Ochéa 10:12 - Tupanaarü Ore

¹² Choma rü marüchire̱x pemaxã nüxü̃ chixu rü ñachagürü pexü̃: “Ngẽxguma aixcüma mexü̃ pexügügu rü tá pexna nangu i chorü ngechaü̃. ¡Penamexẽxẽ i perü maxü̃! Erü marü nawa nangu nax cha̱u̱xca̱x pedaugüxü̃ ñu̱xmatáta petanüwa changu nax peétügu chayabaxü̃ca̱x i chorü pora i namaxã pexü̃ íchapoxü̃xü̃”, ñachagürü.

Ochéa 10:12 Referans Kwoze

Popera ga Chantiágu ümatüxü̃ 3:18

Rü yíxema duü̃xü̃güxü̃ rüngü̃xẽẽgüxe nax tama nügüchi naxaiexü̃ca̱x, rü Tupana tá tüxü̃ narüngüxẽxẽ nax tataãẽxü̃ca̱x.

Ichaía 45:8

Rü ñanagürü ga Tupana: —Choma rü dauxü̃wa tá ne chanamu i chorü ngü̃xẽxẽ, ñoma daxũwa rünguxü̃ i cherenarüxü̃ rü ñoma caixanexü̃wa ne ũcü ya pucürüxü̃. Rü ñoma i naanewa tá nangu i chorü ngü̃xẽxẽ nax ngẽmaãcü Iraétanüxü̃xü̃ íchanguxü̃xẽẽxü̃ca̱x nawa i norü guxchaxü̃gü —ñanagürü.

Ucu̱xẽgüchiga 11:18

Ngẽma duü̃xü̃ i chixexü̃gu maxü̃xü̃, rü wüxi i paxaãchiruxü̃mare nixĩ i ngẽma diẽru i norü puracütanü i nayaxuxü̃, natürü yíxema mexü̃gu rüxĩnüxe, rü aixcüma natai i ngẽma tümaarü natanü i tayaxuxü̃.

Ichaía 55:6

¡Rü naga pexĩnüe ya Cori ya Tupana rü ñoma rü ta pexna naxu! ¡Rü nüxna peca rü ñoma rü ta pexna nangaicama!

Ochéa 6:3

¡Rü ngĩxã pora taxüe nax aixcüma Cori ya Tupanaxü̃ icuáxü̃ca̱x rü naga ixĩnüexü̃ca̱x! Rü nüma ya Cori ya Tupana rü aixcüma tá taxca̱x ínangu ñoma üa̱xcü guxü̃guma ínguxü̃rüxü̃ rü ñoma pucü guxü̃guma waixü̃mü iwaimüanexẽẽcürüxü̃”, ñanagürügü tá —ñanagürü ya Tupana.

Ichaía 44:3

Rü choma rü tá chayaya̱xẽxẽ i dexá i naxnücüanewa, rü íyapaanexü̃wa rü tá chanango̱xẽxẽ i natüacügü. Rü petaagüna tá chanamu ya Chauãxẽ ya Üünecü rü tá petaagüxü̃ charüngü̃xẽxẽ.

Ngu̱xẽẽtaeruü̃arü ore 11:6

¡Rü pa̱xmama namaxã natoe i cunetüchire rü ngẽxgumarüxü̃ ta yáuanecü namaxã natoe! Erü tama nüxü̃ cucua̱x i ngexü̃rüüxü̃ tá yexera mea narüxü, rü ngẽma nüxíra cutoxü̃ rüe̱xna ngẽma wixwena cutoxü̃. Rü ngürüãchi ngẽma taxre tá mea narüxügü.

Wiyaegü 105:4

¡Rü naxca̱x pexĩ ya Corix ya Tupana, rü norü poraca̱x pedaugü! ¡Rü guxü̃guma norü ngü̃xẽẽca̱x pedaugü!

