Neemía 9:29 - Tupanaarü Ore

²⁹ Rü cuyaxucu̱xẽgü nax wena yanguxẽẽgüãxü̃ca̱x ga curü mugü. Natürü ga nümagü rü tama inaxĩnüechaxü̃, rü tama nanayauxgüchaxü̃ ga yema curü mugü. Rü yemaacü nüxü̃ naxoe ga curü mugü i maxü̃ tüxna ãxü̃ ya yíxema naga ĩnüxe. Rü naechitamare namaxẽ rü ínayataiãchiarü maxü̃ã̱xgü rü yemaca̱x tama naga naxĩnüe i curü mugü.

Neemía 9:29 Referans Kwoze

Neemía 9:16

Natürü ga nümagü ga tórü o̱xigü rü nügü nicua̱xüü̃gümare rü taxúega naxĩnüechaü̃ rü tama naga naxĩnüechaü̃ ga yema curü mugü.

Lebítanüxü̃arü puracüchiga 18:5

Rü chanaxwa̱xe i aixcüma nagu pexĩ i ngẽma chorü mugü rü chorü ucu̱xẽgü. Rü yíxema nagu maxü̃́xẽ rü tá tamaxü̃. Erü choma nixĩ i perü Cori ya Tupana chixĩxü̃.

Neemía 9:26

Natürü naétüwa ga guxü̃ma ga yema naxca̱x cuxüxü̃ rü tama cuga naxĩnüechaü̃, rü cumaxã nanueama, rü tama naga naxĩnüe ga curü mugü. Rü nanadai ga yema curü orearü ngeruü̃gü ga naxucu̱xẽgüxü̃ nax cuxca̱x nawoeguxü̃ca̱x. Rü yemaacü poraãcü chixexü̃ cupe̱xewa naxügü.

Neemía 9:10

Rü cuma rü Faraóü̃pe̱xewa rü guxü̃ma ga norü ngü̃xẽẽruü̃güpe̱xewa, rü guxü̃ma ga yema nachixü̃anecüã̱xgü ga duü̃xü̃güpe̱xewa, rü cuyaxüchigüama ga taxü̃ ga mexü̃gü ga curü üünemaxã cuxüxü̃. Yerü nüxü̃ cudau ga ñuxãcü totanüxü̃maxã chixri inacua̱xgüxü̃, rü ngẽmaca̱x cutachiga i ñu̱xmax.

Ochéa 6:5

Rü yema chorü orearü uruü̃gü ga petanüwa chamugüxü̃wa pemaxã nüxü̃ chixu nax pexü̃ tá chapoxcuxü̃, natürü ga pema rü tama iperüxĩnüe rü yemaca̱x pexü̃ chadai. Rü yemaacü chorü poxcu rü aixcüma pewa nangu ñoma ngóonexü̃ irügoxü̃rüxü̃.

Gálatas 3:12

Natürü ngẽma mugü rü tama ngẽma õwa ne naxũ. Erü Tupanaarü orewa rü ñanagürü: “Rü yíxema aixcüma naga ĩnüxe i guxü̃ma i ngẽma mugü, rü ngẽmagagu tá tüxü̃́ nangẽxma i tümaarü maxü̃”, ñanagürü.

Romanos 10:5

Rü Moiché nanaxümatü nachiga nax ñuxãcü Tupanape̱xewa tamexü̃ ya wüxíe ega naga taxĩnügu i ngẽma mugü, rü ñanagürü: “Yíxema naga ĩnüxe i ngẽma mugü rü tá tamaxü̃”, ñanagürü.

Ore i mexü̃ ga Luca ümatüxü̃ 10:28

Rü yexguma ga Ngechuchu rü ñanagürü nüxü̃: —Ngẽma ore i choxü̃ namaxã cungãxü̃xü̃ rü marü name. Rü ngẽxguma ngẽma ore quinguxẽẽ̱xgu, rü tá cunayaxu i maxü̃ i taguma gúxü̃ —ñanagürü.

Danié 5:20

Natürü yexguma nügü yacua̱xüxü̃gu rü taxúegama naxĩnügu, rü Tupana rü nüxna nanayaxu ga norü pora, rü ínanata̱xüchi ga ãẽ̱xgacü nax yixĩxü̃.

Echequié 20:11

Rü yéma nüxna chanaxã ga chorü mugü i maxü̃ tüxna ãxü̃ ya yíxema naga ĩnüexe.

Yeremía 44:10

Rü pema rü ñu̱xma rü ta tama nüxü̃ perüxoe i pecümagü i chixexü̃gü, rü tama choxü̃ pemuü̃e, rü tama naga pexĩnüe i chorü ucu̱xẽgü rü mugü ga pemaxã rü perü o̱xigümaxã nüxü̃ chixuxü̃.

