Ochéa 11:6 - Tupanaarü Ore

⁶ Rü norü uanügü rü tá taramaxã Iraéanearü ĩanegüca̱x ínayaxüãchi. Rü tá nagu napogüe ya yima ĩanegüarü poxeguxü̃. Rü ngẽmaãcü tá namaxã nangupetü yerü choxna nixĩgachi nax norü tupananetagüwe naxĩxü̃ca̱x.

Ochéa 11:6 Referans Kwoze

Ochéa 13:16

Rü choma rü tá chanapoxcue i ngẽma Chamáriacüã̱xgü erü tama chauga naxĩnüe. Rü norü uanügü rü tá taramaxã nanadai. Rü yíxema buxegü rü tá waixü̃mügu tüxü̃ nichi̱xgü. Rü yíxema ngexegü ya itacharaü̃güxe rü tá tüxü̃ nachuxnagü —ñanagürü.

Ochéa 10:14

Rü ñu̱xmax rü tá inaxügü i ngẽma dai rü ngẽmaca̱x nanaxĩ̱xãchiãẽgü i duü̃xü̃gü. Rü guxü̃ma ya yima ĩanearü poxeguxü̃tápü̱xgü rü tá niwa̱xgü. Rü yema ĩane ga Bex-abéwa ngupetüxü̃ ga yexguma ãẽ̱xgacü ga Charmáü̃ nadaixgurüxü̃ tá nixĩgü. Rü yexguma ga guxema mamagü rü tümanegümaxã tayue.

Ochéa 10:6

Rü ngẽma wocaxacüchicüna̱xã i Iraéanecüã̱xgü nüxü̃ icua̱xüü̃güxü̃ rü Achíriaanearü churaragü rü nachixü̃anewa tá nanangegü nax norü ãẽ̱xgacüna naxãgüãxü̃ca̱x. Rü tá naxãnee i ngẽma Efraíü̃tanüxü̃, yerü marü nataxuma ga norü naxchicüna̱xã ga nüxü̃́ yacua̱xüü̃güxü̃. Rü ngẽxgumarüxü̃ ta i guxü̃ma i ngẽma Iraéanecüã̱xgü rü ãne tá ningegü.

Maraquía 4:1

Rü nüma ya Cori ya Tupana ya Guxãétüwa Ngẽxmacü rü ñanagürü: —Rü ningaica i ngẽma ngunexü̃ i ãũcümaxü̃ i nagu tá chanapoxcuexü̃ i ngẽma chixexü̃ ügüxü̃ ñoma üxüemawa yaxaexü̃rüxü̃. Rü guxü̃ma i ngẽma duü̃xü̃gü i nügü írütagüxü̃ rü chixexü̃ ügüxü̃ rü ñoma maxẽ i pacü i üxüxétüwa yata̱xcuchichapa̱xacürüxü̃ tá nixĩgü. Rü ngẽma ngunexü̃gu rü guxü̃táma nixae rü taxuxü̃táma ínayaxügü.

Miquéa 5:11

Rü tá nagu chipogügü ya yima perü ĩanegü, rü guxü̃táma ya yima ĩanegüarü poxeguxü̃ rü tá chayawa̱xgüxẽxẽ.

Echequié 20:47

¡Rü namaxã nüxü̃ ixu i ñaa chorü ore i ñaxü̃! Pa Naixnecü i Súrwaama Ngẽxmaxü̃x, choma rü cuwa tá chayanaixẽxẽ ya wüxi ya üxü ya tá ínaguxü̃ne ya guxü̃nema ya curü naigü ya maxẽne rü yuene. Rü yima üxü rü tá niyaura rü taxũtáma nixo. Rü nórtewa rü ñu̱xmata súrwa tá nangu nax yaxãxü̃ i ngẽma naane.

Yeremía 5:17

Rü tá nanangõ̱xgü i ngẽma penetügü, rü pewemügü. Rü woo yíxema penegü rü pexacügü rü tá tüxü̃ nadai rü tá tüxü̃ nangõ̱xcu. Rü yíxema perü carnérugü rü perü wocagü rü tüxü̃ tá nangõ̱xcu. Rü perü úbagü rü perü igunecüarü o rü tá ta nanangõ̱xgü. Rü naxnegümaxã tá nagu nipogügü ya yima perü ĩanegü ya ípoxegugüne ya namaxã pegü íperüporaene —ñanagürü.

