Ochéa 1:7 - Tupanaarü Ore

⁷ Natürü ngẽma Yudáanecüã̱xgü rü tá choxü̃́ nangechaü̃tümüxü̃gü. Rü chomatama i norü Tupana nax chixĩxü̃ rü tá norü uanügüna íchanapoxü̃. Natürü taxũtáma ta̱xacürü churaragümaxã rüe̱xna naxnegümaxã rüe̱xna ngẽma churaragü i cowaruã́xü̃maxã tá norü uanügüna íchanapoxü̃ —ñanagürü ga Tupana.

Ochéa 1:7 Referans Kwoze

Chacaría 4:6

Rü nüma ga daxũcüã̱x rü nayadaxẽxẽ ga nax yadexaxü̃ rü ñanagürü: —Rü ñaa nixĩ i Cori ya Tupanaarü ore i Chorobabéca̱x ixĩxü̃ i ñaxü̃: “Tama churaragüarü poramaxã rü bai i ta̱xacürü to i poramaxã, natürü Chauãẽarü poramaxã tá naxü ya chopata ya taxü̃ne” —ñanagürü ya Cori ya Tupana ya Guxãétüwa Ngẽxmacü.

Ichaía 12:2

Rü Tupana nixĩ ya choxü̃ maxẽẽcü, rü ngẽmaca̱x nüxna charüyoe rü taxuca̱xma tü̱xcüü̃ chamuü̃. Rü nüma ya Cori ya Tupana nixĩ i chorü cu̱xchicaxü̃ rü chorü poraxẽẽruxü̃. Rü nüma nixĩ i chorü maxẽẽruxü̃ —ñacurügü tá.

Norü taxre ga popera ga ãẽ̱xgacügüchiga 19:35

Rü yematama chütaxü̃gu rü wüxi ga daxũcüã̱x ga Tupanaarü orearü ngeruxü̃ rü nanadai ga 185,000 ga churaragü ga Achíriaanecüã̱x. Rü yexguma yangunegu rü guxü̃ma nayue.

Ochéa 11:12

Rü ñanagürü ta: —Ngẽma Efraíü̃tanüxü̃x, rü guxü̃guma chope̱xewa nidorata̱xagü. Rü ngẽma Iraéanecüã̱xgü rü guxü̃guma choxü̃ nawomüxẽẽgü. Rü ngẽma Yudáanecüã̱xgü rü choxna nixĩgachi, rü ñu̱xma rü norü tupananetagüxü̃ nicua̱xüü̃gü —ñanagürü.

Ichaía 7:14

Rü nümatama ya Cori ya Tupana rü tá pexü̃ nüxü̃ nadauxẽxẽ i wüxi i cua̱xruxü̃. Rü ngẽma pacü i taguma yatüxü̃ cua̱xcü rü tá ngürü ixãxacü. Rü yimá ngĩne rü tá Emanuégu inaxüéga.

Ichaía 49:6

Rü nüma ya Tupana rü ñanagürü: —Choma rü cuxü̃ chamu nax cunanutaque̱xexü̃ca̱x i Acóbuarü duü̃xü̃gü rü nachixü̃aneca̱x cunawoeguxẽẽxü̃ca̱x i ngẽma Iraétanüxü̃. Rü naétü cuxü̃ chamu nax wüxi i omü quixĩxü̃ca̱x naxca̱x i guxü̃ma i nachixü̃anegü. Rü cuxü̃ chamu nax nüxü̃ nüxü̃ cucua̱xẽẽxü̃ca̱x i chorü ore i maxü̃ nüxna ãxü̃ i guxü̃ma i nachixü̃anecüã̱x woo ngẽma yáxü̃wa ngẽxmagüxü̃ —ñanagürü.

Wiyaegü 33:16

Rü taxucüma ya ãẽ̱xgacü ya woo muarü churaraã́cü rü tá nügü ínapoxü̃ ega tama Tupana nüxü̃ rüngü̃xẽẽgu. Rü bai ya wüxi ya yatü ya poraxüchicü rü tá norü poramaxã nügü ínapoxü̃ ega tama Tupana naxü̃tawa ngẽxmagu.

1 Chamué 17:47

Rü guxãma ya yíxema núma ngẽxmagüxe rü tá nüxü̃ tacua̱xgü ya Cori ya Tupana rü tama taramaxã, rüe̱xna wocaemaxã nixĩ i naxüaxü̃ i ngẽma nüma nagu naxĩnüxü̃. Erü nüma ya Tupana rü tama duü̃xü̃gürüxü̃ ãxneãcü texémaxã nügü nadai. Rü nüma tátama nixĩ i toxme̱xgu pexü̃ nayixẽẽxü̃ i ñu̱xmax —ñanagürü.

Norü taxre ga popera ga ãẽ̱xgacügüchiga 19:29

Rü yemawena ga Ichaía rü Echequíaxü̃ ñanagürü: —Cuxna tá chanaxã i wüxi i cua̱xruxü̃ nax ngẽmawa nüxü̃ cucuáxü̃ca̱x nax ta̱xacü tá ngupetüxü̃. Rü doma taunecügu rü yimá nai ya taunecügu rü pema rü tá penangõ̱x i ngẽma trigu i nüechamatama rüxügüxü̃. Natürü yimá norü tomaepü̱x ya taunecügu rü tá name nax pitoegüxü̃ rü peyabuxgüxü̃ i penetüarü o. Rü tá name nax úbamaxã pitoegüxü̃ rü penangṍxü̃ i norü o.

