Ochéa 12:11 - Tupanaarü Ore

¹¹ Rü Garaáxanewa nangẽxma i muxü̃ma i tupananetagümare, natürü ngẽmagü rü natüca̱xmamare nixĩgü. Rü Guirigáwa rü tupananetagüca̱x nanadai rü nayagu ga muxü̃ma ga woca i yatüxü̃. Natürü ngẽma norü ãmarearü guruü̃güarü nutagü rü naanegügu tá nixãũxchitachigümare —ñanagürü.

Ochéa 12:11 Referans Kwoze

Ochéa 8:11

Rü ngẽmaãcü tá nüxü̃ nangupetü i ngẽma Iraéanecüã̱xgü nagagu i ngẽma muxü̃ i norü tupananetagüarü ãmarechicagü i nawa pecadu naxügüxü̃.

Ochéa 6:8

Rü ngẽma duü̃xü̃gü i ĩane ya Garaáxcüã̱xgü rü chixexü̃arü üruü̃gü nixĩgü rü máetatanüxü̃ nixĩgü.

Ochéa 4:15

Pa Iraéanecüã̱xgüx, pema rü woo nüxü̃ picua̱xüü̃güamagu i ngẽma tupananetagü, natürü tama chanaxwa̱xe nax ngẽma Yudáanecüã̱xgü rü ta nagu naxĩxü̃ i ngẽma nacümagü i chixexü̃. ¡Rü taxṹ i nüxü̃ picua̱xüü̃güxü̃ i ngẽma naxchicüna̱xãgü i Guirigáwa rü Bex-abéü̃wa ngẽxmagüxü̃! ¡Rü taxṹ i chauégagu ipexunetaxü̃!

Ochéa 9:15

Tupana rü ñanagürü: —Pemax, Pa Iraéanecüã̱xgüx, rü Guirigáwa nixĩ ga penaxüxü̃ ga naguxü̃raü̃xü̃ ga chixexü̃. Rü yéma nixĩ ga ichaxügüxü̃ nax pexchi chaxaixü̃. Rü ngẽma perü chixexü̃gagu rü tá pexü̃ íchawoxü̃ i chorü naanewa. Rü marü taxũtáma pexü̃ changechaü̃ erü guxü̃ma i perü ãẽ̱xgacügü rü tama chauga naxĩnüe.

Ochéa 10:1

Rü Ochéa rü ñanagürü: —Ngẽma Iraéanecüã̱xgü rü ñoma úba i muarü oṍxü̃rüxü̃ nixĩgü. Natürü yexguma Tupana yexera nüxü̃ rüngü̃xẽẽgu ga yema Iraéanecüã̱xgü, rü yexera norü tupananetagüca̱x ãmarearü guruxü̃ naxügü. Rü yexguma yexera namexgu ga nachixü̃ane rü yexera nanamexẽẽgü ga guma nutagü ga namaxã natupanaã̱xgücü.

Yoná 2:8

Rü ngẽma duü̃xü̃gü i naxchicüna̱xãgüxü̃ icua̱xüü̃güxü̃, rü tama cumaxã nixaixcümagü. Natürü i chomax rü tá moxẽ cuxna chaxã rü tá cuxca̱x chayagu i ãmaregü. Rü tá chayanguxẽxẽ ga yema cumaxã ichaxunetaxü̃. Rü cuxicatama nixĩ, Pa Corix, Pa Tupanax, i nüxü̃ cucuáxü̃ nax choxü̃ cumaxẽẽxü̃ —ñanagürü.

Amúx 5:5

¡Rü taxṹ i Betéarü tupananetachicüna̱xãca̱x peyadauxü̃! ¡Rü taxṹ i Guirigáwa pexĩxü̃! ¡Rü taxṹ i Bechébagu pichocuxü̃! Erü ngẽma Guirigácüã̱xgü rü to i naanewa tá nagagü, rü yima Beté rü tá nagu napogüe —ñanagürü.

Amúx 4:4

Rü nüma ya Cori ya Tupana rü ñanagürü: —¡Betéwa rü Guirigáwa pexĩ, rü ngéma yexera i chixexü̃ peyaxü̱x! ¡Rü ẽxü̃wa ngéma penana i perü carnérugü nax perü tupananetagüca̱x peyaguxü̃ca̱x! ¡Rü wüxichigü i tomaepü̱x i ngunexü̃gu ngéma penana i perü diésmu naxca̱x i perü tupananetagü!