Ichaía 30:1

Nüma ya Cori ya Tupana rü ñanagürü: —Wüxi i ngechaü̃ nixĩ naxca̱x i ngẽma chaunegü i tama chauga ĩnüexü̃. Nümagü rü tama choxna nacagüãcüma nanaxü i ngẽma nagu naxĩnüexü̃ rü tama chauxü̃tagu naxca̱x nadaugü i chorü ucu̱xẽ. Rü ngẽmaãcü nanayexeraxẽxẽ i norü pecadugü.

Ichaía 27:10

Rü yima ĩane ya ípoxegune rü nagu napogüe ñoma wüxi ya ĩpata ya ngéma ta̱xmarenerüxü̃. Rü ñoma naane i taxúema ixãpataxü̃warüxü̃ nixĩ. Rü wüxi i nachica i wocagü nawa chibüexü̃ rü naixchacüügü nawa nangõ̱xgüxü̃ rü ñu̱xũchi nagu nacagüxü̃ nixĩ.

Ichaía 18:5

Rü ngẽxguma marü nangupetügu nax yaxãchacuxü̃ i úbagü i nanecüwa, rü ngẽma nachacu rü norü oxü̃ nanguxü̃ rü ñu̱xũchi norü dauwa nangu. Natürü naxü̃pa nax nabuxuxü̃ i ngẽma norü o, rü cüxchimaxã nanawiü̃tanügü rü ñu̱xũchi ínayawogü i ngẽma natanügü.

Ichaía 9:14

Rü ngẽmaca̱x ya Cori ya Tupana rü Iraétanüxü̃ca̱x tá taxü̃ i guxchaxü̃ ínanguxẽxẽ ñoma wüxi i naxü̃na ídaeréxü̃xü̃ rü ídaeeruxü̃rüxü̃. Rü ñoma wüxi ya tema rü wüxi i dexne rü wüxitama i ngunexü̃gu idaxüchigüxü̃rüxü̃ tá namaxã naxü.

Wiyaegü 106:43

Rü nüma ga Tupana rü muẽ̱xpü̱xcünama ínananguxü̃xẽxẽ. Natürü ga nümagü rü tama nüxü̃́ inarüxĩnüechaü̃ ga yema Tupana nagu rüxĩnüxü̃, rü norü chixexü̃ nüxü̃ narüyexera.

Wiyaegü 106:39

Rü yemaacü ga yema duü̃xü̃gü rü Tupanape̱xewa yexeraxü̃ ga chixexü̃ naxügü ga yexguma yema tupananetagüwe naxĩxgu.

Wenaxarü naxümatü ga Tupanaarü mugü 32:25

Rü norü ĩanegüarü namagügu rü norü uanügü rü taramaxã tá nanadai i naxacügü. Rü ĩpatagüwa rü tá taxüchixü̃ i muü̃ ínangu. Rü tá nayue i ngextü̱xüxü̃gü rü paxü̃gü rü o̱xigü rü õxchanagü ya maĩẽxe.

Wenaxarü naxümatü ga Tupanaarü mugü 28:52

Rü ngẽma curü uanügü rü tá naxca̱x ínayaxüãchi ya curü ĩanegü rü tá nüxü̃ ínachomaeguãchi rü ñu̱xmatáta yawa̱xẽẽgüã i ngẽma naxtapü̱xgü i máchanexü̃ i cuma nüxü̃́ cuyaxõxü̃. Rü ngẽmaãcü tá nüxü̃ ínachomaeguãchi ya guxü̃nema ya curü ĩanegü ya ngẽma naane i Cori ya curü Tupana cuxna ãxü̃wa ngẽxmagüne.

Lebítanüxü̃arü puracüchiga 26:33

Rü pema rü togü i nachixü̃anegu tá pexü̃ chawoone. Rü chorü taramaxã tá pewe chingẽchigü. Rü ngẽma pechixü̃ane rü tá chianexü̃xü̃ chayaxĩxẽxẽ. Rü perü ĩanegü rü nachitaxü̃xica tá ínayaxügü.

