Neemía 9:15 - Tupanaarü Ore

¹⁵ Rü ñu̱xũchi dauxü̃guxü̃ ga naanewa naxca̱x cunayixẽxẽ ga paũ ga maná nax yema nangõ̱xgüxü̃ca̱x. Rü nutawa naxca̱x cunagoxü̃chíüxẽxẽ ga dexá nax yemawa naxaxegüxü̃ca̱x. Rü ñu̱xũchi namaxã nüxü̃ quixu nax nagu nachocuxü̃ca̱x ga yema naane ga namaxã cuxueguxü̃.

Neemía 9:15 Referans Kwoze

Wenaxarü naxümatü ga Tupanaarü mugü 1:8

Choma rü marü pexna chanaxã i ngẽma naane. ¡Rü ngéma pexĩ rü penayaxu i ngẽma naane i choma ya Cori ya Tupana yema nũxcümaü̃güxü̃ ga perü o̱xigü ga Abraáü̃, rü Ichaá, rü Acóbu, rü ñu̱xũchi nataagümaxã chaxueguxü̃ nax nüxna chanaxãxü̃!” ñanagürü ga Tupana.

Ínachoxü̃xü̃chiga 17:6

Rü choma rü tá yima ma̱xpǘne ya Oréxwa tá cuxü̃ chananguxẽxẽ yima ma̱xpǘnetapü̱xwa. Rü yima ma̱xpǘnetapü̱xwa tá cunacua̱i̱xca rü ngéma tá nanagoxü̃chiü i dexá nax duü̃xü̃gü nawa axegüxü̃ca̱x —ñanagürü. Rü nüma ga Moiché rü yema Tupana nüxü̃ ixuxü̃ãcü nanaxü nape̱xewa ga yema Iraétanüxü̃arü ãẽ̱xgacügü.

Ínachoxü̃xü̃chiga 16:4

Rü yexguma ga Cori ya Tupana rü Moichéxü̃ ñanagürü: —Ñu̱xma rü tá chanaxü nax õna naxca̱x charüyi̱xẽẽxü̃ i daxũguxü̃ i naanewa. Rü nüma i duü̃xü̃gü rü wüxichigü i ngunexü̃gu rü tá nawa naxĩĩxü̃ nax nayauxgüãxü̃ca̱x i ngẽma wüxi i ngunexü̃ca̱x inguxü̃. Rü ngẽmawa tá nüxü̃ chaxü i ngẽma duü̃xü̃gü rü chauga naxĩnüe rüe̱xna tama.

Echequié 20:15

Rü yéma ínachianexü̃wa rü namaxã chanaxuegu nax taxũtáma nagu chanachocuxẽẽxü̃ ga yema naane ga nüxna chaxãxü̃. Rü yema nachixü̃anearü naane rü guxü̃ma ga yema togü ga nachianexü̃ narümemae. Rü yéma rü guma lechi rü berure rü ñoma dexárüxü̃ taguma nataxu.

Wiyaegü 114:8

Yerü ga nüma rü nutatanüwa nanango̱xẽxẽ ga puchugü rü nuta ya tacüwa inayagoxü̃chíüxẽxẽ ga dexá.

Wenaxarü naxümatü ga Tupanaarü mugü 8:3

Rü woo ngúxü̃ pexü̃ ningexẽxẽ rü taiya pexü̃́ nangu̱x, natürü yixcüama nüma ga Tupana rü daxũcüã̱x ga paũ ga manámaxã pexü̃ nachibüexẽxẽ woo ga pema rü woo ga nũxcümaü̃xü̃ ga perü o̱xigü rü taguma nüxü̃ nadaugüxü̃ ga yema. Rü yema naxü nax pexü̃ nüxü̃ nacua̱xẽxẽ rü tama õnaxica nixĩ i namaxẽẽxü̃ i wüxi i duü̃xü̃, natürü guxü̃ma i norü ore i Tupanaã̱xwa ixũxũxü̃ nixĩ i aixcüma namaxẽẽxü̃.