Yeremía 19:15

—Nüma ya Cori ya Guxãétüwa Ngẽxmacü ya Iraétanüxü̃arü Tupana ixĩcü rü ñanagürü: “Daa ĩaneca̱x rü guxü̃nema ya norü ngaicamagüne ya ĩanegüca̱x tá íchananguxẽxẽ i guxü̃ma i ngẽma poxcu i pemaxã nüxü̃ chixuxü̃, erü tama naga pexĩnüechaü̃ i chorü ore” —ñanagürü.

Yeremía 17:23

Natürü ga nümagü rü tama chauga naxĩnüe rü tama nayanguxẽxẽ ga yema namaxã nüxü̃ chixuxü̃. Erü duü̃xü̃gü i tama ixĩnüechaü̃xü̃ nixĩgü rü tama naga ĩnüechaü̃ ga yema chorü ucu̱xẽgü.

Yeremía 7:26

Natürü ga pemax rü tama chauga pexĩnüexü̃ rü tama choxü̃́ ipexĩnüechaü̃, rü yema nũxcümaü̃güxü̃ ga petanüxü̃arü yexera chomaxã penue rü chixri pemaxẽ —ñanagürü.

Norü taxre ga to ga popera ga ãẽ̱xgacügüchiga ümatüxü̃ 36:15

Rü nüma ga Cori ya Iraétanüxü̃arü o̱xigüarü Tupana rü guxü̃guma yéma nanamugü ga norü orearü uruü̃gü nax yaxucu̱xẽgüãxü̃ca̱x, yerü nüma ga Tupana rü nüxü̃́ nangechaü̃tümüxü̃gü ga norü duü̃xü̃gü rü nüxü̃ nangechaü̃ ga guma napata ga nawa nayexmane.

Norü taxre ga to ga popera ga ãẽ̱xgacügüchiga ümatüxü̃ 24:19

Natürü woo yema chixexü̃gu nax namaxẽxü̃ ga duü̃xü̃gü, rü nüma ga Cori ya Tupana rü natanüwa nanamugüama ga norü orearü uruü̃gü nax naxca̱x nawoeguxü̃ca̱x. Natürü nüma ga duü̃xü̃gü rü tama yema Tupanaarü orearü uruü̃güga naxĩnüe.

Norü taxre ga popera ga ãẽ̱xgacügüchiga 17:13

Rü yema nixĩ ga norü orearü uruü̃güwa marü Iraétanüxü̃maxã nüxü̃ yaxuxü̃ ga Cori ya Tupana nax nüxü̃ naxoexü̃ca̱x ga yema chixexü̃ ga nacümagü, rü nüma ya Tupana nanaxwa̱xexü̃ãcüma nax yanguxẽẽgüãxü̃ca̱x ga yema mugü rü ngu̱xẽẽtaegü ga norü o̱xigüna naxãxü̃ ga norü orearü uruü̃güwa.

Wenaxarü naxümatü ga Tupanaarü mugü 31:21

Natürü ngẽxguma naxca̱x tá ínanguxgu i naguxü̃raü̃xü̃ i ngúxü̃gü rü guxchaxü̃gü, rü ñaa wiyaewa tá nüxna nacua̱xãchie nax chixexü̃ naxügüxü̃. Erü ngẽma nataagü rü tá nüxna nacua̱xãchi i ñaa wiyae rü tá nagu nawiyaegü. Rü choma rü naxü̃pa nax nagu chanachocuxẽẽxü̃ i ngẽma Iraétanüxü̃ nawa i ngẽma naane ga namaxã chaxueguxü̃ rü marü nüxü̃ chacua̱x nax ta̱xacürü chixexü̃gu tá yixĩxü̃ ga naxĩnüexü̃ —ñanagürü ga Tupana.

Wenaxarü naxümatü ga Tupanaarü mugü 4:26

Rü ngẽxguma ngẽma chixexü̃ pexü̱xgu, rü choma rü daxũguxü̃ i naanepe̱xewa rü ñoma i naanepe̱xewa pemaxã nüxü̃ chixu rü paxa tá ipeyarüxo nawa i ngẽma naane i nagu tá pechocuxü̃ i Yudáü̃arü tocutüwa ngẽxmaxü̃. Rü taxũtáma mucü ya taunecü nawa pemaxẽ i ngẽma naane rü noxtacüma tá ipeyarüxo.

