Neemía 8:18 - Tupanaarü Ore

¹⁸ Rü 7 ga ngunexü̃ nanaxüchigagü ga yema düxenügüarü peta. Rü wüxichigü ga yema 7 ga ngunexü̃gu rü nüma ga Édra rü duü̃xü̃gümaxã nüxü̃ nadaumatü ga yema Tupanaarü mugü. Rü yexguma norü 8 ga ngunexü̃wa nanguxgu rü duü̃xü̃gümaxã nanaxü ga wüxi ga taxü̃ ga ngutaque̱xe nax Tupanaxü̃ yacua̱xüü̃güxü̃ca̱x, yema Tupanaarü mugüpane nüxü̃ ixuxü̃rüxü̃.

Neemía 8:18 Referans Kwoze

Iraétanüxü̃arü muxchiga 29:35

Rü ngẽma norü 8 i ngunexü̃gu rü cha̱u̱xca̱x tá pengutaque̱xegü. ¡Rü ngẽma i ngunexü̃gu rü taxuxü̃táma i puracü pexüe!

Lebítanüxü̃arü puracüchiga 23:36

Rü guxü̃ma i ngẽma 7 i ngunexü̃gügu rü tá Cori ya Tupanaca̱x ãmare ípegu. Rü norü 8 i ngunexü̃gu rü tá cha̱u̱xca̱x pengutaque̱xegü, rü wüxi i ãmare tá cha̱u̱xca̱x pigu. Rü ngẽma rü wüxi i ngunexü̃ i petachiga nixĩ, rü ngẽmaca̱x taxuxü̃táma i ta̱xacürü puracü pexü.

Ore i mexü̃ ga Cuáü̃ ümatüxü̃ 7:37

Rü yema nawa iyacuáxü̃ ga petaarü ngunexü̃ nixĩ ga guxü̃ ga togü ga ngunexü̃arü yexera rümemaexü̃. Rü yema ngunexü̃gu nixĩ ga inachixü̃ ga Ngechuchu rü tagaãcü ñaxü̃: —Ngẽxguma texé ita̱xawaxgu rü ¡nua chauxü̃tawa taxũ rü tayaxaxe!

Lebítanüxü̃arü puracüchiga 23:41

Rü wüxichigü ya taunecügu i ngẽxguma yimá norü 7 ya tauemacüwa nanguxgu rü 7 i ngunexü̃ tá nixĩ i Cori ya Tupanaxü̃ picua̱xüü̃güxü̃. Rü ñaa mu i pemaxã nüxü̃ chixuxü̃ rü guxü̃gutáma nagu pexĩ i pema rü penegü rü petaagü.

Neemía 8:2

Rü nüma ga chacherdóte ga Édra rü yéma nanange ga yema Tupanaarü mugüpane nape̱xewa ga yema duü̃xü̃gü ga yexma ngutaque̱xegüxü̃ ga yatüxü̃ rü ngexü̃ rü ngextü̱xücügü rü pacügü.

Neemía 8:3

Rü ẽxü̃wa inanaxügü rü ñu̱xmata tocuchiwa nangu nax duü̃xü̃güca̱x nüxü̃ nadaumatüxü̃ ga Tupanaarü mugü nawa ga yema ĩanearü ngutaque̱xechica ga ĩã̱x ga Dexágu ãégaxü̃arü to̱xma̱xtawa yexmaxü̃. Rü guxü̃ma ga duü̃xü̃gü rü meama inarüxĩnüe ga yema Tupanaarü mugü.