Ore i mexü̃ ga Luca ümatüxü̃ 13:24

—Dauxü̃guxü̃ i naanearü ĩã̱x rü naxíraxüchi. ¡Rü paxa naxca̱x pedau nax nawa pichocuxü̃ca̱x! Erü pemaxã nüxü̃ chixu rü muxũchixü̃ma i duü̃xü̃gü tá nüxü̃́ nangúchaü̃ nax nawa yachocuxü̃, natürü taxũtáma nawa nangu nax nawa yachocuxü̃.

Amúx 5:15

¡Rü naxchi pexaie i ngẽma chixexü̃! ¡Rü nüxü̃ pengechaxü̃ i ngẽma mexü̃! ¡Rü aixcüma mea penamexẽxẽ i tümaarü guxchaxü̃ i ngẽxguma texé pepe̱xewa tayamexẽxẽchaü̃gu! Rü bexmana ngẽmaãcü tá nixĩ ya Cori ya Tupana ya Guxãétüwa Ngẽxmacü rü tümamaxã yaxãũxãchixü̃ ya yíxema Iraétanüxü̃ ya íyaxügüxe.

Amúx 5:6

¡Cori ya Tupanaca̱x pewoegu rü tá pemaxẽ! Rü ngẽxguma taxũtáma naxca̱x pewoeguxgu, rü nüma rü tá Iraéanewa nanamu ya üxü. Rü Betéarü ĩanewa rü nataxutama nax texé yaxoxẽẽxü̃.

Ichaía 31:1

Wüxi i taxü̃ i ngechaü̃ nixĩ naxca̱x i ngẽma Iraétanüxü̃ i Equítuanegu ngü̃xẽẽca̱x yadaugüxü̃. Nümagü rü nagu nayaxõgü ya yima muxũchine ya Equítuanearü carugü rü muxũchixü̃ i churaragü i cowaruétügu ĩxü̃. Natürü tama naga naxĩnüechaü̃ ya yimá norü Tupana ya üünecü, rü tama norü ucu̱xẽca̱x nadaugü.

Amúx 5:4

Rü nüma ya Cori ya Tupana rü Iraétanüxü̃xü̃ ñanagürü: —¡Cha̱u̱xca̱x pexĩ rü tá pemaxẽ!

Ochéa 12:6

¡Pa Iraétanüxü̃x, Tupanaca̱x pewoegu! ¡Rü aixcüma nüxü̃ pengechaü̃gü rü nüxü̃́xicatama peyaxõgü!

Amúx 5:8

Rü nüma ya Cori ya Tupana nixĩ ga naxüxü̃ i ngẽma ẽxtagütücumü i Préyadegu ãégaxü̃ rü ngẽma ẽxtagütücumü i Orióü̃gu ãégaxü̃. Rü ngẽxguma nachütagu rü nüma ínanangu̱xẽxẽ i ngóonexü̃. Rü ngẽxguma nangóonegu rü nüma rü ínanangu̱xẽxẽ i chütaxü̃. Rü nüma nixĩ i caixanexü̃xü̃ yanguxuchixẽẽãxü̃ i már arü dexá nax dauxü̃ naxĩxü̃ca̱x rü ñu̱xũchi ñoma i naanegu nax napuxẽẽãxü̃ca̱x. Rü naéga rü Cori ya Tupana nixĩ.

Ochéa 8:7

Rü ngẽma chixexü̃ i nagu naxĩxü̃ i ngẽma Iraéanecüã̱xgü rü natüca̱xmamare nixĩ rü ñoma buanecürüxü̃ nixĩ. Rü choma rü tá naxca̱x íchananguxẽxẽ i wüxi ya tacü ya buanecü ya íxã̱ũ̱xẽmacü. Rü ngẽma norü naanegüwa rü taxũtáma nixo i norü trigu rü taxũtáma nangẽxma i norü arína. Rü ngẽxguma ngürüãchi nüxü̃́ yaxo̱xgu, rü to i nachixü̃anecüã̱x tá namaxã naxãwemügü.