Ínachoxü̃xü̃chiga 10:3

Rü Moiché rü Aróü̃ rü Faraóü̃xü̃tawa naxĩ, rü ñanagürügü nüxü̃: —Cori ya Iraétanüxü̃arü Tupana rü cuxca̱x nua namuga rü ñanagürü cuxü̃: “¿Ñuxguratáta i nüxü̃ curüxoxü̃ nax choxna cugü quinuxuxü̃? ¡Rü yange̱xgü i chorü duü̃xü̃gü nax choxü̃ yanacua̱xüü̃güxü̃ca̱x!

Ore i mexü̃ ga Matéu ümatüxü̃ 19:17

Rü Ngechuchu nanangãxü̃ rü ñanagürü nüxü̃: —¿Tü̱xcüü̃ “Mecü”, ñacurügü choxü̃? Erü Tupanaxicatama nixĩ ya mecü ixĩcü, rü nataxuma i to. Natürü ngẽxguma cunayauxchaü̃gu i maxü̃ i taguma gúxü̃, rü ¡naga naxĩnü i Tupanaarü mugü! —ñanagürü.

Norü taxre ga to ga popera ga ãẽ̱xgacügüchiga ümatüxü̃ 33:10

Rü Cori ya Tupana rü Manachémaxã rü norü duü̃xü̃gümaxã nidexa, natürü tama naga naxĩnüe.

Neemía 9:30

Rü mucüma ga taunecü rü yáxna namaxã cuxĩnü ga yema torü o̱xigü. Rü Cuãxẽ ya Üünecüwa rü curü orearü uruü̃güwa cuyaxucu̱xẽgüchire̱x, natürü ga nümagü rü tama cuga naxĩnüechaü̃. Rü yemaca̱x nixĩ ga ñoma ga naanewa yexmagüxü̃ ga nachixü̃anegüme̱xẽwa cunayexmagüxẽẽxü̃.

Neemía 13:15

Rü yema ngunexü̃gügu rü Yudáanewa nüxü̃ chadau ga duü̃xü̃gü ga ngü̃xchigaarü ngunexü̃gu úba pu̱xgüxü̃ nax bínu naxügüxü̃, rü tríguarü o nugügüxü̃ rü búrumaxã bínu rü úbaya̱xa, rü igugü, rü guxü̃raü̃xü̃ i naxweta nugügüxü̃. Rü yexgumarüxü̃ ta nüxü̃ chadau nax ngü̃xchigaarü ngunexü̃gu Yerucharéü̃wa nanaaxü̃ ga naxweta. Rü yemaca̱x chayangagü, yerü ngü̃xchigaarü ngunexü̃gu norü yemaxü̃gümaxã nataxegü.

Yeremía 42:19

Rü nüma ga Yeremía rü ñanagürü: —Ngẽma nixĩ i Cori ya Tupanaarü ore pexca̱x i pema ya Yudáanewa yaxügüxe. Rü nüma rü ñanagürü pexü̃: “¡Taxṹ i Equítuanewa pexĩxü̃! ¡Rü mea nagu perüxĩnüe i ngẽma pemaxã nüxü̃ chixuxü̃ i ñu̱xmax!” ñanagürü.

Wenaxarü naxümatü ga Tupanaarü mugü 31:27

Erü choma rü marü nüxü̃ chacua̱x nax pema rü wüxi i duü̃xü̃gü i taierugüxe rü tama ĩnüwa̱xegüxe nax pixĩgüxü̃. Rü ñu̱xma nax petanüwa chamaxü̃xü̃ rü nüxü̃ chadauxü̃ nax tama Cori ya Tupanaga pexĩnüexü̃, ¿rü ngẽxguma chayuxguwena rü ta̱xacürü chixexü̃ tá yixĩxü̃ i pexügüxü̃?

Ãẽ̱xgacügü ga guxchaxü̃güarü mexẽxẽruü̃gü 6:10

Rü pemaxã nüxü̃ chixu nax choma yixixü̃ ya perü Cori ya Tupana chixĩxü̃, rü ngẽmaca̱x taxuca̱xma norü tupanagüxü̃ pemuü̃e i ngẽma Amoréutanüxü̃ i ñu̱xma norü naanewa pemaxẽxü̃. Natürü ga pema rü tama chauga pexĩnüe” —ñanagürü.

Norü taxre ga popera ga ãẽ̱xgacügüchiga 17:14

Natürü woo Tupana rü norü orearü uruü̃güwa nayaxucu̱xẽgü, natürü ga nüma ga Iraéanecüã̱xgü rü tama inaxĩnüechaü̃ naxrüxü̃ ga norü o̱xigü ga tama aixcüma Cori ya Tupanaaxü̃́ yaxõgüxü̃.