ngẽma ore i Cori ya Tupana cumaxã nüxü̃ ixuxü̃, rü ñanagürü: “Cuxma̱x rü daa ĩanewa tátama ngexü̃ i ngeãẽxü̃ tixĩ. Rü ngẽma cunegü i iyatüxü̃ rü ñu̱xũchi yíxema cuxacügü ya ingexe rü taramaxã tá tüxü̃ nadai. Rü ngẽma cuanegü rü ngẽma uanügü rü sortéuãcüma tá nügü nayanu. Rü cuma rü duü̃xü̃gü i tama Tupanaxü̃ cua̱xgüxü̃arü nachixü̃anegu tá cuyayu. Rü norü uanügü i ngẽma Iraétanüxü̃ rü Iraéanearü yáxü̃wa tá nanagagü” —ñanagürü ya Cori ya Tupana.

Ochéa 11:2

Natürü yexguma yexeraãcü naxca̱x chacagu nax chowe naxĩxü̃ca̱x, rü nüma ga Iraétanüxü̃ rü yexeraãcü choxna nixĩgachi. Rü nüma ga chorü duü̃xü̃gü rü tupananetagüca̱x ínanagu ga ãmaregü rü ngẽmachicüna̱xãgüca̱x ínanagu ga pumarate̱xe.

Ochéa 2:13

Rü tá chanapoxcue i ngẽma duü̃xü̃gü naxca̱x ga yema ngunexü̃gü ga nagu norü tupananeta ga Baáchicüna̱xãgüca̱x pumarate̱xe yagugüxü̃. Rü yexguma rü ãneramaxã rü nachagümaxã nügü ninga̱xãẽgü nax nüxü̃ yacua̱xüü̃güxü̃ca̱x ga yema norü tupananeta ga Baáchicüna̱xãgü. Rü yemaca̱x choxü̃ inarüngümae. Rü chomax ya Cori ya Tupana nixĩ i nüxü̃ chixuxü̃ i ngẽma —ñanagürü.

Echequié 16:25

Rü guxü̃ma ga curü namagüarü gu̱xwa rü cunaxü ga nachicagü ga tupananetachicüna̱xãgüxü̃ nawa yacua̱xüü̃güxü̃. Rü yema nax cumexẽchixü̃gagu cunaxüecha ga curü ngúchaü̃ ga ãũãchixü̃, rü namaxã cumaxü̃ ga guxü̃ma ga duü̃xü̃gü ga yéma chopetüxü̃.

Echequié 16:16

Rü cuma rü yema cuxchirugümaxã ma̱xpǘnegügu cunaxü ga düxenügü nax yimawa nüxü̃ quicua̱xüü̃güxü̃ca̱x ga naxchicüna̱xãgü, rü nawa ngúchaü̃ cuxüxü̃ca̱x.

Yeremía 3:13

Pa Iraéanecüã̱xgüx, ¡nüxü̃ pixu i perü chixexü̃ i chope̱xewa pexüxü̃ nax chomaxã penuexü̃, rü guxü̃ma i nai i meetaxü̃tüü̃wa tupananetagüxü̃ picua̱xüü̃güxü̃ rü tama chauga pexĩnüexü̃! Rü choma ya Cori ya Tupana nixĩ i nüxü̃ chixuxü̃ i ngẽma chorü ore’ ” —ñanagürü.

Yeremía 2:20

Rü nũxcümacürüwatama nixĩ ga choxna pixĩgachixü̃ rü tama chauga pexĩnüechaxü̃xü̃. Rü ñaperügügü: “Tama cuga taxĩnüechaü̃”, ñaperügügü. Pema rü pechauechitae ñoma wüxi i ngexü̃ i natena ngeãẽxü̃rüxü̃, yerü guxü̃ma ga ma̱xpǘnegüwa rü guxü̃ma ga naigü ga imeetaxü̃tüü̃wa nüxü̃ picua̱xüü̃gü ga yema tupananetachicüna̱xãgü.

Ichaía 57:7

Rü pema rü wüxi ya máchanene ya ma̱xpǘnegu pexĩgü rü ngẽxma pepegü rü ngéma perü tupananetagüxü̃ picua̱xüü̃gü rü naxca̱x peyagu i naxü̃nagü.

Ichaía 57:5

Rü naigü i taxü̃tüxü̃wa rü guxü̃ma i naigü i metanüxü̃tüxü̃wa rü pegümaxã pemaxẽ nax ngẽmaãcü nüxü̃ picua̱xüü̃güxü̃ca̱x i ngẽma perü tupananetagü. Rü doxonexü̃güwa rü nutatanüarü ãxmagüxü̃wa perü tupananetagüca̱x tüxü̃ pidai rü tüxü̃ ípigu ya penegü rü pexacügü.

Yeremía 44:8

¿Rü tü̱xcüü̃ choxü̃ penuxẽxẽ namaxã i ngẽma chixexü̃ i pexügüxü̃ rü ngẽma nax pumarate̱xe naxca̱x pigugüxü̃ i norü tupananetagü i Equítuane i nawa pengugüxü̃ nax nua pemaxẽxü̃ca̱x? Rü ngẽma chixexü̃ i pexügüxü̃gagu rü pematama naxca̱x pedaugü i perü poxcu. Rü ngẽmaãcü wüxi i cua̱xruxü̃ tá pixĩgü naxca̱x i guxü̃ma i ngẽma togü i nachixü̃anegü i ñoma i naanewa ngẽxmagüxü̃. Rü tá chixexü̃maxã pexü̃ narüdaunü rü tá pexü̃ nacugüe.

Ochéa 10:8

Rü tá nagu napogüe i napatagü i ngẽma tupananetagü ga Iraéanecüã̱xgü chixexü̃ nawa ügüxü̃. Rü ngẽma norü ãmarearü guruü̃güétüwa tá narüxügü i chuxchuxü̃gü rü toragü. Rü nüma i ngẽma duü̃xü̃gü rü tá ngẽma ngüchitaerugüxü̃ ñanagürügü: “¡Toétüwa pebuemügü!” ñanagürügü. Rü yima ma̱xpǘnegüxü̃ tá ñanagürügü: “¡Toétügu peyi!” ñanagürügü —ñanagürü ga Ochéa.

Norü taxre ga popera ga ãẽ̱xgacügüchiga 17:7

Rü yema guxchaxü̃ nüxü̃ nangupetü ga yema Iraéanecüã̱xgü, yerü tama naga naxĩnüe ga Cori ya Tupana ga Equítuanewa ínanguxü̃xẽẽcü ga Faraóü̃me̱xẽwa. Rü tomare ga tupanagüxü̃ nicua̱xüü̃gü, rü yemaacü Tupanape̱xewa chixexü̃ naxügü.

Norü taxre ga popera ga ãẽ̱xgacügüchiga 23:7

Rü yexgumarüxü̃ ta nagu napogüe ga yema ucapugü ga Cori ya Tupanapata ga taxünewa yexmagüxü̃ ga yatügü nawa nügümaxã maxẽxü̃ nax yemaacü norü tupananetagüxü̃ yacua̱xüxü̃güxü̃ca̱x. Rü yema ucapugüwa ta nixĩ ga ngexü̃gü namugüãxü̃ ga naxchiru ga tupananeta ga Acheráarü düxruxü̃.