Ochéa 11:12 - Tupanaarü Ore

¹² Rü ñanagürü ta: —Ngẽma Efraíü̃tanüxü̃x, rü guxü̃guma chope̱xewa nidorata̱xagü. Rü ngẽma Iraéanecüã̱xgü rü guxü̃guma choxü̃ nawomüxẽẽgü. Rü ngẽma Yudáanecüã̱xgü rü choxna nixĩgachi, rü ñu̱xma rü norü tupananetagüxü̃ nicua̱xüü̃gü —ñanagürü.

Ochéa 11:12 Referans Kwoze

Yema Cuáü̃ nüxü̃ dauxü̃ i yixcüra tá ngupetüxü̃chiga 3:21

Rü yíxema nüxü̃ rüporamaexe i chixexü̃, rü tá chaugüxü̃tawa tüxü̃ charütoxẽxẽ, yexgumarüxü̃ ga choma rü nüxü̃ nax charüporamaexü̃ ga chixexü̃, rü ñu̱xũchi Chaunatüxü̃tawa nax chayarütoxü̃rüxü̃’.

Ochéa 12:7

Rü Tupana rü Iraétanüxü̃xü̃ ñanarügü: —Pemax rü taxetanüxü̃ i womüxẽẽwa̱xegüxü̃ pixĩgü. Rü ngẽmaca̱x yimá perü yáruxü̃ ya tama mecümaxã nüxü̃́ pengĩ̱x i duü̃xü̃gü.

Ichaía 44:20

Rü taxuwama name i norü ĩnü i ngẽma duü̃xü̃gü i nügü womüxẽẽgüxü̃ namaxã i wüxi i ĩnü i doramare ixĩxü̃. Rü ngẽma duü̃xü̃gü rü taxucürüwa nügütama ínanguxü̃xẽxẽ nawa i ngẽma nagu naxĩnüexü̃. Rü tama nüxü̃ nacua̱xgüéga nax ngẽma naxchicüna̱xãgü i naxügüxü̃ rü nüxü̃ yacua̱xüü̃güxü̃ rü doramare nax yixĩxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 5:10

Rü Tupanaca̱x cunade i ngẽma duü̃xü̃gü nax nüma ya Tupana rü norü ãẽ̱xgacü yixĩxü̃ca̱x rü nümagü norü ngü̃xẽẽruü̃gü i chacherdótegü yixĩgüxü̃ca̱x. Rü nümagü tá nixĩ i ñoma i naanemaxã inacua̱xgüxü̃”, ñanagürügü.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:6

Rü ñu̱xma nax guxü̃arü ãẽ̱xgacü yixĩxü̃ i nümax, rü tüxü̃ naxüchica i ngextá nüma ãẽ̱xgacü íyixĩxü̃wa. Rü chacherdótegüxü̃ tüxü̃ nixĩgüxẽxẽ nax Nanatü ya Tupanaaxü̃́ ipuracüexü̃ca̱x rü nüxü̃ icua̱xüü̃güxü̃ca̱x. Rü name nixĩ i guxü̃gutáma Cristuxü̃ ticua̱xüü̃gü, erü nüma rü guxü̃gutáma guxü̃arü ãẽ̱xgacü nixĩ. Rü ngẽmaãcü yixĩ.

1 Corintios 6:2

¿Tama ẽ̱xna nüxü̃ pecua̱x nax yixema nax yaxõgüxü̃ tá yixĩxü̃ i naanearü gu̱xgu nüxna icagüxü̃ i guxü̃ma i ñoma i naanecüã̱x i duü̃xü̃gü? Rü ñu̱xma nax pema tá yixĩxü̃ i ñoma i naanecüã̱x i duü̃xü̃güxü̃ picagüxü̃, ¿rü tü̱xcüü̃ taxucürüwa i pematama penamexẽxẽ i ngẽma perü guxchaxü̃gü i íxrachiréxü̃?

Miquéa 6:12

Rü ngẽma diẽruã̱xgüxü̃ i daa ĩanegu ãpatagüxü̃ rü poraãcü duẽxẽgüxü̃́ nangĩ́e. Rü guxü̃ma i daa ĩanewa maxẽxü̃ rü dorata̱xaxgüxü̃ rü womüxẽẽwa̱xegüxü̃ nixĩgü.

