Ochéa 13:9 - Tupanaarü Ore

⁹ Pa Iraéanecüã̱xgüx, ñu̱xmax rü tá pexü̃ chadai rü taxúetama pexü̃ ítapoxü̃.

Ochéa 13:9 Referans Kwoze

Yeremía 2:17

Rü yema pexü̃ nangupetü nagagu nax choxna pixĩgachixü̃ i choma i perü Cori ya Tupana chixĩxü̃. Rü choma nixĩ ga namawa pemaxã ichacuáxü̃.

Yeremía 2:19

Rü ngẽma perü chixexü̃gagu tátama nixĩ i pepoxcuexü̃, rü ngẽma nax tama choxü̃ pengechaxü̃xü̃gagu tá nixĩ i ngúxü̃ pingegüxü̃. ¡Nagu perüxĩnü rü tá nüxü̃ pedau nax poraãcü nachixexü̃ rü nangúxü̃ nax choxna pixĩgachixü̃ rü tama choxü̃ picua̱xüü̃güxü̃ i choma nax perü Cori ya Tupana chixĩxü̃! Rü choma ya Cori ya Tupana ya Guxãétüwa Ngẽxmacü chixĩ rü pemaxã nüxü̃ chixu i ngẽma.

Wenaxarü naxümatü ga Tupanaarü mugü 33:26

Rü yema namaxã yagúexẽẽãxü̃ ga norü dexa ga Moiché rü ñanagürü: —Pa Iraétanüxü̃x, rü nataxuma i to i perü Tupanamaxã wüxiguxü̃. Rü nüma rü norü poramaxã dauxü̃guxü̃ i caixanexü̃gu nixũ nax perü ngü̃xẽẽwa naxũxü̃ca̱x.

Ochéa 14:1

Pa Iraéanecüã̱xgüx, pema nax perü chixexü̃gagu guxchaxü̃gu peyixü̃x ¡rü naxca̱x pewoegu ya Cori ya perü Tupana!

Yeremía 5:25

Natürü perü chixexü̃gagu tama pexca̱x chanango̱xẽxẽ i ngẽma mexü̃gü. Rü perü pecadugagu tama pexü̃́ nangẽxma i ngẽma mexü̃gü.

Maraquía 1:9

Rü ñanagürü ta: —Dücax, Pa Chacherdótegüx, Tupanana peca nax nüxü̃́ pengechaü̃tümüxü̃xü̃ca̱x Natürü ngẽxguma chixemarexü̃ i ãmaregü nüxna pixãgügu ¡rü taxũtáma nagu perüxĩnüe nax ngẽmamaxã nataãẽxü̃ i nümax! —ñanagürü ya Tupana ya Guxü̃étüwa Ngẽxmacü.

Ochéa 13:4

Rü Tupana rü ñanagürü: —Pa Iraétanüxü̃x, yexguma Equítuanewa peyexmagügucürüwa rü chomatama nixĩ i perü Tupana chixĩxü̃. Rü tama chanaxwa̱xe nax ta̱xacürü tomaxã petupanaã́xü̃, erü chaxicatama nixĩ i perü Tupana rü nataxuma i to i perü poxü̃ruxü̃ ixĩxü̃.

Ichaía 3:11

Natürü wüxi i taxü̃ i ãũcümaxü̃chixü̃ nixĩ naxca̱x i ngẽma duü̃xü̃ i chixexü̃gu maxü̃xü̃. Rü ngẽma chixexü̃ i naxüxü̃gagu rü tá guxchaxü̃ naxca̱x ínangu. Erü Cori ya Tupana rü ngẽma chixexü̃ i naxüxü̃ca̱x tá nanapoxcu.

Ichaía 3:9

Rü ngẽma duü̃xü̃gü rü nachametüwatama nango̱xama nax chixexü̃ naxügüxü̃. Rü ngẽma duü̃xü̃gü rü Chodómacüã̱xgürüxü̃ norü pecadumaxã nügü nicua̱xüxü̃, rü tama naxãnee. Rü wüxi i taxü̃ i ãũcümaxü̃chixü̃ nixĩ naxca̱x i ngẽma duü̃xü̃gü, erü nümagütama naxca̱x nadaugü i norü poxcu.

Ucu̱xẽgüchiga 8:36

Natürü texé ya choxna ixũgachixe rü ãũcümaxü̃wa tügütama tangẽxmaxẽxẽ. Rü texé ya chauxchi aixe rü yuxü̃ tangechaü̃ —ñanagürü ga yema cua̱x.