Ichaía 30:18

Natürü nüma ya Cori ya Tupana rü pexü̃ ínanangu̱xẽxẽ nax naxca̱x pewoeguxü̃ nax ngẽmaãcü nüxü̃́ pengechaü̃tümüxü̃güxü̃ca̱x. Rü nüma rü ínamemare nax pexü̃ nawéaxü̃ nax poraãcü pexü̃ nangechaü̃xü̃. Erü nüma ya Cori ya Tupana rü aixcüma mexü̃ namaxã naxuegu i ngẽma naga ĩnüexü̃. Rü tá taãẽgü ya guxãma ya yíxema nüxü̃́ yaxõgüxe.

Yeremía 25:5

Rü nümagü ga yema Tupanaarü orearü uruü̃gü rü pexü̃ ñanagürügü: “¡Nüxü̃ perüxoe i ngẽma chixexü̃ i pecümagü, rü ngẽma chixexü̃ i pexügüxü̃! Rü ngẽxguma tá nixĩ i nawa pemaxẽxü̃ i ñaa naane i Cori ya Tupana nũxcümaü̃güxü̃ ga perü o̱xigüna ãxü̃ rü pexna ãxü̃.

Yeremía 25:6

¡Rü taxṹ i nawe perüxĩxü̃ i ngẽma tupananetachicüna̱xãgü! ¡Rü taxṹ i naxca̱x pengutaque̱xegüxü̃ rü nüxü̃ picua̱xüü̃güxü̃! ¡Rü taxṹ i Cori ya Tupanaxü̃ penuxẽxẽxü̃ nagagu nax nüxü̃ picua̱xüü̃güxü̃ i ngẽma tupananetachicüna̱xãgü i pematama pexüxü̃! Rü ngẽxguma i nüma ya Cori ya Tupana rü taxuxü̃táma i guxchaxü̃ pexca̱x ínanguxẽxẽ”, ñanagürügü pexü̃.

Yeremía 33:26

Rü ngẽxgumarüxü̃ ta Acóbumaxã rü chorü duü̃ ya Dabímaxã ichaxuneta nax nataagü tá nixĩ i namaxã icua̱xgüxü̃ i Abraáü̃taagü rü Ichaátaagü rü Acóbutaagü. Rü taxũtáma nüxü̃ charüngüma i ngẽma chorü uneta, erü choxü̃́ nangechaü̃tümüxü̃gü i chorü duü̃xü̃gü rü tá nüxü̃ charüngü̃xẽxẽ nax wena nachixü̃aneca̱x nawoeguxü̃ca̱x” —ñachagürü.

Ochéa 1:8

Rü yexguma Góme marü Lo-ruáma ngĩxü̃ yamaieguwena, rü wena ixãxacü, rü nayatü.

Ínachoxü̃xü̃chiga 14:13

Rü yexguma ga Moiché rü nanangãxü̃ rü ñanagürü nüxü̃: —¡Taxuca̱xma pemuü̃e! ¡Rü mea iperüchomare rü naxca̱x perüdaunü nax ñuxãcü pexü̃ tá nax ínapoxü̃xü̃ ya Cori ya Tupana! Erü ngẽma Equítuanecüã̱xgü i ñu̱xma nüxü̃ pedauxü̃, rü tagutáma wena nüxü̃ pedaugü.

Ínachoxü̃xü̃chiga 14:30

Rü yemaacü nixĩ ga yema ngunexü̃gu ga Cori ya Tupana ga ínapoxü̃xü̃ ga yema Iraétanüxü̃ naxme̱xwa ga yema Equítuanecüã̱xgü. Rü yema Iraétanüxü̃ rü nüxü̃ nadaugü ga naxü̃negü ga yema Equítucüã̱xgü ga márpechinügu íyachaxãchitanüxü̃.

Norü taxre ga popera ga ãẽ̱xgacügüchiga 6:18

Rü yexguma yema churaragü ga Chíriaanecüã̱x Erichéuca̱x ibuxmüchaü̃gu, rü nüma ga Erichéu rü Cori ya Tupanana naca rü ñanagürü: —Pa Tupanax, ẽcü ¡yangexetüxẽxẽ i ngẽma duü̃xü̃gü! —ñanagürü. Rü nüma ga Cori ya Tupana rü nayangexetüxẽxẽ yema Erichéu naxca̱x íca̱xaxü̃rüxü̃.

Norü taxre ga popera ga ãẽ̱xgacügüchiga 19:34

Rü chomatama tá nüxna chadau ya daa ĩane rü tá íchanapoxü̃ erü taguma nüxü̃ charüngüma ya chorü duü̃ ya Dabí rü chayanguxẽxẽ i ngẽma nüxü̃ chixuxü̃”, ñanagürü ga Tupana —ñanagürü ga Ichaía.

Wiyaegü 44:7

Natürü cuma nixĩ i torü uanüxü̃ toxü̃ curüporamaexẽẽxü̃ rü cuma nixĩ i cunaxãneexẽẽxü̃ i ngẽma toxchi aiexü̃.