Neemía 9:20

Rü ñu̱xũchi naxca̱x yéma cunamu ga Cuãxẽ ya Üünecü nax yaxucu̱xẽgüãxü̃ca̱x. Rü taguma nüxü̃́ nataxu ga yema paũ ga maná ga naxca̱x yéma cumugüxü̃, rü ñu̱xũchi taguma nüxü̃́ nataxu ga yema dexá ga nüxna cuxãxü̃ nax yemaacü tama yata̱xawaexü̃ca̱x.

Wenaxarü naxümatü ga Tupanaarü mugü 1:21

Rü nüma ya Cori ya tórü Tupana ixĩcü, rü marü pexna nanaxã i ñaa naane. ¡Rü ẽcü nawa pexĩ rü nagu pexãchiü̃gü ngẽma Cori ya perü o̱xigüarü Tupana nüxü̃ ixuxü̃rüxü̃! ¡Rü taxṹ i pemuü̃exü̃, rü bai tá iperümaãchitanüxü̃!” ñacharügü.

Iraétanüxü̃arü muxchiga 14:30

Rü bai tá i wüxi i ngẽma duü̃xü̃gü nagu nachocu i ngẽma naane i pemaxã nüxü̃ chixuxü̃. Rü Caréx rü Yochuéxicatama tá nixĩ i ngéma ngugüxü̃.

Naanearü ügüchiga 14:22

Natürü ga Abráü̃ rü nanangãxü̃ rü ñanagürü: —Choma rü marü Cori ya Tupana ya Guxü̃étüwa Ngẽxmacü i daxũguxü̃ i naanearü üruxü̃ rü ñoma i naanearü üruü̃maxã nüxü̃ chixu rü taxuxü̃táma i ta̱xacü choxrüxü̃ chayaxu i ngẽma cuxrü ixĩxü̃, rü bai ya wüxi ya tünüta, rü bai i wüxi i chapatutü̱xü, nax tagutáma choxü̃ quixuxü̃ca̱x nax cugagu yixĩxü̃ nax chamuarü ngẽmaxü̃ã́xü̃.

Ínachoxü̃xü̃chiga 6:8

Rü yema naane ga Abraáü̃maxã rü Ichaámaxã rü Acóbumaxã chaxueguxü̃wa tá pexü̃ chagagü rü tá pexna chanaxã nax pexrüxüchi yixĩxü̃ca̱x i ngẽma naane. Rü choma nixĩ i Cori ya Tupana chixĩxü̃ —ñanagürü.

Ínachoxü̃xü̃chiga 17:3

Natürü nüma ga duü̃xü̃gü rü nita̱xawae rü yemaca̱x Moichémaxã narüxutagagüama rü ñanagürügü: —¿Tü̱xcüü̃ ga toxü̃ ícugaxü̃xü̃ ga Equítuanewa? ¿Ẽ̱xna ta̱xawamaxã toxü̃ cudaixchaü̃ wüxigu tümamaxã ya toxocügü rü toxü̃nagü? —ñanagürügü.

Ichaía 48:21

Rü woo yema taxü̃ ga naxnecüanewa pexü̃ nachopetüxẽxẽ, natürü tama pita̱xawae yerü nüma ga Tupana rü nanangǘxte̱xẽxẽ ga nuta rü yéma nayagoxü̃chíüxẽxẽ ga dexá.

Yeremía 32:23

Natürü yexguma torü o̱xigü ñaa naanewa ngugügu rü nayauxgüãgu, rü tama cuga naxĩnüe rü tama nagu naxĩ ga yema ucu̱xẽgü ga namaxã nüxü̃ quixuxü̃. Rü taxuxü̃ma naxügü ga yema namaxã nüxü̃ quixuxü̃. Rü ngẽmagagu toxca̱x ícunangu̱xẽxẽ i guxü̃ma i ngẽma guxchaxü̃gü i ñu̱xma nawa tangexmagüxü̃.