Ngechuchuarü ngúexü̃gü ga yamugüxü̃arü puracüchiga 2:18

Rü ngẽma ngunexü̃gügu rü chorü duü̃xü̃gütanüwa tá chanamu i Chauãxẽ ya Üünecü, rü nümagü tá nüxü̃ nixugügü i chorü ore.

Echequié 34:26

Rü chorü ma̱xpǘne ya üünecüwagu tá chanamugü i chorü carnérugü. Rü tá nüxü̃ charüngü̃xẽxẽxü̃ rü naxca̱x chanapuxẽxẽ nax mea nachibüexü̃ca̱x.

Ichaía 30:23

Rü nüma ya Cori ya Tupana rü tá pucü ínanguxẽxẽ naxca̱x i naxchire i cuanegu cutogüxü̃. Rü ngẽma cuanewa rü muxü̃tama i trigu i baxcaxü̃ tá nawa narüxügü. Rü ngẽma curü wocagü rü ngẽma ngunexü̃gu rü taanexü̃wa tá nachibüe

Yeremía 50:4

Rü Cori ya Tupana rü ñanagürü: —Ngẽxguma Babirónia norü uanügüme̱xẽgu nanguxgu, rü ngẽma Iraéanecüã̱xgü rü ngẽma Yudáanecüã̱xgü rü norü naaneca̱x tá auxãcü nawoegu, rü tá cha̱u̱xca̱x nadaugü i choma nax norü Cori ya Tupana chixĩxü̃.

Ichaía 5:6

Rü ñu̱xũchi tá íchanata̱x i ngẽma úbanecü. Rü taxúetama tayayoatü rü taxúetama tanangĩxcanecü rü ngẽmaãcü tá chuxchuxü̃gü rü chixexü̃ i natüane nanecüwa narüxügü. Rü tá nüxna chaxãga i caixanexü̃ nax tama nanecügu napuxü̃ca̱x —ñanagürü ya Tupana.

Ucu̱xẽgüchiga 18:21

Yimá tórü conü nüxü̃ ixuxü̃ i oregagu nixĩ nax imaxẽxü̃ rüe̱xna iyuexü̃. Rü yíxema idexaxüchixe rü tümaarü oregagu ngúxü̃ tinge.

Wiyaegü 72:6

Rü chanaxwa̱xe nax yimá ãẽ̱xgacü rü meama norü duü̃xü̃güxü̃ nangü̃xẽẽxü̃ ñoma pucü i nanetügü meama iwainecüxẽẽcürüxü̃.

2 Corintios 9:10

Tupana nixĩ ya tüxna naxãcü ya nanetüchire nax inatoxü̃ca̱x, rü tüxna naxãcü i õna nax nangṍxü̃ca̱x. Rü nüma tá nixĩ i pexna naxããxü̃ ya guxü̃nema ya nanetüchire ya penaxwa̱xene nax ipenatoxü̃ca̱x. Rü nüma tá nanaxüxẽxẽ rü nanayaxẽxẽ ya ngẽma nanetüchire. Rü tá nanamuxẽxẽ i norü o, nax muxũchixü̃ nawa peyaxuxü̃ca̱x nax ngẽmamaxã togüxü̃ perüngü̃xẽẽgüxü̃ca̱x.

Ichaía 48:18

¡Rü chierüx chauga pexĩnüegu! Rü yexguma chi naga pexĩnüegu ga chorü mugü rü ngẽma perü taãxẽ rü chi nixĩnagüchigü ñoma wüxi i natü irübaichigüxü̃rüxü̃, rü ngẽma perü taãxẽ rü ñoma már arü yuaperüxü̃ chi nata.

Ochéa 14:1

Pa Iraéanecüã̱xgüx, pema nax perü chixexü̃gagu guxchaxü̃gu peyixü̃x ¡rü naxca̱x pewoegu ya Cori ya perü Tupana!

Ichaía 54:14

Rü perü ãẽ̱xgacügü rü tá mea pemaxã inacua̱xgü rü ngẽmaãcü tá peporae. Rü taxũtáma togüme̱xẽwa pengẽxmagü rü taxũtáma ta̱xacüca̱x pemuü̃e.