Neemía 8:17 - Tupanaarü Ore

¹⁷ Rü guxü̃ma ga yema Iraétanüxü̃ ga Babiróniaanewa ne gagüxü̃ rü norü naaneca̱x woeguxü̃ rü nanaxügü ga norü düxenü rü nagu napegü. Yerü yexguma Yochué ga Núü̃ nane namaxã naxüchigagucürüwa rü taguma nanaxüchigagü ga yema peta rü ñu̱xmata yema ngunexü̃ ga nagu Yerucharéü̃gu nangutaque̱xegüxü̃gu nixĩ ga wena naxüchigagüãxü̃. Rü yemaca̱x poraãcüxüchi nataãẽgü.

Neemía 8:17 Referans Kwoze

Norü taxre ga to ga popera ga ãẽ̱xgacügüchiga ümatüxü̃ 8:13

Rü yema ngunexü̃gü ga nagu yéma ínaguaxü̃ nixĩ ga yema ngunexü̃gü ga Moiché nüxü̃ unetaxü̃. Rü yema nixĩ ga ngü̃chigaarü ngunexü̃gu, rü tauemacü ya ngexwacaxü̃cügu, rü yema tomaepü̱x ga petagü ga wüxichigü ga taunecügu naxüchigagüxü̃gu. Rü yema nixĩ ga paũ i ngearü pu̱xẽẽruü̃ã́xü̃arü petachigagu, rü nanetüarü buxgüchigagu, rü düxenügüarü petachigagu.

Édra 3:4

Rü yema Moiché ümatüxü̃ ga mugü nüxü̃ ixuxü̃rüxü̃ rü nanaxüchigagüxü̃ ga yema naixatümaxã nügü nax yaxüpataxü̃. Rü guxü̃ma ga ngunexü̃gu rü ínanaguuxü̃ ga ãmaregü aixrügumarüü̃tama yema Moiché ümatüxü̃ ga mugü nüxü̃ ixuxü̃rüxü̃.

Popera ga Yudíugü ga yaxõgüxü̃ca̱x ümatüxü̃ 11:13

Natürü nümagü ga Abráü̃ rü Ichaá rü Acóbu rü nayue, rü tama nüxü̃ nadaugü ga guxü̃ma ga yema Tupana namaxã ixunetaxü̃. Natürü Tupanaaxü̃́ nayaxõgü, rü yemaca̱x yáxü̃wama nüxü̃ nadau nax Tupana yanguxẽẽxü̃ ga yema norü uneta. Rü yemaca̱x nataãẽgü woo nüxü̃ nacua̱xgü nax ñoma to i nachixü̃anecüã̱xrüxü̃ paxaãchimare ñoma ga naanewa nayexmagüxü̃.

Popera ga Yudíugü ga yaxõgüxü̃ca̱x ümatüxü̃ 11:9

Rü yexguma nawa nanguxgu ga yema naane ga Tupana namaxã ixunetaxü̃, rü wüxi ga to ga nachixü̃anecüã̱xrüxü̃ ĩpata ga naxchirunaxca̱xmaxãmare naxãpata. Rü yexgumarüü̃tama ga nane ga Ichaá rü nataxa ga Acóbu rü yema naanewa ĩpata ga naxchirunaxca̱xmaxãmare naxãpatagü, rü naxca̱xgü rü ta nixĩ ga yema uneta ga Tupana Abráü̃maxã nüxü̃ ixuxü̃.

Ore i mexü̃ ga Cuáü̃ ümatüxü̃ 1:14

Rü nüma ya yimá Nane ya Tupanaarü Oregu ãégacü rü duü̃xü̃xü̃ nügü nixĩxẽxẽ. Rü totanüwa namaxü̃ rü nüxü̃ tadaugü ga norü üüne ga Nanatüxü̃tawa nayaxuxü̃, yerü Nane ga nügümaxã wüxicacü nixĩ. Rü nüma ga Nane rü poraãcü duü̃xü̃güxü̃ nangechaxü̃ rü aixcüma nixĩ ga norü ore.

Norü taxre ga to ga popera ga ãẽ̱xgacügüchiga ümatüxü̃ 35:18

Rü nüma ga Yochía rü yexguma marü 18 ga taunecü ãẽ̱xgacü yixĩxgu nixĩ ga naxüchigagüãxü̃ ga yema Üpetüchiga namaxã ga chacherdótegü rü Lebítanüxü̃ rü Yudáanecüã̱xgü rü Yerucharéü̃cüã̱xgü. Rü Tupanaarü orearü uruxü̃ ga Chamuéwena rü taguma yemaacü nanaxüchigagü ga Üpetüchiga. Rü taxuxü̃ma ga Iraéanearü ãẽ̱xgacü rü Yochíarüxü̃ yemaacü nanaxüchiga ga yema Üpetüchiga.

Norü taxre ga to ga popera ga ãẽ̱xgacügüchiga ümatüxü̃ 30:26

Rü nataxüchi ga taãxẽ ga Yerucharéü̃wa, yerü yexguma Charomóü̃ ga Dabí nane Iraéanearü ãẽ̱xgacü yixĩxgucürüwa rü taguma yemaacü nanaxüchigagü ga yema peta ga Yerucharéü̃wa.

Nüxíraxü̃xü̃ ga to ga popera ga ãẽ̱xgacügüchiga ümatüxü̃ 29:22

Rü yema ngunexü̃gu rü meama nachibüe rü naxaxegü rü poraãcü nataãẽgü nape̱xewa ga Cori ya Tupana. Rü ñu̱xũchi wenaxarü nüxü̃ naxunetagü ga Charomóü̃ ga Dabí nane nax ãẽ̱xgacü yixĩxü̃ca̱x. Rü Tupanape̱xewa chíxü̃maxã nanabaerugü nax nüma Iraéanecüã̱xgümaxã inacuáxü̃ca̱x. Rü yexgumarüxü̃ ta nüxü̃ naxunetagü ga Chadóx nax chacherdótegüarü ãẽ̱xgacü yixĩxü̃ca̱x.

Yochué 1:1

Rü yexguma nayuxguwena ga gumá Tupanaarü duü̃ ga Moiché, rü nüma ga Cori ya Tupana rü Moichéarü ngü̃xẽẽruxü̃ ga Yochué ga Núü̃ nanemaxã nidexa, rü ñanagürü nüxü̃:

Wenaxarü naxümatü ga Tupanaarü mugü 16:15

Rü ngẽma peta i Tupanaca̱x tá pexüxü̃ rü 7 i ngunexü̃ tá penaxüchiga nawa i ngẽma nachica i nüma nüxü̃ naxunetaxü̃. Rü ngẽmaãcü ya perü Cori ya Tupana rü tá pexü̃ narüngü̃xẽxẽ nax muxü̃ pexü̃́ ínguxuchixü̃ i guxü̃ma i penetügüarü o. Rü guxü̃ma i perü puracüwa rü tá pexü̃ narüngü̃xẽxẽ, rü aixcüma tá petaãẽgü.