Neemía 6:9 - Tupanaarü Ore

⁹ Rü yemaacü toxü̃ naxãxũnegü, yerü toxü̃ namuü̃exẽẽchaü̃ nax nüxü̃ tarüchauexü̃ca̱x nax tapuracüexü̃. Natürü ga choma rü yexeraãcü chanaxüama ga yema puracü.

Neemía 6:9 Referans Kwoze

Wiyaegü 138:3

Rü yexguma cuxna chacaxgux nax choxü̃ cuporaxẽẽxü̃ rü cuma rü choxü̃ cungãxü̃ rü aixcüma choxü̃ cuporaxẽxẽ.

Nüxíraxü̃xü̃ ga popera ga Pedru ümatüxü̃ 5:10

Natürü ngẽxguma paxaãchi ñoma i naanewa ngúxü̃ pingegüguwena, rü Tupana rü tá pexü̃ nimexẽxẽ nax aixcüma nape̱xewa pimexü̃ca̱x. Rü woo guxchaxü̃gü pexca̱x ínguxgu, rü tá pexü̃ narüngü̃xẽxẽ nax peyaxõgüamaxü̃ca̱x, rü tá pexü̃ naporaexẽxẽ nax ngẽmaãcü taxuca̱xma pemuü̃exü̃ca̱x. Rü nümatama ya Tupana nixĩ i norü ngechaü̃gagu pexü̃ nadexü̃ nax guxü̃guma naxü̃tawa pexü̃́ nangẽxmaxü̃ca̱x i pechica, erü Ngechuchu ya Cristuaxü̃́ peyaxõgü.

Popera ga Yudíugü ga yaxõgüxü̃ca̱x ümatüxü̃ 12:12

Rü ngẽmaca̱x i pema nax pexme̱xwa rü peãpü̱xüwa pipaexü̃, rü name nixĩ i pegü peporaexẽẽãma.

Filipenses 4:13

Rü Cristu nixĩ ya choxü̃ poraxẽẽcü, rü ngẽmaca̱x chomaxã nanguxü̃ nax chanaxüxü̃ i guxü̃ma i ngẽma Tupana naxwa̱xexü̃ nax chanaxüxü̃.

Efesios 3:16

Rü nüxna chaca ya Tanatü nax guxü̃ma i norü mexü̃wa pexna naxããxü̃ca̱x i ngẽma pora i Naãxẽ ya Üünexü̃wa ne ũxü̃ nax peãẽwa aixcüma peporaexü̃ca̱x.

2 Corintios 12:9

Natürü nüma ya tórü Cori rü ñanagürü choxü̃: “Choma cuxü̃ changechaü̃, rü ngexicatama nixĩ i cunaxwa̱xexü̃. Rü choma rü ngẽma duü̃xü̃gü i tama poraexü̃wa nixĩ i chanango̱xẽẽxü̃ i chorü pora”, ñanagürü choxü̃. Rü ngẽmaca̱x chataãxẽ ega tama chaporagu. Erü ngẽxguma tama chaporagu rü ngẽxguma nixĩ i chowa inawéãxü̃ i norü pora ya Cristu.

Ichaía 41:10

¡Taxṹ i pemuü̃exü̃, Pa Iraétanüxü̃x! Erü choma rü chapexü̃tagu. ¡Rü taxṹ i pemuü̃exü̃! Erü choma rü perü Tupana chixĩ. Choma rü pora pexna chaxã rü pexü̃ charüngü̃xẽẽxü̃. Rü choma rü chorü tügünechacüxümaxã pexü̃ chingĩ rü pexü̃ íchapoxü̃.

1 Chamué 30:6

Rü nüma ga Dabí rü naxoegaãẽ yerü ga yema norü duü̃xü̃gü rü nagu narüxĩnüe nax Dabíxü̃ nutamaxã ínamuxũchigüxü̃ yerü poraãcüma naxacügüca̱x nanue. Natürü nüma ga Dabí rü Cori ya Tupanana narüyoe rü nayaxõ nax Tupana tá nüxü̃ rüngü̃xẽẽxü̃.

Efesios 6:10

Rü ñu̱xmax, Pa Chauenexẽgüx, rü name nixĩ i pegü peporaexẽxẽ namaxã i ngẽma pora i tórü Coriwa ne ũxü̃.