Yeremía 10:15

Rü ngẽma naxchicüna̱xãgü rü taxuwama name, rü cugüruü̃mare nixĩgü. Rü ngẽxguma Cori ya Tupana ínanguxẽẽgü i poxcu, rü tá inayarüxo.

Yeremía 10:8

Rü guxü̃ma i ngẽma duü̃xü̃gü i ngẽma naxchicüna̱xãgüwe rüxĩxü̃ rü naechitamare namaxẽ, rü taxuxü̃ma i cua̱x nüxü̃́ nangẽxmagü. Rü ngẽma naxchicüna̱xãgü i naiwa naxügüxü̃ rü taxuxü̃ma nanangúexẽxẽ.

Yeremía 2:28

Pa Yudátanüxü̃x, ¿ngexü̃gü nixĩ i ngẽma tupananetachicüna̱xãgü ga pematama pexügüxü̃? Pema rü perü ĩanegüe̱xpü̱x nixĩ i ngẽma perü tupananetachicüna̱xãgü. ¡Ẽcü nua naxĩ i ngẽma naxchicüna̱xãgü nax nüxü̃ pedauxü̃ca̱x rü tá aixcüma pexü̃ yanangü̃xẽẽgü i ngẽxguma guxchaxü̃ pexca̱x ínguxgu!

Yeremía 2:20

Rü nũxcümacürüwatama nixĩ ga choxna pixĩgachixü̃ rü tama chauga pexĩnüechaxü̃xü̃. Rü ñaperügügü: “Tama cuga taxĩnüechaü̃”, ñaperügügü. Pema rü pechauechitae ñoma wüxi i ngexü̃ i natena ngeãẽxü̃rüxü̃, yerü guxü̃ma ga ma̱xpǘnegüwa rü guxü̃ma ga naigü ga imeetaxü̃tüü̃wa nüxü̃ picua̱xüü̃gü ga yema tupananetachicüna̱xãgü.

Nüxíraxü̃xü̃ ga popera ga ãẽ̱xgacügüchiga 17:1

Rü nüma ga Tupanaarü orearü uruxü̃ ga Ería, ga Garaáxanewa yexmane ga ĩane ga Tibécüã̱x, rü Acáxü̃ ñanagürü: —Yimá nüxü̃́ chapuracücü ya Cori ya Iraéanecüã̱xgüarü Tupanaégagu cumaxã nüxü̃ chixu, rü doma taunecügu rü tagutáma napu rü bai tá i cherena nax rünguxü̃ ñu̱xmatáta choma wena nüxü̃ chixu —ñanagürü.

Ochéa 10:2

Ngẽma Iraéanecüã̱xgü rü namuarü ĩnüã̱xgü, rü tama Tupanaguxica narüxĩnüe. Rü ngẽmaca̱x i ñu̱xma rü ngẽma norü chixexü̃gagu rü tá napoxcue. Rü nüma ya Cori ya Tupana rü tá inanaxoxẽxẽ i ngẽma ãmarearü guruü̃gü i norü tupananetagüca̱x naxügüxü̃. Rü tá nayapuexẽxẽ i ngẽma nutagü i nüxü̃ yacua̱xüü̃güxü̃.

Iraétanüxü̃arü muxchiga 12:6

Rü nüma ga Cori ya Tupana rü ñanagürü: —¡Choxü̃ iperüxĩnüe i ñaa pemaxã tá nüxü̃ chixuxü̃! Rü ngẽxguma petanüwa nangẽxmagu i wüxi i chorü orearü uruxü̃, rü choma nixĩ i chanango̱xetüxẽẽxü̃ rü nanegüwa namaxã chidexaxü̃.

Norü taxre ga popera ga ãẽ̱xgacügüchiga 17:13

Rü yema nixĩ ga norü orearü uruü̃güwa marü Iraétanüxü̃maxã nüxü̃ yaxuxü̃ ga Cori ya Tupana nax nüxü̃ naxoexü̃ca̱x ga yema chixexü̃ ga nacümagü, rü nüma ya Tupana nanaxwa̱xexü̃ãcüma nax yanguxẽẽgüãxü̃ca̱x ga yema mugü rü ngu̱xẽẽtaegü ga norü o̱xigüna naxãxü̃ ga norü orearü uruü̃güwa.