Lebítanüxü̃arü puracüchiga 26:31

Rü tá nagu chipogügü i perü ĩanegü rü nachitaxü̃güxica tá ngéma nayaxügü. Rü ngẽxgumarüxü̃ tá ta nagu chipogügü i ngẽma nachicagü i nawa perü tupananetaxü̃ picua̱xüü̃güxü̃. Rü taxũtáma namaxã chataãxẽ i naema i ngẽma pumarate̱xe i cha̱u̱xca̱x pigugüxü̃.

Yeremía 50:35

Rü nüma ya Cori ya Tupana rü ñanagürü: —Pa Babiróniaanearü Uanügüx, ¡nagu pepogüe ya yima ĩane ya Babirónia rü penadai i norü duü̃xü̃gü rü norü ãẽ̱xgacügü rü ngẽma norü duü̃xü̃gü i cua̱x nüxü̃́ ngẽmagüxü̃!

Auxexü̃chiga 2:9

Rü yemaacü ga guma ĩane rü nüxü̃́ nataxuma ga norü ĩã̱xgü rü nüxü̃́ nataxuma ga norü chotaruü̃gü yerü naxtapü̱xmaxã wüxigu niwa̱xgü ga ĩã̱xgü rü nipue ga norü chotaruü̃gü. Rü Yerucharéü̃arü ãẽ̱xgacü rü norü ngü̃xẽẽruü̃gü rü duü̃xü̃gü i tama yaxõgüxü̃me̱xẽwa nangẽxmagü. Rü ngẽma Cori ya Tupanaarü mugü rü marü nataxuma i natanüwa. Rü ngẽma Tupanaarü orearü uruü̃gü rü nüma ya Tupana rü marü tama nanango̱xetüxẽẽgü.

Ochéa 4:16

Rü ngẽma Iraéanecüã̱xgüx, rü marü tama chauga naxĩnüechaü̃ ñoma wüxi i wocaxacü i tama íyapuxchaü̃xü̃rüxü̃. ¿Ñuxãcü tá chanachibüexẽxẽ nawa i naane i maxẽ i mexü̃ nawa rüxügüxü̃ ñoma carnéruxacügüxü̃ chachibüexẽẽxü̃rüxü̃?

Ochéa 4:17

Ngẽma Iraéanecüã̱xgü rü tama nüxü̃ narüxoechaü̃ nax nüxü̃ yacua̱xüü̃güxü̃ i ngẽma tupananetachicüna̱xãgü. ¡Ngexrüma nax nüxicatama inarüchó! Rü nangãxẽ rü naxca̱x nadaugü i ngẽma ngexü̃gü i ngĩxü̃nemaxã taxegüxü̃ rü namaxã namaxẽ. Rü ngẽma mexü̃arü yexera naxca̱x nadaugü i ngẽma chixexü̃.

Amúx 6:8

Rü nüma ya Cori ya Tupana rü nügüégagu nanaxuegu. Rü Cori ya Tupana ya Guxãétüwa Ngẽxmacü rü nüxü̃ nixu rü ñanagürü: —Choma rü naxchi chaxai nax nügü yacua̱xüü̃güxü̃ i ngẽma Acóbuarü duü̃xü̃gü. Rü tama namaxã chataãxẽ ya yima norü ãẽ̱xgacüpatagü ya mexẽchine. Rü norü uanügüme̱xẽwa tá chanangexmagüxẽxẽ ya yima norü ĩane namaxã i guxü̃ma i ngẽma nawa ngẽxmaxü̃ —ñanagürü.

Lebítanüxü̃arü puracüchiga 26:25

Rü tá pexca̱x íchayaxüãchixẽxẽ i perü uanügü nax norü taramaxã pexü̃ nada̱i̱xü̃ca̱x, yerü tama naga pexĩnüe i ngẽma uneta ga pemaxã chaxüxü̃. Rü pema rü tá yima perü ĩanegü ya cu̱xchicaxü̃ruü̃ca̱x pibuxmü, natürü i choma rü tá ngéma pexca̱x chanamu i da̱xaweane. Rü ngẽmaãcü tá perü uanügüme̱xẽgu peyi.