Yeremía 38:4

Rü yexguma yemaxü̃ naxĩnüegu ga yema ãẽ̱xgacüarü ngü̃xẽẽruü̃gü, rü ñanagürügü ãẽ̱xgacüxü̃: —Pa Ãẽ̱xgacüx, name nixĩ i tayama̱x i ñaa yatü erü ngẽma dexa i nüxü̃ yaxuxü̃maxã nananuexẽxẽ i tórü churaragü i nua tórü ĩanewa yaxǘgüxü̃ rü nananuexẽxẽ i guxü̃ma i duü̃xü̃gü. Rü ñaa yatü rü tama daa ĩanearü mexü̃ca̱x nadau, natürü norü chixexü̃ca̱x nixĩ i nadauxü̃ —ñanagürügü.

Norü taxre ga to ga popera ga ãẽ̱xgacügüchiga ümatüxü̃ 15:7

¡Natürü i pema rü peporaeama̱x, rü taxṹ i perümaãchitanüxü̃! Erü ngẽma mexü̃ i perü puracü i pexüxü̃ rü tá pexü̃́ naxãtanü —ñanagürü ga Acharía.

Wiyaegü 71:1

Pa Cori Pa Tupanax, cuma nixĩ i chorü poxü̃ruxü̃ quixĩxü̃. ¡Rü choxna nadau nax tama chaxãnexü̃ca̱x!

Wiyaegü 56:3

Natürü ngẽxguma chamuü̃gu rü chayaxõ nax choxü̃ tá curüngü̃xẽxẽxü̃ca̱x.

Neemía 6:14

Pa Chorü Tupanax, ¡taxṹ i cunangupetüxẽxẽmarexü̃ ga yema chixexü̃ ga naxügüxü̃ ga Chambaráx rü Tobía! ¡Rü ngẽxgumarüxü̃ ta taxṹ i cunangupetüxẽxẽmarexü̃ i ngĩrü chixexü̃ i ngẽma orearü uruü̃neta i Noadía, rü ñu̱xũchi ngẽma togü i orearü uruü̃güneta i choxü̃ muü̃xẽxẽgüchaü̃xü̃!

Wiyaegü 68:35

Pa Tupanax, cupata ya üünenewa rü cuporaxüchi. Rü cuma nax Iraétanüxü̃arü Tupana quixĩxü̃ rü cunaporaexẽxẽ i curü duü̃xü̃gü. Rü cuma, Pa Tupanax rü cumecümaxü̃chi.

Norü taxre ga to ga popera ga ãẽ̱xgacügüchiga ümatüxü̃ 32:18

Rü nümagü ga Chenáqueriarü churaragüerugü rü Ebréugawa tagaãcü yema duü̃xü̃gü ga Yerucharéü̃arü poxeguxü̃étüwa yexmagüxü̃na nacagüe nax yemaacü naba̱i̱xãchiexü̃ca̱x rü namuü̃exü̃ca̱x rü yemaacü chi nüxü̃́ natauxchagüxü̃ca̱x nax napugüãxü̃ ga guma ĩane.

Chacaría 10:12

Rü choma rü tá pora nüxna chaxã rü chauégagu tá ínaxĩ. Rü choma ya Cori ya Tupana nixĩ i pexü̃ ngẽma ñachaxü̃ —ñanagürü.

Édra 1:6

Rü yema Iraétanüxü̃ ga tama Yerucharéü̃ca̱x woeguchaü̃xü̃, rü yema woeguxü̃xü̃ narüngü̃xẽẽgü diẽrumaxã, rü úirumaxã, rü wocagümaxã rü norü yemaxü̃gü ga tatanüxü̃maxã. Rü naétü nüxna nanaxãgü ga ãmaregü Tupanapata ga taxü̃neca̱x.

Echequié 30:24

Rü ñu̱xmax rü tá chanaporaxẽxẽ i Babiróniaanearü ãẽ̱xgacü, rü tá nüxna chanaxã i chorü tara. Rü tá chayapoye ya yima taxre ya nachacüxü ya Faraóü̃. Rü nüma rü norü uanüpe̱xewa tá norü ngu̱xmaxã nixãĩnecüü.

Ichaía 40:29

Dücax, rü yíxema ipaxe rü pora tüxna naxã. Rü yíxema turaxe rü tüxü̃ ínanaporaãchixẽxẽ.