Ucu̱xẽgüchiga 6:32

Natürü yíxema ngexü̃ i ãtéxü̃maxã maxü̃́xẽ, rü tama tümaãẽxü̃ tacua̱x rü tügütama chixexü̃wa tangẽxmaxẽxẽ.

Wiyaegü 146:5

Rü tataãxẽ ya yíxema Acóbuarü Tupanaxü̃tawa nayaxúxe i tümaarü ngü̃xẽxẽ rü nüxü̃́ yaxṍxe ya Cori ya Tupana.

Wiyaegü 46:1

Nüma ya Tupana rü tórü poxü̃ruxü̃ nixĩ rü tórü poraxẽẽruxü̃ nixĩ. Rü nüma rü tüxü̃ narüngü̃xẽxẽ ega guxchaxü̃ taxca̱x ínguxgux.

Wiyaegü 33:20

Rü Tupanaxü̃tagu nixĩ i nüxü̃ yarüngauxü̃ i tórü maxü̃. Erü nüma nixĩ i tüxü̃ nangü̃xẽẽxü̃ rü tüxü̃ ínapoxü̃xü̃.

Wenaxarü naxümatü ga Tupanaarü mugü 33:29

¡Pa Iraétanüxü̃x, petaãxẽgü! Pema rü taxúema pemaxã tawüxigu erü nümatama ya Cori ya Tupana nixĩ i pexü̃ ínapoxü̃xü̃, rü pexü̃ nangü̃xẽẽxü̃. Rü nüma nixĩ i perü tara i namaxã perü uanügüxü̃ pedaixü̃. Rü perü uanügü rü pepe̱xegu tá nacaxã́pü̱xügü. Rü pema rü tá penaxãnexẽxẽ rü penapu̱xcuchigüama —ñanagürü ga Moiché.

Yeremía 4:18

Rü ñanagürü: —Ngẽma pecümagagu, rü ñu̱xũchi ngẽma chixexü̃ i pexügüxü̃gagu nixĩ i ngẽma pexü̃ ngupetüxü̃. Rü ngẽma perü chixexü̃ nixĩ i pexca̱x ínanguxẽẽxü̃ i ñaa guxchaxü̃ i poraãcü pexü̃ ngúxü̃ —ñanagürü ya Cori ya Tupana.

Maraquía 1:12

Natürü i pema rü choxü̃ pinuxẽxẽ erü tama nüxü̃ pengechaxü̃ i ngẽma chorü ãmarearü guruxü̃ i chorü mecha ixĩxü̃. Rü ngẽmaca̱x i ãmare i tama mexü̃ cha̱u̱xca̱x nawa pigugü.

Maraquía 1:13

Rü pema rü ñaperügügü: “Marü tipae nax tanaxüechaxü̃ i ngẽma puracü”, ñaperügügü. Rü ngẽmaca̱x choxü̃ pexoe. Rü ngẽmaétüwa rü pema rü nagu perüxĩnüe nax namaxã chataãẽxü̃ i ngẽma naxü̃na i naxca̱x pengĩ́xü̃ rü woca i chixri ixũxü̃ rüe̱xna ida̱xawexü̃ i choxü̃ namaxã pexãmareã́xü̃.

Norü taxre ga to ga popera ga ãẽ̱xgacügüchiga ümatüxü̃ 28:23

Rü yema nax Chíriaanearü churaragü rü ü̃pa Acháxü̃ rüporamaegüxü̃ ga yexguma namaxã nügü nadaixgu, rü yemaca̱x Acháx nagu narüxĩnü nax naporaxü̃ ga yema Damácuarü tupanagü. Rü yemaca̱x naxca̱x ãmaregü ínagu yerü nagu narüxĩnü nax nümagü rü tá nüxü̃ nangü̃xẽxẽxü̃ ega naxca̱x ãmare ínaguxgu. Natürü yema tupananetagügagu nixĩ ga guxchaxü̃ Acháxca̱x rü guxü̃ma ga Iraétanüxü̃ca̱x ínguxü̃.

Ochéa 7:14

Rü ngẽxguma yada̱xaweegu rü ngúxü̃ yangegügu, rü norü pechicaxü̃güwa ngü̃xẽẽca̱x choxna nacagüe, natürü tama aixcüma norü ngúchaü̃maxã choxna nacagüe. Rü nügü nayapiexẽxẽ nax ngẽmaãcü tríguca̱x rü bínuca̱x ínacagüxü̃ca̱x. Natürü tama aixcüma chauga naxĩnüe.

Ochéa 7:15

Rü choma rü mea chanangúexẽxẽ rü pora nüxna chaxã, natürü i nümagü rü chixexü̃gu chomaxã narüxĩnüe.