Ichaía 29:13

Rü nüma ya Cori ya Tupana rü ñanagürü choxü̃: —Ñaa duü̃xü̃gü rü norü dexawaxicatama nügü nixugüe nax chorü duü̃xü̃gü yixĩgüxü̃, natürü tama chauga naxĩnüe. Rü naã̱xmaxãxicatama choxü̃ nicua̱xüü̃gü, natürü norü maxü̃newa rü tama chaugu narüxĩnüe. Rü ngẽma norü cua̱xüü̃gü rü duü̃xü̃güarü ĩnüwa nanayauxgü.

Wiyaegü 78:36

Natürü norü dexawaxicatama nixĩ i nüxü̃ yaxugüexü̃ nax nawe naxĩxü̃, natürü norü maxü̃wa rü tama aixcüma ngẽmagu narüxĩnüe.

Naanearü ügüchiga 32:28

Rü yexguma ga yema duü̃xü̃ ga nügü namaxã inawogüxü̃, rü ñanagürü nüxü̃: —Ñu̱xmawena rü marü taxũtáma Acóbu nixĩ i cuéga. Rü Iraé tá nixĩ i cuéga i ñu̱xmax, erü Tupanamaxã rü duü̃xü̃gümaxã cugü icuwogü rü curüporamae —ñanagürü.

Ochéa 12:1

Ngẽma Iraéanecüã̱xgü rü natüca̱xma guxü̃ i ngunexü̃gu ngẽma nachixü̃anegü i éstewa ngẽxmagüxü̃arü ngü̃xẽẽca̱x nadau. Rü yexera nidorata̱xagü rü nimáetagü. Rü Achíriaanecüã̱xgümaxã nanaxü i unetagü, rü Equítuanewa nanamugü i ãmare i chíxü̃ nax ngẽmaãcü Equítuanecüã̱xgü nüxü̃ rüngü̃xẽẽgüxü̃ca̱x.

Ochéa 7:16

Rü tama cha̱u̱xca̱x naxĩ rü ñoma würa ya wü̃xü̃nerüxü̃ nixĩgü. Rü naxchicüna̱xãgüca̱xama nawoegu nax nüxü̃ yacua̱xüü̃güxü̃ca̱x. Rü ngẽma norü ãẽ̱xgacügü rü nügü nicua̱xüü̃gü rü nügü ínarüporae, natürü daigu tá nayuemare. Rü ngẽxguma i ngẽma Equítuanecüã̱xgü rü tá nüxü̃ nacugüe —ñanagürü ya Tupana.

Ochéa 4:15

Pa Iraéanecüã̱xgüx, pema rü woo nüxü̃ picua̱xüü̃güamagu i ngẽma tupananetagü, natürü tama chanaxwa̱xe nax ngẽma Yudáanecüã̱xgü rü ta nagu naxĩxü̃ i ngẽma nacümagü i chixexü̃. ¡Rü taxṹ i nüxü̃ picua̱xüü̃güxü̃ i ngẽma naxchicüna̱xãgü i Guirigáwa rü Bex-abéü̃wa ngẽxmagüxü̃! ¡Rü taxṹ i chauégagu ipexunetaxü̃!

Ochéa 4:2

Rü tamuxũchi ya natüca̱xma Tupanaégagu ixunetaxe rü nataxüchi i dora, rü máeta, rü ngĩ̱x, rü namu i nai i ngexü̃maxã ipegüxü̃, rü nügü daixü̃, rü máetagüechaxü̃.

Naanearü ügüchiga 2:11

Rü yema wüxi ga nachacüxü rü Pichóü̃gu naxãéga, rü yema nachacüxü nixĩ ga yawaimüanexẽẽxü̃ ga Abiráane ga úiru nawa yexmaxü̃.

Ochéa 7:3

Rü nüma i duü̃xü̃gü rü norü diẽrumaxã rü womüxẽẽmaxã nanataãẽxẽxẽ i norü ãẽ̱xgacü rü norü ngü̃xẽẽruü̃gü.

Ochéa 10:13

Natürü i pema rü nagu pemaxẽ i chixexü̃, rü ngẽma ne naxũ nax chixri pegümaxã ipecuáxü̃ rü doragu nax pemaxẽxü̃. Rü pema rü pegü namaxã íperüpora i ngẽma muxü̃ i perü churaragü rü yimá peweü̃gü ya daiwa namaxã pexĩxü̃ne.